އެކަނިވެރިކަމަކީ ވަރަށް ޒާތެއްގެ އިހުސާސެކެވެ. އެކަނިވެރިކަން އިހުސާސް ނުކުރާ މީހަކަށް އެކަމުގެ ވޭނީ ތަކުލީފު ބުނެދޭކަށް ނޭނގޭނެއެވެ. އެކަނިވެރި މައިންނާއި އެކަނި އުޅޭ މައިންނަކީވެސް ހަގީގަތުގައި އެކަނިވެރިންނެވެ. އެކަނިވެރި މަޔަކާއި އެކަނި އުޅޭ މައެއްގެ ތަފާތަކީ، ހަރަދު ކުރާނޭ މީހަކު ހުރުމާއި ނެތުމެވެ. އެކަނިވެރި މައިންނަކީ އާއްމުކޮށް ބުނާނަމަ، ހުވަފަތްވެފައިވާ، ދަރިން ގޮވައިގެން އުޅޭ އަންހެނުންނެވެ. އެކަނި އުޅޭ މައިންނަކީ، ފިރިމީހާ އާއި ދުރުގައި، ދަރިން ގޮވައިގެން އުޅޭ އަންހެނުންނެވެ. 

އާދޭހެވެ! ސަބަބުތަކެއް ތަރުތީބުވެފައި ހުރުމާއި އެކު، އެކަނި އުޅޭ މައިންނަކީވެސް އެކަނިވެރި ބައެކޭ ބުނަން އެބަ ޖެހެއެވެ. އެކަނި އުޅޭ މައެއްގެ އަތުގައި އެކި ކަންކަމަށް ހަރަދު ކުރާނޭ ފައިސާ، އެ އަންހެނުންގެ ފިރިން ފޮނުވާފާ ހުރެދާނެއެވެ. ނަމަވެސް ގަބޫލުކުރަން ޖެހޭނެ ކަމަކީ ހުރިހާ ކަމަކީ ފައިސާއިން ވާނޭ ކަންކަން ނޫން ކަމެވެ. އެ ހުރިހާ ކަމެއްމެ، އެ އެކަނި އުޅޭ މަންމަ އެ ކުރަނީ އެކަނިވެރި ކަމާއި އެކުގައެވެ.

ފަތިހަށް ހޭލާ، ދަރިންނަށް ގޮވާ ނަގާ، އެދަރިން ތާހިރުކޮށް، ސައި ހަދާ އެދަރިންނަށް ސައި ދެނީ ހަމަ އެކަންޏެވެ. އެދަރިން ސައި ބޮއުމާއި އެކު، ފެންވަރުވާ ސުކޫލަށް ގެންގޮސް ހަދައެވެ. ސުކޫލަށް ލުމަށްފަހު، ގެއަށް އަންނަ މަގުމަތީ ގެއަށް ބޭނުންވާ ބައެއް ސާމާނު ގަނެގެން އާދެއެވެ. ގެއަށް އައިސް އެއްޗެހި ދޮންނަން އަޅާ ގޭތެރެ ކުނި ކަހައެވެ. މޮއްޕުޖަހާ، އެ ދޮއުނު އެއްޗެހި ހިއްކަން އަޅުވައެވެ. މެންދުރަށް ކައްކަންވެސް ކައްކައެވެ.

ކަމަކުން އަވަދިނެތި އުޅެނިކޮށް، ދަރިފުޅު ބަލާދާ ގަޑި ޖެހެނީއެވެ. އޭރު އަދި އުދުން މަތީގައި ނުކެކި ހުރި އެއްޗެއް އެބަހުއްޓެވެ. އެ އުނދުން ނިވާލާފައި ދަރިފުޅު ބަލާ ދާން ޖެހެއެވެ. ދަރިފުޅު ގޮވައިގެން ގެއަށް އައިސް ލުމަށްފަހު، ރޯފިލާފައި ހުރި އެއްޗަކުން މެންދުރުގެ ކެއުން އެ ދަރިއަކަށް ދެއެވެ. ދެން އަނެއްކާ އެ ދަރިއަކު ގޮވައިގެން ޓިއުޝަނަށް ނޫނީ ޤުރުއާން ކުލާހަށް ނޫނީ ކޮންމެވެސް އެހެން ކުލާހަކަށް ދާން ޖެހެއެވެ. މިއީ އެއްމެ ދަރިއެއްގެ ވާހަކައެވެ. މިގޮތަށް ތިން ހަތަރު ދަރިންގެ ކަންކަން ބަލަހައްޓަމުން އެ މަންމަ އެ ގެންދަނީ އެކަންޏެވެ. އެ ދަރިންގެ ބައްޕަ ނެތީކީ ނޫނެވެ. އެދަރިންގެ ބައްޕަ ހަރަދު ނުކުރަނީކީއެއް ނޫނެވެ. ހަމައެކަނި ކައިރީގައި ނެތީއެވެ.

އާދޭހެވެ! އެ ހިސާބުންވެސް އެ މަންމަ އެ ވީ އެކަނިވެރި މަންމަ އަކަށެވެ. އެކަނިވެރި މައެއްގެ ލަގަބު ނުލިބުނެއް ކަމަކު، އެކަނި އުޅޭ އެ މަންމަ އަކީ އެކަނިވެރި މައެކެވެ. އޭ ލޮބުވެތި ފިރިހެނުންނޭ! ތިމާމެންގެ އަނބިންނީ، ތިމާމެންގެ ދަރިންގެ މައިންނީ އެކަނިވެރި ބަޔަކަށް ނުހަދާށެވެ! ތިމާމެން ދުނިޔޭގައި ގަދަވެ ސަލާމަތުން، ކައިވެނިމަތީ ދެމި ތިބޭހާ ހިނދަކު، އެ ކަނބަލުންނަށް އެހާލު ނުޖައްސާށެވެ. ހަރަދުދީ ފައިސާ ދިނަސް އެކަނބަލުންގެ އެކަނިވެރިކަން ފިލައިގެން ނުދެއެވެ. އެކަނިވެރިކަން ފިލާދާހުށީ، އެކުގައި އެކު އެކީ ކައިރީގައި އުޅޭނަމައެވެ.