ދަނޑުވެރިކަން ކުރާ ފަރާތްތަކަށާއި ގަސްހެއްދުމަށް ލޯބިކުރާ ފަރާތްތަކަށް މާޔޫސްކަން ގެނުވާ އެއް ކަމަކީ އެ ގަސްތަކަށް ޖެހޭ ތަފާތު އެކި ބަލިތަކެވެ. ދަނޑުވެރިން ހުންނަނީ މިފަދަ ބަލިތަކަށް ފަރުވާދޭނޭ ވަސީލަތްތަކާއި އިލްމާއި ތަޖުރިބާ ހޯދާފައެވެ. ނަމަވެސް ގޭ ދޮށުގައި ގަސް ހައްދާ އާއްމު މީހާއަށް "ރިހާކުރު ބޭސް" ނޫނީ ދަންނަ ބޭހެއް މަދެވެ. 

ގަސްތަކުގައި އަޅާ ހުދު ކޫޑި އަކީ ބައެއް މީހުން ވަރަށް ކަންބޮޑުވާ ކަމެކެވެ. ހުދު ކޫޑިން ގަސްތައް ބަރާވެ، ކުރި ގާވެ އެއްމެ ފަހުން އެ ގަސް މަރުވާ ގޮތް ވެއެވެ. ގޭ ދޮށުގައި ގަސްހައްދާ މީހުންނަށްވެސް މިއީ ބޮޑު ގޮންޖެހުމަކަށް ވެއެވެ. މި ލިޔުމުގައި މި ބަލާލަނީ "ބެޓާ ހޯމްސް އެންޑް ގާޑަންސް" ގެ ފަރާތުން، އެ މަޖައްލާގެ ކިޔުންތެރިންނަށް، ހުދު ކޫޑިން ސަލާމަތް ވުމަށް ދީފައި ހުރި އިރުޝާދު ތަކަށެވެ. މިއީ މަޝްހޫރު ފަރަންޖީ މަޖައްލާއެކެވެ.

ހުދު ކޫޑި އަކީ ވަރަށް ފަސޭހައިން ގަސްގަހުގައި އަޅާ ސުއިއްޕެކެވެ. ހުދުކޮށް ތިބޭ މި ކުދި ކުދި ސޫފިތައް އެއްވެ އެއް ތަނަކު ބޮނޑިއަކަށް ތިބެއެވެ. މިއީ ހޫނަށް ވަރަށް ބަލި ސުއިއްޕެކެވެ. ގަސްގަހުގެ ފަތްތަކުގެ ދަށުގައްޔާއި އޮފިތަކުގެ ފަށުގައި މި ސޫފިތައް ތިބެނީ ހިޔާ ހޯދާށެވެ. އެ ތިބޭ ތިބުމުގައި ގަހުން އެސޮރުމެން ދިރިހުރުމަށް ބޭނުންވާ ކާނާ ހޯދައެވެ. ނަތީޖާއަކަށް ވަނީ ގަހަށް ބޭނުންވާ ފައިދާތަކުގެ ބޮޑު ބައެއް އެސޮރުމެން ބޭނުން ކުރަމުން ދިޔުމެވެ.

ހިސާބަކަށް މަދުމަދުން ގަހެއްގައި ހުދު ކޫޑި ހުރުމަކީ ޖުމްލަކޮށް މައްސަލައެއް ނޫނެވެ. މައްސަލަ އަކަށް ވަނީ އެ ގަހެއްގައި ހުންނަ ހުދު ކޫޑި އެހެން ގަސްގަހަށް ދިއުމާއި އެ ގަހެއްގެ ހެދިބޮޑުވުމަށް އެ ކޫޑިތަކުގެ ސަބަބުން އުނދަގޫވާނަމައެވެ. ނުވަތަ ހުރަސް އެޅޭނަމައެވެ. ނުވަތަ އެހާ ގިނައިން ކޫޑި އަޅާފައި ހުންނަ ނަމައެވެ.

ހުދު ކޫޑި ގަހެއްގައި އަޅައިފިނަމަ، އެގަހެއް، އެހެން ގަސްތަކަކާއި ދުރުކުރެވޭނަމަ، ދުރުކުރުން ވަރަށް މުހިންމެވެ. އެއަށްފަހު ގިނައިން ގަދަ އަވި ދޭ ތަނެއްގައި އެ ގަހެއް ބެހެއްޓިދާނެއެވެ. މިއީ އެއްވެސް އެއްޗެއް ބޭނުން ނުކޮށް ކުރެވިދާނެ ދެ ކަމެކެވެ. ދެން އޮތީ ކޮންމެވެސް އެއްޗެއް ބޭނުން ކުރުމެވެ. ހުދު ކޫޑިއަށް އާންމުކޮށް ބާރުގަދަ ބޭސްތަކެއް ބޭނުން ކުރާކަށް ނުޖެހެއެވެ.

އަހަރެމެންގެ ތެރޭގައި ތަފާތު އެކިކަހަލަ ބާރުގަދަ ކޯލާޓަރާއި ސެނިޓައިޒާސް މިއަދު ބޭނުން ކުރެވެއެވެ. ބޭނުންވަނީ "އަލްކަހޯލް" ގެ ތާސީރެކެވެ. އެހެންކަމުން ރައްކާތެރި ގޮތަކީ އެފަދަ ކޯލާޓަރެއް ނުވަތަ ސެނިޓައިޒާ އެއް ބޭނުން ކުރުމެވެ. ބޭނުން ކުރާނެ ގޮތަކީ، ކަފަކޮޅެއް ކަހަލަ އެއްޗެއް އެއިން ތެންމާލުމަށްފަހު، ސީދާ ކޫޑި ތަކުގައި ހާކާލުމެވެ. މިގޮތަށް ކަން ކުރުމުން ގަހަށް ލިބޭ ގެއްލުން ކުޑަވެ، އަވަހަށް ކޫޑިތައް މަރުވެގެން ދެއެވެ. 

މިގޮތަށް ހައްލު ނުވާނަމަ، ފެނަށް، ހަރު ސައިބޯނި ގިރުވުމަށްފަހު، ގަހުގެ ބުޑަށް ނުދާނޭހެން ކޫޑިތަކަށް ސްޕެރޭ ކުރާށެވެ. ފެން އޮއްސުމަށް ވުރެ ނުވަތަ ފެން ޖެހުމަށްވުރެ މޮޅު އިތުރީ ސްޕްރޭ ކުރުމެވެ. އެހެނީ މިކަމުން ގަހަށް ލިބޭ ގެއްލުން ކުޑަވާނެތީއެވެ. ދެން އޮތީ ހިތިފަތު ތެލެވެ. މިއީވެސް ހުދު ކޫޑިއަށް ބޭނުން ކުރެވިދާނެ އެއްޗެކެޗެ. ކޯލާޓަރާއި ސެނިޓައިޒާ ބޭނުން ކުރި ގޮތަށް ހިތިފަތު ތެޔޮ ބޭނުން ކުރެވިދާނެއެވެ. ހިތިފަތު ތެލުގައި ހުންނަ މާއްދާތަކުގެ ސަބަބުން ހުދު ކޫޑި މަރުވެއެވެ.

މިކަންކަމުން ހައްލު ނުވާނަމަ ދެން އޮތީ ގަހުން ހުދު ކޫޑި ފިލުވުމެވެ. މިކަން ކުރެވޭނީ ބޮޑުވެ ހަރުވެފައި ހުންނަ ގަސްގަހުގައެވެ. މިއީ ހޮޅިއަކުން، ބާރަށް ފެން ޖަހައިގެން ގަހުގައި ހަރުލާފާ ހުންނަ ކޫޑިތައް ފިލުވާލުމެވެ. މިގޮތަށް ފެންޖަހާއިރު، ފަތްތަކާއި އޮފިތަކުގެ ދަށަށް ވާގޮތަށް ޕްރެޝަރުގައި ފެން ޖަހަން ވާނެއެވެ.

ބާރުގަދަ ކެމިކަލެއް ބޭނުން ނުކޮށް ހުދު ކޫޑި ފިލުވާލަން މިއީ ފަސޭހަ މަގުތަކެކެވެ. ގޭ ދޮށުގައި ގަސްހައްދާ ފަރާތްތަކަށް މި ލިޔުމަކީ ފައިދާކުރަނިވި ލިޔުމެއް ކަމުގައި އުންމީދުކުރަމެވެ.