ދުނިޔޭގައި ހިނގާ ކަންކަމުގެ ތެރޭގައި އާއްމުވެ ހިނގާ ބައެއް އާދަޔާހިލާފު ކަންކަން ހުރެއެވެ. އެގޮތުން ވިއްސާރަ ވިލާ އުފެދިފައި ހުންނަ އިރު، އެ ވިލާތަކުގެ ތެރެއިން ވިދުން އުފެދޭ ގޮތަކީ މިފަދަ އަޖައިބު ކުރުވަނިވި ކަމެކެވެ. ވިއްސާރަ ވިލާތަކަކީ ފެނުގެ ވިލާތަކެއް ކަމުގައި ވީ ހިނދު އެ ވިލާތަކުން ވިދުން ނުވަތަ އަލިކަމެއް އުފެދިގެންދާ ގޮތާމެދު ހިޔާލުކޮށްލުން ކީއްތޯއެވެ!

ޖައްވުގައި ހުންނަ ކަރަންޓުގެ ހަކަތަތައް އެއްވެ ޖަމާވުމުން އުފެދޭ ވިދުމަކީ އޭގައި އަލިކަމެއް އެކުލެވިގެންވާ ކަމެކެވެ. މިގޮތަށް މިކަން ހިނގާނީ ހަމައެކަނި ވިއްސާރަ ވިލާގަނޑުތަކުގައެވެ. އެ ވިލާގަނޑެއްގައި ފެން ނުވަތަ އައިސް އަދި އެހެން ގިނަ "މާއްދާތަކުން" މުއްސަނދިވެފައިވާ ވިލާގަނޑުތަކުގައެވެ.

ވިއްސާރަ ވިލާގަނޑެއް އުފެދި، ވަރުގަދަވަމުންދާ ވަރަކަށް އެ ވިލާގަނޑެއްގެ ތެރޭގައި ހުންނަ ފެން ނުވަތަ އައިސްތަކުގެ މޮލިކިއުލްތަކުގެ ހަރަކާތްތެރިކަން އިތުރުވާން ފަށައެވެ. އަދި އެކަތި އަނެކައްޗާ ޖެހި މުޑިއެރުންތަކާއި ފުށުއެރުންތައް ގިނަވެއެވެ. މި "ގަޑުބަޑުގެ" ތެރޭގައި ވިލާގަނޑުގައި ހަކަތަ ތަކެއް އުފެދެއެވެ. އެގޮތުން އުފެދޭ ފައްސި ހަކަތަ ކިޔަމަންކުރަނީ ވިލާގަނޑުގެ މަތީބައެވެ. އަދި އުފެދޭ ނައްސި ހަކަތަ ކިޔަމަންކުރަނީ ވިލާގަނޑުގެ ތިރީބައެވެ.

ހަކަތައިގެ ނައްސި ބަޔާއި ފައްސި ބައިގެ ބާރުގަދަވެ، އުފެދޭ ކަރަންޓުގެ ބާރުވެސް ގަދަވުމާއި އެކު، ވިލާގަނޑާއި ވައިގެ ތެރޭގައިވާ "އިންސިއުލޭށަން" ފަށަލަ ފޫއަޅުވާލާ މި ކަރަންޓު ޖައްވުގެ ތެރެއަށް ދޫވެއެވެ. މި ކަރަންޓު މިގޮތަށް ބޭރުވެގެންދާ ދިއުން ފެންނަނީ ވިދުވަރުގެ ރޮނގު ކުރުހެމުންދާ ސިފައިގައެވެ. މިގޮތަށް ވައިގެ ތެރެއިން މި ކަރަންޓު މިހެން ދަތުރުކުރާއިރު، ވައިގެ ޒައްރާތައް "އަޔޮނައިސް" ކުރުވައެވެ. މިގޮތަށް ވައިގެ ޒައްރާތައް "އަޔޮނައިސް" ވާއިރު، އަލިކަމެއް އެއިން އުފެދެއެވެ.

ވިދުމާއި އެކު އުފެދޭ ކަރަންޓު، ވިދުވަރުގެ ރޮނގު އަޅަމުން ވައިގެ ޒައްރާތައް "އަޔޮނައިސް" ކުރަމުން އެދާ ހަލުއި ދުވެލީގެ ސަބަބުން ހޫނުކަމެއް އުފައްދައެވެ. އެގޮތުން ގާތްގަނޑަކަށް 30،000 ކެލްވިން އަށް، ވިދުވަރުގެ ވަށައިގެންވާ ވައިގެ ޒައްރާތައް ހޫނުވެއެވެ.

ވިދުމާއި އެކު އުފެދޭ އަލިކަން ބައެއްފަހަރު އެކި ކުލަކުލާގައި ހުރެއެވެ. މިގޮތަށް އެކި ކުލަކުލަ ފެންނަނީ ވަރަށް ގިނަކަންކަމުގެ މައްޗަށް ހާލަތު ނިޔާކުރުމަށް ފަހުގައެވެ. އެގޮތުން ފިނިހޫނުމިނާއި ދުރުމިނާއި ވިލާގަނޑުގެ ބޯމިނާއި އެ ވިލާގަނޑެއް އޮތް ސަރަހައްދު ހިމެނެެއެވެ.

ޖުމުލަކޮށް ވިދުމާއި، ވިދުން އުފެދޭ ގޮތުގެ މައްޗަށް މި ބަލާލެވުނީއެވެ. ވިދުމަށްފަހު، ދެން އެ އިވޭ ގުގުރީގެ އަޑާއި އެކަމުގެ ސަބަބުތަކަކީ ކޮބާކަން އެހެން ލިޔުމެއްގައި ބަލާލަން ގަސްތުކުރީމެވެ.