އަހަރެމެންގެ ދިރިއުޅުމުގެ ވައްޓަފާޅީގައި ކަމެއް ހިނގާ ދިއުމުން އެކަމެއް އަބަދުވެސް ކޮންމެވެސް ބަޔަކަށް ރައްދު ކުރެވެއެވެ. މިއީ މުޅި އިންސާނިއްްޔަތުގެ ވެސް ޠަބީއަތެވެ. އާދައެވެ. ދުނިޔޭގެ ފިޠުރަތެވެ. އުޅުމުގައި ދެމަފިރިން ނުވަތަ ދެމީހަކު ނުވަތަ ވަކި ބައެއްގެ ތެރޭގައިވެސް ކަންކަން ދިމައިވާނެއެވެ. ދިމައިވާ ކޮންމެ ރަނގަޅު ކަމެއްގައި ތިމާ ނަން ވެފައި ދިމައިވާ ގޯސްކަންތަކުގައި އަނެކާ ބަދުނާމު ކުރުމަކީވެސް އިންސާނީ ޠަބީއަތެކޭ ބުނެވިދާނެއެވެ. މި އުސޫލުގެ މަތިން އަމަލުކުރާ މީހެއްނަމަ، ހަމަ ކަމެއް ވާއިރަށް ރުޅި އަންނާނެއެވެ. އެއާއި އެކު އެކަން ރައްދުވި އަނެކާ ބުނާނެއެވެ. "ހަމަ ކަމެއް ވާއިރަށް ރުޅި އަންނާކަށް ނުޖެހެއެވެ!"

އާދޭހެވެ! ދިރިއުޅުމުގައި ހަމަ ކަމެއް ވާއިރަށް ރުޅި އަންނާކަށް ނުޖެހޭނެއެވެ. އަދި ރުޅި އައިސް ނުވަތަ ހިތްހަމަ ނުޖެހިފައިވާ މީހާއާއި ދިމާލަށް، ހަމަ ކަމެއް ވާއިރަށް ރުޅި އަންނާކަށް ނުޖެހޭ ބުނާކަށްވެސް ހަގީގަތުގައި ނުޖެހެއެވެ. ދަންނާށެވެ! ވީ ކަމެއް އެހިސާބުން އޮންނާނީ ވެފައެވެ. ހަމަ ގައިމުވެސް ކަމެއް އޮތީ ވެފައެވެ. އިހަށް ރުޅިވެސް މަޑު ކުރަން ވީއެވެ. އަނެކާ ބަދުނާމު ކުރުންވެސް މަޑު ޖައްސާލަން ވީއެވެ. އިހަށް ވިސްނާލަ ބަލާށެވެ. 

ރުޅި އަކީ އިންސާނާގެ ވިސްނުމުގެ މައްޗަށް ގަދަވެގަންނަ އެއްޗެކެވެ. ނަތީޖާއަކަށް މި ވަނީ ހަމަ ކަމެއް ވާއިރަށް ރުޅި އާދެވުމެވެ. ކަމެއް ނުވަނީހެއް ރުޅިއެއް ނާދޭތާއެވެ. އެހެންކަމުން ކަމެެއް ވުމަކީ ރުޅި އަންނަން ޖެހިދާނެ ކަމެކެވެ. އެހެނަސް ރުޅި ކޮންޓްރޯލު ކުރަންވާނެއެވެ. ކޮންޓްރޯލު ކުރަން ދަސްވެސް ކުރަންވާނެއެވެ. 

އެކަކު ރުޅި އައުމުން އަނެކާ މި ބުނަނީ ހަމަ ކަމެއް ވާއިރަށް ރުޅި އަންނާކަށް ނުޖެހެއެވެ. އެހެން އެ ބުނެވެނީ ގިނަފަހަރަށް އެކަމެއް އެގޮތަށް ކުރެވުނު މީހާއެވެ. ކުށެއް ކުރެވުނު މީހާއެވެ. އާދޭހެވެ! އަނެކާ ރުޅި އެ އައީ ކުށެއް ކުރެވުނީމައެވެ. ރުޅި އަންނާކަށް ނުޖެހެއޭ ބުނާއިރު، ކުށެއް ކުރެވުނުކަން ގިނަ ފަހަރަށް ހަނދާނެއް ނުހުރެއެވެ. މިއީ ދިމައިވާ ކުދި ކުދި ކަންކަމުގައި މޫނު ޖެހި، ދެމަފިރިން ވަރިވެ، އެކުވެރިން ބީވެ، ވިޔަފާރިތައް ހަލާކުވެ، ގުޅުންތައް ކެނޑި ހިނގައިދާ ކަންކަމެވެ. މިއީ ވުން އެދޭނޭ ކަންކަމެއް ނޫނެވެ.

މިކަމުގައި ރުޅި އަންނަ މީހާ ރުޅިވެސް އަންނާނެއެވެ. އައިސްގެން ނުވާނޭ ބުނާ މީހާ އެހެންވެސް ބުނާނެއެވެ. މިއީ ދުނިޔޭގެ ނިޒާމުން ކަން ހިނގާ އުސޫލެވެ. ނަމަވެސް މިކަންކަމުގެ މައްޗަށް އިސްކުރަންވީ ބުއްދިއެވެ. ސިކުނޑީގެ ބާރުން ވިސްނަން ވީއެވެ. ހަމަ ކަމެއް ވާއިރަށް ރުޅި ނާންނަން މަސައްކަތް ކުރަންވީއެވެ. އެހެނދީ ދިރިއުޅުމުގައި އެފަދަ ކަންކަން ވާނެއެވެ. ރުޅި އައިސްގެން ނުވާނޭ ބުނުންވެސް މަދުކުރަންވީއެވެ. އެފަދަ ކަމެއް ތިމާގެ ފުށުން ފެނުމުގެ ފުރުސަތު ކުޑަކުރަންވީއެވެ. މަދުކުރަންވީއެވެ. ވިސްނައިގެން އަމަލު އިސްކުރަންވީއެވެ. ވިސްނައިގެން ކަންކަން ހައްލު ކުރަންވީއެވެ. ރުޅި އިސްކުރެވޭފަދަ ކަންކަން ކުރިމަތި ވިޔަ ނުދޭންވީއެވެ. ހަމަ ކަމެއް ވާއިރަށް ރުޅިވެސް ނާންނަން ވީއެވެ.