ދުނިޔޭގެ ހަޔާތަކީ ތަފާތު އެކި މައްސަލަ ތަކުގެ ގޮވައްޗެކެވެ. މިތަނުގައި ތަފާތު އެކި މައްސަލަތަކާއި ކުރިމަތިލާން ޖެހޭނެއެވެ. އެއްވެސް މައްސަލައެއް ކުރިމަތި ނުވާނަމަ، މިތަނަކަށް ދުނިޔެ އޭ ނުކީހެވެ. އަދި ކިއެއް، މައްސަލަތަކަކީ ހަޔާތުގެ އެއް ބައެވެ. ދިރިއުޅުމުގެ ވެސް އެއް ބައެވެ. އަހަރެމެން އިންސާނުންނަށް އޮތީ މައްސަލަތަކާއި ކުރިމަތި ލުމެވެ.

ދިމައިވާ މައްސަލަތަކުން އަބަދު ރެކެން ނޫޅޭށެވެ. މައްސައަކުން ރެކެންވެގެން ނުވަތަ މައްސަލައަކާއި ކުރިމަތި ނުލާން މޫނު އަނބުރާލައިފި މީހާގެ މިސްރާބު އެހެން ދިމާލަކަށް އެބަ ބަދަލުވެއެވެ. އެދިމާލުގައިވެސް މައްސަލަތަކެއް ހުންނާނޭކަން ހަނދާން ކުރަންވާނެއެވެ. އެހެނީ އެއީވެސް ދުނިޔެއެވެ. މިގޮތަށް އެއްވެސް މައްސަލައަކާއި ކުރިމަތިލާން ޖެހިލުންވާ މީހުން، އެމީހުންގެ ފުރާނަ އަމިއްލައަށް ދުއްވާލާތަން އެބަ ފެނެއެވެ. އެހެންކަމުން، މައްސަލަތަކާއި ކުރިމަތިލާން ކެރެން ޖެހޭނެއެވެ. ދަސްކުރަން ވާނެއެވެ. ތިމާމެންގެ ދަރީންނަށް ދަސްވެސް ކޮށްދޭން ވާނެއެވެ.

މައްސަލަތަކާއި ކުރިމަތިލުމަކީ ކޮބާ ހެއްޔެވެ؟ ފުރަތަމައީ އެއީ މައްސަލައެއްކަން ގަބޫލު ކުރުމެވެ. ދެވަނައީ އެކަމާއި އެކު ކުރިއަށް ދާނޭ މަގެއް ހޯދުމެވެ. މިގޮތަށް މައްސަލައަކާއި އެކު ކުރިއަށް ދާނަމަ އެއްމެ މޮޅު އިތުރީ އެ މައްސަލަ ހައްލުކުރުމަށްފަހު ކުރިއަށް ދިއުމެވެ. އެ މައްސަލަ ހައްލު ނުކޮށް، އެއާއި އެކު ދާން އުޅޭނަމަ، ފައިގާ އޮޅި މީހާ ވެއްޓިދާނެއެވެ.

ދަންނާށެވެ! ބައެއް މައްސަލަ ތަކަކީ ވަގުތުން އޭގެ ހައްލު ނުލިބިދާނޭ މައްސަލަތަކެވެ. އެހެންކަމުން އެ މައްސަލަތަކަށް ހައްލު ލިބެންދެން ދިރިއުޅުން މަޑުޖައްސާނީތޯ ނުވަތަ އެހެން ގޯޅިއަކުން އަޅާ، އެހެން މައްސަލަތަކަކާއި ކުރިމަތިލާނީތޯ ނުވަތަ ހައްލުވަންދެން ކުރިއަށް ދާނީތޯ މިއީ އިންސާނާ އަށް އޮތް އިހްތިޔާރުތަކެވެ. މިތަނުން އެންމެ އެދެވޭ ގޮތަކީ ކުރިއަށް ދިއުމެވެ. އެ މައްސަލައާއި ކުރިމަތި ލައިގެން ކުރިއަށް ދިއުމެވެ. މިގޮތަށް ކުރިއަށްދާ ދިއުމުގައި ތަފާތު އަލިމަގުތައް ފެންނާނެއެވެ. ތަފާތު ތަޖުރިބާތަކާއި ކުރިމަތިވާނެއެވެ. މި ތަޖުރިބާތަލާއި އަލިމަގުތަކުގެ ބޭނުމަކީ ކޮބާހެއްޔެވެ؟

އާދޭހެވެ! އިސްވެ ދެންނެވިހެން ދިރިއުޅުމުގައި މައްސަލަތަކާއި އަބަދު ކުރިމަތިވާނެއެވެ. އެހެންކަމުން އެ މައްސަލަތައް ހައްލު ކުރުމުގެ ތަޖުރިބާ ހުންނަ މީހެއްނަމަ، އޭނާއަށް އެއީ މާ ބޮޑު މައްސަލައަކަށް ނުވާނެއެވެ. މައްސަލަތަކާއި ކުރިމަތިނުލާ، އަބަދު ރެކެން ދުވާ މީހާއަށް ލިބޭނީ ކޮން ތަޖުރިބާ އެއް ހެއްޔެވެ؟ ހައްލު ކުރެވޭނީ ކޮން މައްސަލައެއް ހެއްޔެވެ؟ އާހިރުގައި އެމީހާ ވެގެން ދަނީ ފިނޑިއަކަށެވެ. ބާކީވެފައިވާ ދެރަ ނިކަމެއްޗަކަށެވެ. އެންމެފަހުން ގޮތް ހުސްވެ އަމިއްލަ ނަފްސަށް ގެއްލުން ދެއެވެ. 

އެހެންކަމުން ދިރިއުޅުމުގައި ދިމައިވާ މައްސަލަތަކާއި ކުރިމަތިލާ އެކަންކަން ހައްލުކުރަން ދަސްކުރާށެވެ. މައްސަލަ ތަކަކީ ދިރިއުޅުމުގެ އެއް ބައި ކަމުގައި ދެކޭށެވެ! ކާމިޔާބު މީހާއީ މައްސަލަތަކާއި ކުރިމަތިލާ، ހައްލު ހޯދާ ކުރިއަށްދާ މީހާއެވެ.