ލޯތްބަކީ ހާދަ ބާރުގަދަ އެއްޗެކޭ މީހުން ބުނާތީ އަޑު އިވެއެވެ. މިކަމުގެ ދުނިޔެވީ ހެކިތަކާއި ފޯކުލޯރު ވާހަކަތައްވެސް ދެކެވިފާ ހުރެއެވެ. މި ލިޔުމުގައި މި ބަލާލަނީ މީގެ އަހަރުތަކެއް ކުރިން ތުރުކީގެ ދެ ލޯބިވެރިންނަށް ދިމައިވި ހާދިސާއެއްގެ ވާހަކައެވެ. އެ ހާދިސާގެ އަސްލު އެނގުނީ އެ ހާދިސާ ހިނގިތާ އަހަރުތަކެއް ފަހުންނެވެ.

ތުރުކީގެ އަވަށެއްގައި ހުންނަ އަމިއްލަ ކްލިނިކެކެވެ. އާދައިގެ ފެންވަރުގެ މި ކްލިނިކުގައި ލެބޯޓަރީގެ ހިދުމަތްވެސް ލިބެން ހުރެއެވެ. މިއީ އެ ލެބޯޓަރީގައި މަސައްކަތް ކުރާ ދެ ޓެކްނީޝަނުންގެ ލޯބީގެ ވާހަކައެވެ. އެ ދެމީހުންނަކީވެސް ޒަވާޖީ ހަޔާތެއް ފަށައިގެން އުޅޭ ދެމީހުންނެވެ. އެހެނަސް މަސައްކަތުގެ މާހައުލުގައި އެ ދެ މީހުންގެ ދެމެދުގައި ލޯބީގެ ގުޅުމެއް އުފެދި ދިޔައީ ފައްކާވަމުންނެވެ. ކުރިލާ ހެދެމުން ދިޔައީ ނުބައި ގުޅުމެެއްގައެވެ. ދެމީހުންނަށްވެސް ދަރިން ލިބިފައި ހުރުމާއި އެކު އެއްވެސް މީހަކަށް ވަރިވެ، އެ ދެ މީހުންގެ ލޯބީގެ އައު ހަޔާތެއް ފަށާނެކަމުގެ ހިތްވަރެެއް ނުލިބުނެވެ. އީމާންތެރިކަމާ އަގީދާގެ ވަރުގަދަ ކަމަކުން ނޫނެވެ. ދުނިޔޭގެ ލަދަށެވެ.

ކޮންމެ އަކަސް މި ދެމީހުންގެ ލޯބީގެ ގުޅުމުގައި ކޮންމެވެސް ގޮަތަކުން ބެނދެވިގަތުމަށް ދެމީހުންވެސް ބޭނުންވެއެވެ. އެއާއި އެކު އެ ވިސްނުމުގެ ތެރެއަށް ދެމީހުންގެ ވެސް ހިތަށް ވެރިވީ ޝައިޠާނާގެ ނުބައި ވަސްވާހެވެ. އެ ފިރިހެން މީހާގެ މަގުސަދަކަށްވީ އެ އަންހެން މީހާގެ ފިރިމީހާއަށް ސިހުރު ހަދާށެވެ. އެ އަންހެންމީހާގެ މަގުސަދަކަށްވީ އެ ފުރިހެންމީހާގެ އަންހެނުންނަށް ސިހުރު ހަދާށެވެ. 

އެއީ ލެބޯޓަރީ އެކެވެ. އެކި މީހުން އައިސް ލޭ ދީ ހަދާ ތަނެކެވެ. އެތަނަކުން މިފަދަ މުޑުދާރު އަމަލެއް ފާޅުވެދާނެ ކަމަށް ހީކުރާނީ ކާކު ހެއްޔެވެ. ކޮންމެއަކަސް އެ ދެމީހުންގެ ލޭގެ ސާމްޕަލް ތަކެއް އެ ލެބޯޓަރީގައި ޖަމާ ކުރިއެވެ. އެކި ދުވަސް މަތިން ފާރަ ލައިގެން ސިއްރުގައެވެ. މިކަން ވެގެން ދިޔައީ ސިހުރުގެ ފުރަތަމަ މަރުހަލާ އަށެވެ.

ެިއިންސާނާގެ ލެޔަކީ ސިހުރު ހަދަން ބޭނުން ކުރާ އެއްޗެކެވެ. އެ ލޭތަކުގެ އެހީގައި އެ ދެމީހުން، އަނެއް ދެމީހުންނަށް ސިހުރު ހެދިއެވެ. އެމީހުން އެ ބޭނުންވާ ގޮތަށް ގުޅުމެއް އުފައްދާށެވެ. ނަމަވެސް ކަންކަން ވެގެން ދިޔައީ ހީކުރިގޮތާއި މުޅިން ހިލާފަށެވެ. ސިހުރުގައި ހެދުނު ނެހެދުނެއް އެ ދެމީހުންނަކަށް ނޭނގުނެވެ. އުނދަގޫތަކާއި ޝައިޠާނީ ވަބާވެރިކަން ޖެހެން ފެށީ މި ދެ މީހުންނަށެވެ. އެ ސަކަރާތުގައި އެ ދެމީހުން އެތައް ދުވަސްތަކެއް ހޭދަކުރުމަށްފަހު ދުނިޔެ އަޅާ ދިޔައީ ނިކަމެތި ހާލުގައެވެ. ވީނުވީއެއް ނޭނގި ދެމީހުންވެސް މަރުވީއެވެ. ނަމަވެސް ދެ ތާރީހެއްގައެވެ. ކައިރި ކައިރީގައެވެ. ކުއްލި މަރަކުންނެވެ. އެ ހިސާބުން އެއީ ހަމައެކަނި ކުއްލި މަރެއްކަމަށް ނިންމިއެވެ. އެހެނަސް އޭގެ އަހަރުތަކެއް ފަހުން ފެނުނު ލިޔެކިޔުންތަކެއްގައި އިސްވެ މި ކިޔައިދިން ވާހަކަތައް އެ ދެމީހުންވެސް އޮތީ ލިޔެފައެވެ. އެގޮތަށް އެ ލިޔެ ރައްކާކުރުމުގެ ބޭނުމަކީ ކޮބާ ހެއްޔެޗެ؟ އެ މީހުން އެ ހެދި ސިހުރަށް މި ވީ ކިހިނެއް ހެއްޔެވެ؟ ސިހުރުވެރިންގެ ނިމުން ހިއްޗޭ ބުނަނީ މިހެން ވެގެން ހެއްޔެޗެ؟

ޔާ ﷲ! ސިހުރުވެރިންނާއި ސިހުރުވެރިންގެ ނުބައިކަމުން އަޅަމެއް އެންމެން ރައްކާތެރި ކުރައްވާށިއެވެ.! އާމީން!