ހިތްހަމަ ނުޖެހޭ ކަންކަމުގައި އަހަރެމެންނަށް އަބަދުވެސް ޝަކުވާ ކުރެވެއެވެ. ޝަކުވާ ކުރެވެނީ އެކިފަހަރު އެކި ގޮތަށެވެ. ސީދާ މޫނުމަތީގައި ޝަކުވާ ކުރެވޭ އިރު ސިއްރުގައިވެސް ޝަކުވާ ކުރެވޭތަން އެބަ ފެނެއެވެ. ހިތްހަމަ ނުޖެހެވެމުން އެކަމުގެ މައްޗަށް ނުރުހުމުގެ ޝުއޫރެއް ފާޅު ކުރެވުމަކީ އިންސާނާގެ ޠަބީއަތެކެވެ. ނަމަވެސް އަބަދު ޝަކުވާކުރުމަކީ ރަނގަޅުކަމެއް ނޫންކަންވެސް ހަނދާންކުރަން އެބަ ޖެހެއެވެ. އަބަދު ހިތް އެދޭގޮތަށް ކަންކަން ނުވާނެކަންވެސް ހަނދާން ކުރަން ޖެހޭނެއެވެ. އެހެނީ މިއީ ދުނިޔެ ކަމުގައި ވާތީއެވެ.

ބައެއް މީހުންނާ ކުރިމަތިވާ ހިތްނޭދޭ ކަންކަމުގައި، އެކަމެއްގެ ވަގުތު ވުމުގެ ކުރިން އެކަމަކާ ޝަކުވާކުރެވެއެވެ. އަދި އެކަމުގެ ވަގުތު ވަނުމުން އެކަމެއްގެ ތެރޭގައި އުޅެމުން އެކަމަކާއި މެދު ޝަކުވާކުރެވެއެވެ. އަނެއްބައި މީހުން ޝަކުވާ ކުރަނީ އެކަމެއްގެ ވަގުތުގައި އެކަމެއް ކުރުމަށްފަހު މާދުރުގައި ތިބެގެންނެވެ. ކޮންމެއަކަސް ކޮންމެވެސް ސިފައެއްގައި އަބަދުވެސް އަހަރެމެންނަށް ޝަކުވާ ކުރެވެއެވެ. މިފަދައިން ކުރެވޭ ޝަކުވާ ތަކުގައި އެއްމެ އަސަރުގަދަ ޝަކުވާއަކީ މޫނުމަތީގައި ކުރާ ޝަކުވާއެވެ. ދިމާލަށް ބުނެ ހަދާ ކުރާ ޝަކުވާއެވެ. މިއީ އޭގެ ސަބަބުން ގުޅުންތައް ހީނަރުވެސް ވެދާފަދަ ޝަކުވާތަކެކެވެ.

އާދެހެވެ! ހަމަ ކަމެއް ވާއިރަށް ޝަކުވާ ކުރަން ޖެހޭ ހެއްޔެވެ؟ ނޫނެކެވެ! ހަމަ ކަމެއް ވާއިރަށް ޝަކުވާ ނުކޮށްބަލާށެވެ! މިއީ ދުނިޔެއެވެ. މި ދުނިޔެ ހިނގާނީ ތޮށަލި ދުޅަ އަކަށޭ ބުނާތީ އަޑެއް ނާހަން ހެއްޔެވެ؟ ވީއިރު އަބަދު ޝަކުވާ ކުރަން އެދޭމީހަކަށް އެނޫން ކަމެއް މިދުނިޔެ މަތީގައި ނުކުރެވޭނެއެވެ.

ވިސްނާލާށެވެ. އަބަދު ހިތް އެދޭ ގޮތަށް ކަންކަމެއް ނުވާނެއެވެ. އެއިން ކޮންމެ ފަހަރަކު ޝަކުވާ ކުރަން އުޅޭނަމަ، އެކަމުން އަނެކުންނަށް ކުރާނީ ކޮން އަސަރެއްތޯއެވެ. ތިމާ ކަމަކާ ހިތް ނޭދުނަސް އެކަމާ ހިތް އެދޭނޭ އެތައް ބަޔަކުވެސް ތިބޭނޭކަން ހަނދާން ކުރަންވާނެއެވެ. ތިމާއަށް ހިތްހަމަ ޖެހޭ ކަމެއް މެދުވެެރިވާ ހިނދު އެހެން ބަޔަކު އެކަމާ ޝަކުވާ ކުރާނަމަ ތިމާގެ ހިތަށް އަރާ ފައިބަމުން ދާނީ ކޮންފަދަ އިހުސާސްތަކެއް ހެއްޔެވެ؟ ވިސްނާލާށެވެ. ތިމާހެ ހިތް އެދޭ ބައެއް ކަންކަން އެއީ އަނެކުންގެ ހިތް ނޭދޭ ކަންކަން ކަމުގައިވެސް ވެދާނެއެވެ. އެހެންކަމުން ޝަކުވާކުރުން މަދު ކުރާށެވެ. އެހެން އިބާރާތަކުން ބުނާނަމަ، ގިނަގިނައިން "ހަޖަމް" ކުރާ ބަޔަކަށް އަހަރެމެން ވަމާ ހިނގާށެވެ. ހިތް ނުރުހުނަސް ކަމެއް މެދުވެރިވުމުން އެކަމެއް ވެދިޔަ ދޭށެވެ. އެކަމުގައިވެސް ހެވެއް ވެދާނޭކަން ގަބޫލު ކުރާށެވެ. ޝަކުވާކުރަން ނުހަދާށެވެ!