ދުނިޔޭގައިވާ ދިރުންތަކުގެ ތެރެއިން ވެލައަކީ އެސޮރުގެ ދިރިއުޅުމުގައި އަޖައިބުތަކެއް އެކުލެވޭ ޖަނަވާރެކެވެ. އެސޮރުގެ ހަޔާތް އެއްކޮށް ކަހަލަ ގޮތަކަށް މޫދުގައި އުޅުނެއް ކަމަކު، އެސޮރު ނޭވާ ލަނީ އެއްގަމަށް ނުވަތަ ވައިގެ ތެރެއަށެެވެ. އަދި އެސޮރު ބިސްއަޅަނީވެސް އެއްގަމަށެވެ. މި ތަފާތު ދިރިއުޅުމުގައި ވެލައަކީ އޭގެ ނޭވާ ދިގު އެއްޗެކެވެ. އެއްގަމަށް ނޭވާލުމަށްފަހު، މޫދުގެ ލޮނުގަނޑު ތެރޭގައި އެތައް އިރެއް އެސޮރު ހޭދަކުރަނީ ނޭވާ ނުލައެވެ. މިކަމުގައި ފޮރުވިފައިވާ އެތައް ސިއްރުތަކެއް ވެއެވެ.

ފުރަތަމައީ އެސޮރުގެ ނޭވާލާ ނިޒާމު އުފެދިފައިވާ ގޮތެވެ. އެސޮރުގެ ނޭވާލާ ނިޒާމު އުފެދިފައިވާ ގޮތުން ގިނަ އަދަދެއްގެ ވައި އެސޮރުގެ ފުއްޕާމޭގެ ތެރޭގައި ހަރުލައްވައެވެ. އަދި ފުރާނާލައިގެން ކާބަންޑައިއޮކްސައިޑް ބޭރުކޮށް އަނެއްކާ އައު ނޭވާތަކަކުން އޮކްސިޖަން ޖަމާކޮށްފައި ބެހެއްޓުމުގެ ގާބިލުކަން ވެލާގެ ފުއްޕާމޭގައި ހުރެއެވެ.

ވެލާގެ ފުއްޕާމޭގެ ފަރުމާއާއި މަސައްކަތުގެ އިތުރުން އެސޮރުގެ މުޅި ހަށިގަނޑުގެ މަސައްކަތްތަކެއްގެ ސަބަބުން ގިނައިރު ނޭވާ ނުލާ ހުރެވޭގޮތް މެދުވެރިވެއެވެ. އެގޮތުން އެސޮރުގެ ހަށިގަނޑު އުފެދިފައިވާ ގޮތުން، މޫދުގެ އަޑީގައި އޮންނަ އިރު، އެސޮރުގެ ހަށިގަނޑު ވަރަށް ބޮޑަށް ފިނިކޮށްދެއެވެ. ނަތީޖާއަކަށް ވަނީ އެސޮރުގެ ހަށިގަނޑުގައި ހިނގާ މެޓަބޯލިކް ހަރަކާތްތައް މަދުވުމެވެ. މެޓަބޯލިކް ހަރަކާތްތަކަކީ އެކަމަށް އޮކްސިޖަން ބޭނުންވާނޭ ހަރަކާތްތަކެކެވެ. އެހެންކަމުން، އެ މަސައްކަތްތައް މަދުވުމުން، އޮކްސިޖަން ބޭނުން ކުރެވޭ މިންވަރު މަދުވާނެއެވެ. ނަތީޖާއަކަށްވަނީ ގިނައިރު އޮކްސިޖަން ހިފެހެއްޓިފައި ހުރުމެވެ.

ވެލާގެ ހިތުގެ ވިންދުވެސް މޫދުގެ ލޮނުގަނޑުގެ ތެރޭގައި އެސޮރު އުޅޭ އިރު މަދުވާނެއެވެ. މާނައަކީ ލޭގެ ތެރޭގައި ދައުރު ކުރާނެ އޮކްސިޖަންގެ މިންވަރު މަދުވާނެއެވެ. އެގޮތަށް ލޭގެ ތެރޭގައި ދައުރުވާ އޮކްސިޖަން މަދުވުމުގެ ސަބަބުން ފުއްޕާމޭގައި ހުންނަ އޮކްސިޖަން ހުސްވުމުގެ ވަގުތު އިތުރުވެގެން ދެއެވެ. މިގޮތަށް ލޭގެ ތެރޭގައި އޮކްސިޖަން މަދުވެ، ކުރިން ދެންނެވި ފަދައިން މެޓަބޯލިޒަމް ގެ ހަރަކާތަތައް މަދުވުމުން، މޫދުގެ ލޮނުގަނޑު ތެރޭގައި ވެލާ އޮންނަ އިރު، އެސޮރުގެ ހަށިގަނޑުގެ ބައެއް ގުނަވަންތައް މަސައްކަތެއް ނުކުރާނެއެވެ. ދިރާސާވެރިން ދެކިލައްވާ ގޮތުގައި އަސާސީ ގުނަންތަސް ނޫން އެތެރެހަށީގެ ގުނަންތަކުގެ މަސައްކަތް ހުއްޓޭނެއެވެ. އެހެންކަމުގައި ވަނީނަމަ، އެ ގުނަންތަކަށް އޮކްސިޖަން ބޭނުމެއް ނުވާނެއެވެ. މިއީވެސް އެސޮރުގެ ހަށިގަނޑުގައި އޮކްސިޖަން ގިނައިރު ހިފަހައްޓައިދޭ ސަބަބެކެވެ.

މިކަންކަމުން އަހަރެެމެން އިންސާނުންނަށް އެނގި ހާމަވަނީ މާތް ﷲ ގެ ކުޅަދުންވަންތަ ކަމާއި އެ އިލާހުގެ ހަލްޤުކުރެއްވުން ފުރިހަމަ ކަމެވެ. މިއިން ހަމަ ކޮންމެ ކަމަކާއި މެދު ވިސްނައިފި މީހަކަށް އެތައް އިބުރަތެއް ލިބޭނޭކަން ކަށަވަރެވެ.