ދުނިޔޭގެ ހަޔާތުގައި އެތައް ކަމެއް ކުރިމަތިވާނެއެވެ. އުފަލާ ހިތްހަމަ ޖެހުމާއި އަރާމެވެ. ހިތްދަތި ކަމާއި މާޔޫސްކަމާއި ހިތާމައެވެ. މިއީ ދުނިޔޭގެ އާދައެކެވެ. މިއީ މި ދުނިޔެ ހިނގާނެވެސް ގޮތެވެ. ދުނިޔޭގައި ދިމާވާ ބައެއް ކަންކަމުގައި އަހަރެމެން މައާފަށް އެދެމެވެ. އެކަމަކު މައާފަށް އެދޭ ކޮންމެ ފަހަރަކީ އެމީހަކު ކުށްވެރިވުމުގެ ބަދަލެއް ދެވޭ ފަހަރެއް ނޫނެވެ. މާނަ އަކީ މައާފަށް އެދެނީ ކޮންމެހެން ކުށެއް ކުރެވުނީމަ އެކަންޏެއް ނޫނެވެ.

މައާފަށް އެދުމާއި މައާފު ކުރުމާއި މިއީ އަބަދުވެސް އަހަރެމެން ކުރަން ޖެހޭނެ ކަމެކެވެ. އިންސާނީ ނަސްލު ދެމިގެން ދިއުމާއި ދުނިޔޭގެ އަމާންކަމަށް މިއީ ލާޒިމު ނުކުތާއެކެވެ. އެހެންކަމުން އަބަދުމެ އަހަރެމެންނީ މައާފަށް އެދޭ ބަޔަކީމުއެވެ.

އާންމުގޮތެއްގައި މައާފަށް އެދެނީ ކުށެއް ކުރެވުނީމައެވެ. މިއީ އާންމު އުސޫލު ހެއްޔެވެ؟ އާންމު އުސޫލު ކަމަަށް ބުނެ އުޅެނީ މިއުސޫލެވެ. އެހެންނަމަވެސް އާންމުކޮށް އާދަވެ މައާފަށް އެދޭ މީހުންގެ ތެރޭގައި ތިބެނީ ކުށްވެރިންނެއް ނޫނެވެ. އެބައިމީހުން މައާފަށް އެދެނީ އެބައިމީހުނަށް ކުށެއް ކުރެވިގެނެއް ނޫނެވެ. ނަމަވެސް އަނެކާގެ ހަމްދަރުދީއާއި އަޅާލުން ބޭނުން ވާތީއެވެ. ކަމެއް ގޯސްވާން ނޭދޭތީއެވެ. ސުލްހަވެެރިކަމަށް ހިތް އެދޭތީއެވެ. ގުޅުމެއް ރޫޅިދާން ނޭދޭތީއެވެ. ކެހިވެރިވާން ނޭދޭތީއެވެ. ޖަދަލުކުރަން ހިތް ނުރުހޭތީއެވެ. އަދި އޯގާތެރިކަމާއި މަޑުމައިތިރިކަމަށް ހިތް އެދޭތީއެވެ.

އާދޭހެވެ! އަނެކާ މައާފަށް އެދުމުން އެ ދޭހަ ކޮށްދެނީ ކޮންމެހެން އަނެކާ ކުށްވެރިވިކަމެއް ނޫނެވެ. ނުވަތަ އަނެކާއަށް ކުށެއް ކުރެވުނުކަމަށް އަނެކާ އިއުތިރާފު ވީކީއެއް ނޫނެވެ. މައާފަށް އެދުމަކީ ރީތި ސިފައެކެވެ. ކުށްވެރި ނުވިޔަސް، މަސްލަހަތަށްޓަކައި މައާފަށް އެދެން ދަސްކުރާށެވެ. ގިނަގިނައިން މައާފަށް އެދުމަކީ އެ މައާފުގެ އަގު ވެއްޓިދާ ކަމެއް ނޫނެވެ. އެއިން އެއްޗެއް ދޭހަވާން އެބަ ޖެހެއެވެ. އެއިން ދޭހަ ވަނީ އިސްވެ ދެންނެވުނު ކަންކަމެވެ. އަދި ކިއެއްތަ އެއަށްވުރެ ރަނގަޅު ނިޝާންތަކެވެ.

ދަންނާށެވެ. މައާފަށް އެދެނީ ހަމަ އެކަނި ކުށެއް ކުރެވުނީމައެއް ނޫނެވެ. އުފަލާ ހިތްހަމަ ޖެހުމަކީ ހަޔާތުގެ ބައެއް ކަމުގައި ދެކިގެންނެވެ. ތޮޅުމާއި އަރާރުން ވުމަކީ ދުނިޔޭގައި ފޫހިކަމަކަށް ވާތީއެވެ.