އާމްދަނީ ހޯދުމުގައި އެކި މީހުން ކުރަނީ އެކި މަސައްކަތެވެ. ތަފާތު އެކި ދާއިރާތަކުން ތަފާތު މަސައްކަތްތަކެވެ. އަހަރެމެން މުސްލިމުންނަށް ވީ ހިނދު، ކުރާ ކޮންމެ މަސައްކަތަކުން ހޯދަން މި ޖެހެނީ ހަލާލު އާމްދަނީއެވެ. ހަލާލު ފައިސާއެވެ. ފައިސާއެއް ހަލާލު ވުމުގައި އޮތް އެއްމެ މުހިއްމު އަދި އެއްމެ އަސާސީ ކަމަކީ އެ ފައިސާއެއް ހޯދަން، އެމީހަކު ކުރާ މަސައްކަތް ހަލާލުވުމެވެ. އަދި މަސައްކަތެއް ހަލާލު ވުމުގައިވެސް އެ މަސައްކަތުގެ އަސްލާއި މަގުޞަދާއި ނިޔަތަކީވެސް ވަރަށް މުހިއްމު އެއްޗެކެވެ.

އާދޭހެވެ! ހަލާލު ގޮތުގައި ލިބޭ، ކިތައްމެ ކުޑަނަމަވެސް އާމްދަނީ އަކީ، ހަރާމް ގޮތުގައި ހޯދާ ބޮޑު އާމްދަނީއަކަށްވުރެ، އެތައް ގުނައަކުން މަންފާ ކުރަނިވި އެއްޗެކެވެ. މިތަނުގައި ބޭނުންވަނީ އަދަދެއް ނޫނެވެ. ހޯދާ ގޮތެވެ. އާމްދަނީ ހޯދުމުގައި ހަލާލު މަސައްކަތް ކުރާ ގިނަ މީހުން ތިބެނީ މުޖުތަމައުގެ މެދުފަންތިއާއި ދަށްފަންތީގެ މީހުންގެ ލިސްޓުގައެވެ. ހަލާލު މަސައްކަތުން ހަލާލު އާމްދަނީ ހޯދާ މަދު ބަޔަކު، މުއްސަނދި ނުވާ ވާހަކައެއް ނޫނެވެ.

ޒަމާން ކުރުހި ކުލަޖެހެމުން މިދާ ގޮތުން، މުއްސަނދިކަމާއި ތަނަވަސްކަމަށް ވާސިލްވުމަށް ވަރަށް ބުރަ މަސައްކަތްތަކެއް ކުރަން ޖެހެއެވެ. އެއްގޮތަކީ ލިބޭ ހަލާލު އާމްދަނީ ފުއްދާލައިގެން، ހިތުގެ ތަނަވަސްކަންމަތީ ހިތް ފުރާލައިގެން ތިބުމެވެ. އަނެއްގޮތަކީ އެގޮތް މިގޮތުން، ހަރާމެއް ހަލާލެއް ނުބަލާ މުދަލާ ފައިސާ ހޯދާ، މާލީގޮތުން ތަނަވަސް މީހަކަށް ވުމެވެ. މިދެންނެވި ފަހު ގޮތަކީ ފަހަރުގައި މާ ބުރަ ގޮތަކަށް ނުވެއެވެ. ނަމަވެސް ބުރަވަނީ އާޚިރަތުގައި ކަން އެބައިމީހުން ހަނދާން ނައްތާލައެވެ.

ހަރާމް ގޮތުގައި ހޯދާ އެއްވެސް މުދަލަކުން އަދި ފައިސާއަކުން ކުރާނޭ ހަމަ އެއްވެސް ފައިދާއެއް ނޯންނާނެއެވެ. އާނއެކެވެ! ފަހަރުގައި ދުނިޔެ މަތީގައި މީރު ކާ އެއްޗެހި ކެވިދާނެއެވެ. މޮޅު އަންނައުނު ލާ، އުސް އިމާރާތްތަކުގައި އުޅެވިދާނެއެވެ. ދެން ވިސްނަންވީ މިއީ ފައިދާއެއް ތޯއެވެ؟ އާނއެކެވެ! ދުނިޔެވީ އެދުމައިގެން އުޅޭ މީހަކަށް މިއީ ވަރަށްވެސް ގިނަގުނަ ފައިދާ ތަކެކެވެ. ނަމަވެސް އާޚިރަތް އެދޭ މީހަކަށް މިއީ އެއްވެސް ފައިދާ ހުރި ކަމެެއް ނޫނެވެ.

ހަރާމް ގޮތުގައި ހޯދާ ފައިސާއިން، ތަކެތި ގަނެ، ކައި ބޮއެ އުޅޭ ކަމުގައި ވަނީނަމަ، އެ ތަކެތި ކެއުމުން ހަށިގަނޑުގައި ޖަހާ މަހަކީ ސީދާ ނަރަކައިގެ ބައެއް ކަމުގައި ދީނީ ޢިލްމުވެރިން ވިދާޅުވެއެވެ. އަދި ހަރާމް ގޮތުގައި ހޯދާ ފައިސާއިން ގަންނަ ގެދޮރާއި އަންނައުނަކީވެސް ނަރަކައިގެ ތަކެތި ކަމުގައިވެސް ބުނެވެއެވެ. އީމާންތެރިކަމެއް ނެތް މީހާ، މިކަންކަން ގަބޫލު ކުރުމުގެ ޝައުގެއް ނުހުންނާނެއެވެ.

އާދޭހެވެ! ކަން އޮތީ މިހެން ކަމުން، ހަރާމް ގޮތުގައި ހޯދާ ބޮޑު އާމްދަނީއަކަށްވުރެ، ހަލާލު ގޮތުގައި ލިބޭ ކުޑަކުޑަ އާމްދަނީ އަކީ، މާތް ﷲ ގެ ހަޟްރަތުގައި މާ ހެޔޮކަން ބޮޑު އެއްޗެކެވެ.