އެހީއެއް ވެ ދިނުމަކީ ކޮބާހެއްޔެވެ؟ މިއަދު ބައެއް މީހުންނަށް ހީވެފައި އޮންނަނީ އެއީ ފައިސާ ދިނުން ކަމުގައެވެ. ފައިސާއިން ކޮންމެވެސް އެހީތެރިކަމެއް ފޯރުކޮށްދިނުން ކަމުގައެވެ. ނަމަވެސް ހަނދާން ކުރާށެވެ. މިއީ ބޮޑު ކުށްހީއެކެވެ. އެހީތެރިވުމާއި އެހީވެދިނުމަކީ ހަމައެކަނި ފައިސާއިން ކޮށްދެވޭނޭ ކަމެއް ނޫނެވެ. ނަމަވެސް ހިތާމައަކީ ގިނަބަޔަކު މިކަން ހަނދާން ނައްތާލާފައި ވާކަމެވެ.

މިއަދު މުސްކުޅިވެ ގައިބާރު ދެރަވެފައިވާ މައިންބަފައިންނަށް ތިމަންނާ އެހީތެރިވަމޭ ހަރުއަޑުން ގޮވާ މީހުންގެ ހާލަކީ ކޮބާ ހެއްޔެވެ؟ އާދޭހެވެ! އެމީހުންގެ އެކައުންޓަށް ޖަމާވާ ފަސް ހާސް ރުފިޔާ އެމީހުންނާ ހަމައަށް ފޯރުކޮށްދެއެވެ. މީގެ އިތުރުން އެމީހުންނާ ގުޅުންހުރި އެހެނިހެން ހަރަދުތައް ބަރާބަރަށް އަދާކުރެއެވެ. މިއީ އެމީހުންނަށް އެހީތެރިވުން ހެއްޔެވެ؟ އާދޭހެވެ! އެހީތެރި ނުވާ ކަމަކަށް ނުވާނެއެވެ. އެހެންނަމަވެސް ހަގީގީ އެހީތެރިކަމަކީ ހަމައެކަނި ފައިސާއިން ދެވޭނޭ އެއްޗެއް ނޫނެވެ.

އަޅާލުމާއި ކުލުނާއި ލޯތްބާއި ހަމްދަރުދީ އަކީ ޖަޒުބާތީ އިހުސާސް ތަކެކެވެ. އެހީތެރިވުމުގައި މި ޖަޒުބާތީ އިހުސާސްތަކަށް ސަމާލުކަން ދޭން ވާނެއެވެ. އެ މީހަކު އެންމެ ބޭނުން ޖެހިފައިވާ ކަމަކަށް އެހީތެރިކަން ފޯރުކޮށްދޭށެވެ. ގިނަފަހަރަށް ދަރިންގެ ކިބައިން މައިންބަފައިން އެދޭނީ މި ދެންނެވި އުފާވެރި ޖަޒުބާތީ އެހީތެރިކަމެވެ. އެކަން ގިނަ ދަރިން ހަނދާން ނައްތާލައެވެ. ހީވާ ކަހަލައެވެ. ހަރަދު ދެވޭނަމަ އެހުރީ ފުދިފައެވެ. މިއީ މުޑުދާރު ވިސްނުމެކެވެ.

ގިނަ އިޖްތިމާއީ ކަންކަމުގައިވެސް ކަންއޮތީ މިފަދައިންނެވެ. އިޖްތިމާއީ ކަމެއްގައި ނުވަތަ މަސައްކަތެއްގައި މަސައްކަތްތެރިކަމުގެ އަތެއް ދިއްކޮށްލާނޭ މީހަކު ނުވެއެވެ. އެހެނަސް ފައިސާގެ އެހީ ދޭ މީހުން މަދުން ނަމަވެސް އުޅެއެވެ. އެފަދަ އިޖްތިމާއީ ކަންކަމަށް ފައިސާގެ އެހީއަށްވުރެ ބޮޑަށް ބޭނުންވާނީ އަމަލާއި ބަހުގެ އެހީތެރިކަމެވެ. މަސައްކަތް ކުރާނެ އަތްތަކާއި ހެޔޮ އޯގާތެރި ހިތްވަރާއި ޝުކުރުގެ ބަސްތަކެެވެ. ނަމަވެސް ޖަމާއަތުގެ މި ހާލު ދަންނާނެ ފަރުދަކު މުޖުތަމައުގައި މަދެވެ.

ދަންނަންވީ އަދި ހަނދާން ބަހައްޓަންވީ ކަމަކީ އެހީތެރިކަމެއް ފޯރުކޮށްދިނުމަކީ ވަރަށް ފުޅާ މާނައެއްގައި ވާ ކަމެއް ކަމެވެ. އެހީ އެއް ދިނުމަކީ ހަމައެކަނި ފައިސާއިން ކުރެވޭ ކަމެއް ނޫން ކަމެވެ. ހެޔޮބަހެއްގެ މިންވަރަކީވެސް ވެވޭ އެހީތެރިކަމެކެވެ. މާތް ﷲ ގެ ހެޔޮ ރަހުމަތްފުޅުން، ހެޔޮނިޔަތުގައި ވެވޭ ހަމަ ކޮންމެ އެހީއެއް މާތް ﷲ ޤަބޫލުކުރައްވާނެއެވެ.