"ކިޔަވައިގެން ބަޔަކު އައިސް، މުޅި ގައުމު ހަލާކުކޮށްފިއެވެ!"

ރޯދަމަހަކީ އާއްމުގޮތެއްގައި، ހަވީރުގެ ވަގުތު، ފިނި ބުރެއް ޖަހާލަން ނުކުމެލާ އުޅޭ މަހެކެވެ. ނުވަތަ އަތިރިމައްޗަށް ފިނިކޮށްލަން ނުކުމެ ތިބޭ މަހެކެވެ. ހާއްސަކޮށް ފިރިހެންވެރިންނެވެ. މިގޮތުން، މިއަހަރުގެ  ރޯދަ މަހު އެއްދުވަހު ހަވީރު ފިންޏަށް، އަތިރިމަތީ ފިނިއަށިގަނޑެއްގައި އިން އުމުރުން ދުވަސްވީ މީހެއްގެ ގާތުގައި ގޮސް އިށީނދެލީމެވެ. އެ ބޭބެ ގެ އުމުރު އުޅޭނީ 65 އަހަރުން މަތީގައި ކަމަށް ބެލެވެއެވެ. އެއީ ރަށުގެ އިސް ރަށްވެއްސެކެވެ. އަދި ސަރުކާރުގެ އިނާޔަތްވެސް ލިބޭ ބޭބެއެކެވެ.

"ކިޔަވައިގެން ބަޔަކު އައިސް، މުޅި ގައުމު ހަލާކުކޮށްފި!" ކައިރީގައި ރޭޑިއޯ ބަހައްޓައިގެން އިން އެ ބޭބެ ބުންޏެވެ. ދެން އިރުކޮޅަކު، އެ ބުނި އެއްޗަކަށް ވިސްނާލަން އިނީމެވެ. ދޮގެއްވާ ނޫނެވެ! ބަޔަކު ކިޔަވައިގެން އައިސް ހަމަ ގައުމު ހަލާކު ކުރަނީއެވެ. ދެން ކޮންމެއަކަސް މި ވާހަކަ މާ ޝައުގުވެރި ވާހަކަ އަކަށްވެގެން އެ ބޭބެއާ ވާހަކަ އަޅުވާލީމެވެ.

މީގެ ކުރިން، ބޭރު ކަރަތަކަށް ގޮސް ކިޔަވައިގެން އަންނަނީ ދިވެހިންގެ މަދު ބައެކެވެ. އޭރު ގައުމުގައި މިއަދު މި އޮތް ކަހަލަ ހަމަނުޖެހުމެއް ބައިބައިވުމެއް ނެތެވެ.

އަދާއި އިއްޔެވެސް ގައުމުގައި ކުށްވެރިން އުޅެއެވެ. އެކަމަކު އިޖްތިމާޢީ ފޭރާން އެއްކޮށް ވީދި ގައުމު މިއަދު މި އޮތް ހާލަތެއްތާ ދޯއެވެ. މި ހާލަތުގެ ޒިންމާ ނަގާނީ ކޮން ބައެއް ހެއްޔެވެ. 

ގައުމުގައި ސިޔާސީ މީހުންނޭ ކިޔައިގެން އުޅޭ ގިނަ މީހުންގެ ތައުލީމީ ފެންވަރެއް ހިސާބަކަށް އެބަ ހުއްޓޭ ދެންނެވިދާނެއެވެ. ބޭރު ކަރަތަކުން މޮޅަށް ކިޔަވައިގެން އައިސް ތިބި މީހުން މިކަން ކަމުގައި އިސްކޮށް އުޅެއެވެ. އަމާޒަކީ ގައުމު އިސްލާހުކޮށް ހަމަ މަގަށް އެޅުވުން ކަމުގައި އެމީހުން ބުނެއެވެ. ނަމަވެސް އަމާޒުގައި ސާބިތު އެކަކުވެސް ނެތެވެ. އިސްލާހުކޮށް ހަމަ މަގުން ހިނގަން ކަމަށް ބުނެ އަޅާ ފިޔަވަޅުތަކުގެ ސަަބަބުން ނެތި ދަނީ އެކުވެރިކަމާއި އެއްބައިވަންތަ ކަމެވެ. ބޭރުކަރަތަކުން ސަނަދުތައް ނަގައިގެން ދަސްކޮށްގެން މި އައީ އަމިއްލަ އެދުން އިސްކުރަން ބާއޭ ހިތަށް އަރައެވެ.

"ކިޔެވި ކިޔެވީނުން ކާފަރުވާނޭ ބުނި ޒަމާން މިއޮތީ އައިސްފަ! ކޮއްކޮމެން ކިޔެވިޔަސް އެމީހުން އެ އުޅޭހެން މުޑުދާރުކޮށް ނޫޅޭތި!" އެ ބޭބެ މިހެން ބުނުމުން އަނެއްކާ މިކަމާވެސް ވިސްނާލެވުނެވެ. އާދޭހެވެ! ކިޔަވަނީ ކޮން ބޭނުމަކު ހެއްޔެވެ؟ އިލްމުގައި ވާދަކޮށް ކުރި އެރުން އޮތީ އަނިޔާވެރިކަމާއި ހަސަދައާއި ނަފްރަތުގެ ބޭނުންކޮށްގެނެއް ނޫނެވެ. އަދި މޮޅަށް ކިޔެވިފައި ހުރުމަކީ ބޮޑާވެ ހަސަދަވެރިވާންވީ ކަމެއްވެސް ނޫނެވެ. ތިމާއަށް ގިނަ އެއްޗެހި އެނގިފައި ހުންނަ ކަމީ ތިމާގެ ނިކަމެތިކަން ހަނދާން ކުރަންޖެހޭނޭ ކަމެކެވެ. 

އާދޭހެވެ! ކިޔެވުމުގެ ބޭނުން މުޅިންހެން މިއަދު އޮޅިއްޖެއެވެ. ކިޔަވައިގެން އައިސް، އަޑުގަދަކުރާތައް ބޭނުންކޮށްގެން ދެމުންދާ ތަގުރީރުތަކުގައި އޮތީ ރުޅިވެރިކަމާއި ހަސަދަވެރިކަމެވެ. ވާދަ ކުރުމުގައި އިސްކުރާ އަޑަކީ ޣީބަ ބުނުމާއި ނެތިމޮށުމާއި ދޮގުހެދުމުގެ އަޑުތަކެވެ. ފާޅުގައި ގިނަ ބައެއްގެ ކުރިމަތީގައި ބޮޑެތި ދޮގުތައް ހަދަމުން ދަނީ އެއްވެސް ޖެހިލުމެއް ނެތިއެވެ. ހައްތަހާވެސް ކިޔަވައިގެން ތިބި ބޮޑެތި މީހުންނެވެ. ނަމުން އިއްޒަތްތެރި އަދި ތަންދޮރުވެސް އެނގޭ މީހުންނެވެ. މި މީސްމީހުނަށް މިތިބީ ކިހިނެއް ވެފާބާއެވެ؟

އުމުރުން ދޮށީ ބޭބެއަކު ރެޑިއޯ ދޮށުގައި އިނދެފައި ދައްކަން މި ފެށީ ވަރަށްވެސް ބޮޑު ވާހަކައެކެވެ. ގައުމުގެ ހާލަތެވެ. މި ހާލަތައް ގައުމު ދިޔައީ ހަމަ ކިޔަވައިގެން ތިބި މީހުން ކުރާ ކަންކަމުންނެވެ. އެއީ ތެދެކެވެ. މިއަދު އެންމެ ބޮޑެތި ވައްކަން މި ކުރަނީވެސް ހަމަ ކިޔަވައިގެން ތިބި މީހުންނެވެ. މުޖުތަމައުގެ ހަމަޖެހުމާއި އަދުލު އިންސާފު ނަގާލަމުން ދަނީވެސް އިލްމީ ބޭބޭފުޅުންނެވެ. ގައުމުގެ އިގްތިޞާދާ އިޖްތިމާއީ ގުޅުންތަކާއި، ދީނީ އެއްބައިވަންތަކަންވެސް ފުނޑުފުނޑުވަމުން ދަނީ ހަމަ ކިޔަވައިގެން ތިބި މީހުންގެ އަމަލުތަކާއި ބަސްތަކުގެ ސަބަބުންނެވެ. އެ ބޭބެ ބުންޏެއްކަމަކު އެއީ ހަމަ ތެދު ވާހަކައެކެވެ.