އިންސާނުން އެކަކު އަނެކަކާއި ދެމެދު އޮންނަ ގުޅުންތަކަކީ އިންސާނެެއްގެ ހަޔާތުގައި ވަރަށް މުހިއްމު ގުޅުން ތަކެކެވެ. ބައެއް ގުޅުންތަކަކީ އިންސާނާ ދުނިޔެއަށް އަންނަ އިރު، ޠަބައީ ގޮތުން އުފެދިފައިވާ ގުޅުންތަކެކެވެ. މިއީ ރަހިމުގެ ގުޅުންތަކެވެ. މީގެ އިތުރުން އިންސާނާ ދުނިޔޭގައި އުޅެމުންދާއިރު، ތަފާތި އެކި މީހުންނާއި އެކު ތަފާތު އެކި ގުޅުންތައް ދަނީ ގާއިމު ކުރަމުންނެވެ. މިކަމުގައި ހަނދާން ކުރަންޖެހޭ ވަރައް މުހިއްމު ކަމެއް ވެއެވެ. އެއީ އެއްވެސް ގުޅުމަކަށް އެދި އާދޭސްކުރަން ނުހަދާށެވެ.

ގިނަފަހަރަށް ގުޅުމެއްގެ މައްޗަށް އާދޭސް ކުރެވެނީ އެ ގުޅުމަކަށް އެ އިންސާނެއްގެ ހިތް އެދޭލެއް ބޮޑުކަމުންނެވެ. ބައެއްފަހަރަށް އެފަދަ ގުޅުންތަކަށް ފުރުސަތު ހޯދަން މަޖުބޫރުވަނީ އެވެނި މިވެނި ކަމެއް ހާސިލް ކުރުމަށް އެ ގުޅުމެެއްގެ ބޭނުން ކުރެވޭތީއެވެ. އަނެއްބައިފަހަރަށް ހިތުގައި އުފެދިފައިވާ ޖަޒުބާތީ އިހުސާސްތަކެއްގެ ސަބަބުންނެވެ. ކޮންމެ ހާލަތެއްގައި ވިޔަސް، އެއްވެސް ގުޅުމެއް ބިނާކުރުމަށް އާދޭސް ކުރުމަކީ ރަނގަޅު ކަމެއް ނޫނެވެ. އެކަމުގެ ނަތީޖާ ފޮންޏެއް ނުވާނެއެވެ.

ގުޅުމެއް ބިނާކުރުމަށް އެދި އާދޭސް ކުރެވޭނަމަ، އެކަމުގައި އާދޭސް ކުރާ މީހާގެ މިޒާޖު ނިކަމެތިވާނެއެވެ. ދެން އެކަމުގައި އެ މީހަކު ތަކުރާރުކޮށް އަބަދުމެ އުޅެން ވެއްޖެނަމަ، އެ ނިކަމެތި މިޒާޖު، މުޅި މީހާގެ ގައިގާ ހަރުލާނެއެވެ. ނަތީޖާއަކަށް ވާނީ އަމިއްލަ ނަފްސުގެ އިތުބާރު ގެއްލުމާއި ހާސްކަމާއި ނުތަނަވަސްކަމުގެ ތެރެއަށް މީހާ ގެނބިގެން ދިއުމެވެ.

އެއްވެސް ގުޅުމެއް ބިނާ ކުރުމަށް އާދޭސް ކުރަން ޖެހިއްޖެނަމަ ދަންނާށެވެ. އެ ގުޅުމުގެ އަނެއް ބައިވެެރިޔާ، އެ ގުޅުމަކަށް މަރުހަބާއެއް ނުކިޔާނެއެވެ. އެފަދަ އާދޭހަކުން ބިނާކުރާ ގުޅުންތަކުގައި ހަރުދަނާ ކަމެއް ނުހުންނާނެއެވެ. އަބަދުވެސް ޖެހޭނީ އާދޭސްކޮށްކޮށް ތިބޭށެވެ. އާދޭސް ކުރާ މީހާގެ މައްޗަށް، އާދޭސް ކުރެވުނު މީހާގެ ބަސް ގަދަވެފައި ބާރު ގަދަވާނެއެވެ. އަބަދުވެސް އޮންނާނީ އެމީހަކު ބޭނުންވި ގޮތެކެވެ. އާާދޭސް ކުރި މީހާ ޖެހޭނީ، އޭނާ ބުނި ކަމެއް ބުނި ގޮތަކަށް ކުރާށެވެ. މިއީ އެއްވެސް ގުޅުމެއް ބިނާވެގެންވާނޭ ގޮތެއް ނޫނެވެ.

އާދޭސް ކުރެވޭ ހާލުގައި އެ ގުޅުމެއް ބިނާ ނުވެ ހިނގައްޖެނަމަ، އެކަމުގައި އާދޭސް ކުރި މީހާގެ މާޔޫސްކަން އިންތިހާއަށް ބޮޑުވާނެއެވެ. ދުނިޔެ މަތިން ފޫހިވެ، ހަގީގީ ވަފާތެރިންނަށް އޮންނަ އިތުބާރު ގެއްލި ދާނެއެވެ. އެކަނިވެރިކަމަށް ލޯބި ކުރުމާއި އެކު ނަފްސާނީ ބަލިކަށި ކަމަކަށް ހުށަހެޅިގެން ހިނގައިދެއެވެ.

އާދޭހެވެ! ކަން އޮތީ މިހެން ކަމުން އެއްވެސް ގުޅުމެއް ބިނާ ކުރުމަށް އާދޭސް ކުރަން ނުހަދާށެވެ. ގުޅުމެއް ބިނާވުމުގައި ދެމީހުންގެ ފުރިހަމަ އިހްތިޔާރު އޮންނަން ވާނެއެވެ. އާދޭސް ކުރުމަކުން އުފެދޭ ގުޅުންތަކުގައި ދޭނީ އަބަދުވެސް ހިތި ރަހައެވެ. އެކަން ތިބާގެ މުޅި ހަޔާތުގައި ނުފިލާނެ ލަކުނަކަށް ވެދާނެއެވެ.