ރޯދަމަހަކީ އެހެން މަސްމަހާއި ހުރިހާ ގޮތަކުންވެސް ތަފާތު މަހެކޭ ބުނެވިދާނެއެވެ. އިންސާނާގެ އުޅުމާ ގުޅުމާއި އަދި އިންސާނާ ބޭނުންކުރާ ތަކެއްޗާއި ކުރާ ކަންކަންވެސް ތަފާތެވެ. ރޯދަމަހަކީ ކަރަންޓުގެ ބޭނުން އަހަރެމެން އިންތިހާއަށް ކުރާ މަހެކެވެ. ފަހަރުގައި އެކަން އިހުސާސްނުވެ ހިނގައިދާނެއެވެ. ރޯދަމަހާއި ދިމާކޮށް ހަމަ ކޮންމެ އަހަރަކުވެސް ކަރަންޓުބިލުތައް ބޮޑުވާ ވާހަކައަކީ އަހަރެމެން ދައްކާ ވާހަކައެކެވެ. އެހެންވަނީ، ހަމަ ކަރަންޓު ބޭނުން ކުރެވޭލެއް ގިނަ ކަމުންނެވެ.

ރޯދަމަހާއި ދިމާކޮށް، ކޮންމެ ގެއެއްގެ ކަރަންޓު މީޓަރު، ނުބައިކޮށް އެނބުރެނީ ހެއްޔެވެ؟ ރީޑިން ނަގަން އަންނަ މީހުން، ނުބައިކޮށް އަދަދު ޖަހަނީ ހެއްޔެވެ؟ އޮޓަމެޓިކް ޖެނެރޭޓިވް ސިސްޓަމަކުން ހަދާ އެ ކަރަންޓު ބިލުތައްވެސް ރޯދަމަހާ ދިމާވާ ކަރަންޓުބިލު، "އޮޓަމެޓިކުން" ބޮޑު ކޮށްލަނީ ހެއްޔެވެ؟ މިވާގޮތެއް އަދި މުޅިއަކުން ސާފެއް ނުވެއެވެ.

ކަރަންޓުބިލު ބޮޑު ވުމަކީ އެއީ އެ ބިލުދައްކަން ޖެހޭ ހަމަ ކޮންމެ މީހަކުވެސް އެކަމާ ކަންބޮޑުވާނެ ކަމެކެވެ. އެކަމާ ދެބަސްވުމެއް ނެތެވެ. ނަމަވެސް އެ ބިލު ބޮޑުވާ ކޮންމެ ފަހަރަކު، އެ ބިލު ހަދާ ބަޔަކާ ދިމާލަށް އަހަރެމެން އިނގިލިދިއްކުރުމުގެ ކުރިން އިހަށް ވިސްނާލުން ކީއްވާނެތޯއެވެ؟ ވޭތުވެ ދިޔަ ދުވަސްތަކުގައި އަހަރެމެންނަށް ކަރަންޓު ބޭނުން ކުރެވުނީ ކިހާވަރަކަށްތޯ ކުޑަކޮށް ނަމަވެސް ވިސްނާލާށެވެ. ކުރިން މާ ގިނައިރު ނުދިއްލާ ބޮތްކެއް، ނުވަތަ ކުރިން މާ ގިނައިރު ނުޖަހާ ފަންކާއެއް ނުޖައްސާ އޭސީއެއް މި ފަހަކުން މާ ގިނައިން ޖެއްސުނުތޯ ވިސްނާލާށެވެ. ކުރިން އަވަނުގައި ފިހާ އެއްޗެއްސާ މި ފަހުން އަވަނުގައި ފިހުނު އެެއްޗެއްސާމެދު ވިސްނާލާށެވެ. މިފަދަ ކިތައްމެ ނަޒަރަކުން ވިސްނާލުމުން ކަރަންޓު ގިނައިން ބޭނުން ކުރެވުނުކަން އެނގޭނެެއެވެ. ނަމަވެސް ވިސްނުމެއްނެތި ބަސްބުނުމުން، މިފަދަ ކަންކަން މަތިން ހަނދާނެއް ނުހުންނާނެއެވެ.

މިދުވަސްކޮޅަކީ ރާއްޖެއަށް ހޫނު ދުވަސްވަރެއްކަންވެސް އަހަރެމެން އެންމެނަށް އެބަ އެނގެއެވެ. ކަންމިހެން ހުރިއިރު އޭސީތަކާއި ފަންކާތައް ގިނައިން ބޭނުން ނުކުރެވޭނެ ހެއްޔެވެ؟ ލާ އަންނައުނު އަވަހަށް ދައުވެ، ގިނައިން ދޮންނަން ނުޖެހޭނެ ހެެއްޔެވެ؟ މީހާ ގިނައިން ދާހިއްލާ، ގިނައިން ފެންވަރަން ނުޖެހޭނެ ހެެެއްޔެވެ؟ އަވިބާރުކަމުން ގެއިން ނުނިކުމެ، ގޭތެރޭގައި ކޮންމެވެސް ކަރަންޓެއްގެ ދަށުގައި ގިނައިރު ނުތިބެވޭ ހެެއްޔެވެ؟ ރޯދަމަހާއި ދިމާވުމުން، އެހެންޏާ ދުވާލު ގިނަވަގުތު ކޮފީތަކުގައި، ކެފޭތަކުގައި ހޭދަކުރި ނަމަވެސް، ރޯދަމަސްކަމުން އެ ވަގުތުތަށް އަދި ކިއެއް ދެންވެސް ހުރި ގިނަވަގުތެއް ހޭދަކުރެވެނީ ގޭގާ ނޫން ހެއްޔެވެ؟ އޮފީސްތަކާއި މަސައްކަތު މާހައުލުގައި ހޭދަކުރާ ވަގުތު މަދުވުމާއި އެކުވެސް ގޭގައި ހޭދަކުރާ ވަގުތު އިތުރު ނުވޭ ހެއްޔެވެ؟ ހައްތަހާވެސް ސަބަބުތަކެވެ. ގިނައިން ކަރަންޓު ބޭނުން ކުރެވިދާނޭ ސަބަބުތަކެވެ. 

ކަންމިހެން ހުރުމާއި އެކު، ކަރަންޓުބިލު ބޮޑުވަނީ ހަމަ ކަރަންޓު ބޭނުން ކުރެވޭލެއް ގިނަކަމުންކަން ގަބޫލުކުރައްވާށެވެ. ފަހަރުގައި ގޯހެއް ހެދިފައި ނުހުންނާނެ ވާހަކައެއް ނޫނެވެ. އެހެނަސް ގިނައިން ބޭނުން ކުރެވޭކަން ގަބޫލުކުރައްވާށެވެ. ބަޔަކު ބަދުނާމުކޮށް، ބަޔަކަށް ތުހުމަތުތަކެއްގެ އިނގިލި ދިއްކުރުމުގެ ކުރިން، ހަގީގަތަށް ވިސްނާލާށެވެ. އާނއެކެވެ! ކަރަންޓުބިލު ބޮޑުވަނީ ހަމަ ކަރަންޓު ބޭނުންކުރެވޭލެެއް ގިނަ ކަމުންމެވެ!