މުދާވެރިކަމާ ފައިސާވެރި ކަމަކީ އިންސާނުންނަށް ނުހަނު ފައިދާ ހުރި ކަމެކޭ ބުނެވިދާނެއެވެ. ހަމަ އެގަމުން އެއީ އިންސާނާގެ ހަލާކޭވެސް ބުނެވިދާނެއެވެ. ޒަމާނުއްސުރެ ކިޔާތީ އަޑު އިވެއެވެ. އިންސާނާގެ ހިތަކީ ފުރޭނޭ އެއްޗެއް ނޫނެވެ. އާނއެކެވެ! މިއީ ދުވަހަކުވެސް ފުރެނޭ އެއްޗެއް ނޫނެވެ. ލިބުނު ލިބުނުހެން ދެން އަނެއްކާ ބޭނުންވާ މިންވަރު ވަނީ އިތުރެވެ. ގިނައިން ހޯދެން އޮތިއްޔާ އޮތް މަގަކުން އެކަން ކުރުމަށް އިންސާނާގެ ހިތް އިންތިހާއަށް އެދެއެވެ. ހުރިހާވެސް ނުބައެއް ހަދާ އެއްޗަކީ ޝައިޠާނީ ވަސްވާހެވެ. އެ ވަސްވާހަށް ނުހެއްލި ހުރުމަކީ، މުދަލުގެ ޒީނަތުގައި ޖެހިފައިވާ މީހަކަށް އުނދަގޫ ކަމެކެވެ. މުވާއެކު، ވިޔަފާރިވެރިން، އެމީހުންގެ ނަފާ ބޮޑު ކުރުމުގައި ހަމަ ކޮންމެ ގޮތެއްވެސް ވަރިހަމަ ވެދެއެވެ.

ރަމަޟާން މަހަކީ މިފަދަ ފުރުސަތެއް ކަމަށް ގިނަ ވިޔަފާރިވެރިން ދެކެއެވެ. އާދޭހެވެ! ތަކެއްޗަށް އޮންނަ ތަރުހީބު ބޮޑުވުމަކީ އެތަކެތީގެ އަގު އުފުލޭނެ ކަމެއް ކަމުގައި ވިޔަފާރީގެ ގަވާއިދު ބުނެއެވެ. އެހެންކަމުން ރަމަޟާންމަހު ތަކެއްޗަށް އޮންނަ ތަރުހީބު ބޮޑުވުމާއި އެކު މުދަލުގެ އަގުތައް އުފުލެމުން ދެއެވެ. މިއީ ޒަމާނުއްސުރެ ވިޔަފާރީގައި ކަން ހިނގާ އުސޫލެވެ. މިއީ އަދަކު އިއްޔެއަކު ވާ ކަންކަމެއް ނޫނެވެ.

ދަންނާށެވެ! އެބުނާ ވިޔަފާރީގެ ގަވާއިދަކީ ކޮން ބައެއް ހެފި ގަވާއިދެއް ހެއްޔެވެ؟ އެއީ އިންސާނުން އަތުން ލިޔެފައި ހުރި އިންސާނުންގެ ވާހަކަ ތަކެކެވެ. ދެން އަހަރެމެން މުސްލިމުންނަށް ވީ ހިނދު ބަލަން އޮތީ އިލާގީ ގާނޫނެވެ. މާތް ރަސޫލާގެ ސުންނަތެވެ. އެކަލޭގެފާނުގެ އިރުޝާދު ތަކެވެ. މިކަންކަމުން އަދުގެ ވިޔަފާރިވެރިންނަށް މުހިއްމު ވަނީ އިންސާގެ ބަސްމަގެވެ. މިއީ ހިތާމަ ހުރި ކަމެކެވެ.

"މިއޮތީ ރޯދަ މަހެވެ! ވިޔަފާރިވެރިން ހެޔެއް ނެތެވެ!" މިއީ އާއްމުން މިއަދު ދައްކާ ވާހަކައެކެވެ. ދައްކަނީ ކަމެއް ނުވެ އެއް ނޫނެވެ. ބަވަނަވެފައިވާ ތަހުޒީބީ ދުނިޔެއެއްގައި އާއްމުންގެ ލޯތަށް ހުޅުވިފައި ކަންފަތްތައް ތޫނުވާނެއެވެ. އާއްމުން ކަމަކާ ކަންބޮޑުވާނީ ސަބަބުތަކެއް އެކަންކަމުގައި ހުންނާތީއެވެ.

ރަމަޟާން މަހަށް ތަކެތީގެ އަގު އިންތިހާއަށް ބޮޑު ކުރާ ވިޔަފާރިވެރިން އެބަ އުޅެއެވެ. ހަމަ ގަސްތުގައެވެ. ވިޔަފާރީގެ ނަފާ ބޮޑުކޮށް ހޯދާށެވެ. ހީވާ ކަހަލައެވެ! ރަމަޟާން މަހަކީ ވިޔަފާރީގައި ބޮޑު ނަފާ ހޯދާ މައްސަރެކެވެ! އެހެން ހީވާނަމަ އެމީހެއްގެ އީމާންތެރިކަމާ މެދު ސުވާލު އުފެދެއެވެ. އެހެނީ މިއީ އަޅުކަމާއި ހެޔޮ ފޯރުކޮށްދިނުމުގެ މައްސަރެކެވެ. މިއީ އެހީތެރިވުމާއި އޯގާތެރިކަމުގެ މައްސަރެކެވެ.

ވިޔަފާރިވެރިންނޭވެ! ހެޔޮނުވާނެއެވެ! ތަކެތީގެ އަގު އިންތިހާއަށް ބޮޑު ނުކުރާށެވެ! ތިމާމެން ފުދިގެން ތީބީތީ އަނެކާވެސް ހުންނާނީ ފުދިގެން ކަމަށް ނުދެކޭށެވެ! ރަމަޟާން މަހަކީ އަޅުކަމާއި ހެޔޮ ފޯރުކޮށްދިނުމާއި އެހީތެރިކަމުގެ މައްސަރެކެވެ! އެކަން ދަންނާށެވެ! މިއީ ވިޔަފާރިވެރިންނަށް އަންނަ އީދެއް ނޫނެވެ! ރައްޔިތަކަށް ލުއިކަމެއް ކޮށްދިނުމަކީ ފަހަރުގައި މި ދުނިޔޭގައި އޭގެ ފައިދާ މާ ބޮޑަށް ފެނިދާނޭ ކަމަކަށް ނުވެދާނެއެވެ! އެހެނަސް އޭގެ އަޖުރު، އާޚިރުގައި މާ ބޮޑުވާނެއެވެ! އާޚިރަތަށް އީމާންވާ މީހާ އެކަން އެމަގުން ގަބޫލުކޮށް އަމަލުން އެކަން ދައްކާނެއެވެ!

މާތް ﷲ ހުރިހާ ވިޔަފާރިއެއްގައި ބަރަކާތް ލައްވާ، ވިޔަފާރިވެރިންގެ ފަރާތުން ރައްޔިތުންނަށް ލުއިކަމެއް ލިބިދޭފަދަ ގޮތަކަން ކަންކަން ކުރުމުގެ ހެޔޮ ތަޢުފީގު، ވިޔަފާރިވެރިންނަށް މިންވަރު ކުރައްވާށިއެވެ! އާމީން!