މިއީ ފްލޮރިޑާގެ ހޮސްޕިޓަލެއްގައި މަސައްކަތް ކުރާ ނަރުހަކަށް ދިމާވީ ހިތްދަތި ހާދިސާއެއްގެ ވާހަކައެވެ. އުމުރުން އެންމެ 25 އަހަރުގެ ނަރުހެއް ކަމުގައިވާ ބެއިލީ އެމްސީ ބްރީން ނަމަކަށް ކިޔާ މި ނަރުހަކީ އެ ހޮސްޕިޓަލުގައި ހީވާގި ކަމާއި އެކު މަސައްކަތް ކުރަމުން އައި ނަރުހެކެވެ. ފޮނި އުންމީދުތަކަކާއި ހުވަފެންތަކެއްވެސް ދެކެމުން އައި ނަރުހެކެވެ. ނަމަވެސް އޭނާގެ ހަޔާތުގެ ކުލަވަރު ބަދަލުވީ ހަމަ ކުއްލި އަކަށެވެ.

2021 ވަނަ އަހަރުން ފަށައިގެން އޭނާގެ ހަށިގަނޑަށް ކުދި ކުދި ބަދަލުތަކެއް އަންނަކަން ފާހަގަ ވިއެވެ. އެއީ ގިނަގިނައިން އަނގައިން ވައި ލެވުމެވެ. އަސްލަކީ މިއީ މާ ބޮޑު ކަމެއް ނޫނެވެ. ތަފާތަކީ ކުރިން ނުވާ ކަމެއް ވާން ފެށުމެވެ. އެކަމުގައި ކުދި ކުދި އުނދަގޫތަކެއް ހުރުމާއި އެކު، ޑަކްޓަރަށްވެސް ދެއްކިއެވެ. ވައި ކަމަށް ބުނެ، ވަޔަށް ފަރުވާ ކުރިއެވެ. ފަރުވާ ކުރުމާއި އެކު ކުޑަކޮށް ލުއި ވެއެވެ.

ތަކުރާރުކޮށް އެހެން އެކަން ދިމާވާތީ، އެއީ ގޭސްޓްރޯއީސޮފޭޖިއަލް ރިފްލަކްސް ޑިސީސް ނުވަތަ ގާޑް ކަމުގައި ޑަކްޓަރުން ނިންމިއެވެ. އެކަމަށްވެސް ފަރުވާކުރުމާއި އެކު ކުޑަ ލުޔެއް ލިބެއެވެ.

މިގޮތުގައި ދުވަސްތައް ހޭދަވަމުން ގޮސް 2023 ވަނަ އަހަރު، އަނެއްކާ ވެސް ވައިގެ އުނދަގޫ ބޮޑުވިއެވެ. ގިނަގިނައިން އަނގައިން ވައި ލެވެން ފެށިއެވެ. ކުރިއެކޭ އެއްގޮތަށް މިފަހަރުވެސް ފަރުވާ ކުރިއެވެ. ނަމަވެސް މިފަހަރު އެއްވެސް ލުޔެއް ނުލިބުނެވެ. ދެން ކުއްލިއަކަށް، އޭނާގެ ކެއުމުގެ ޝައުގުވެރިކަން އެއްކޮށްމެ ކެނޑިގެން ދިޔައެވެ. ކާ ހިތް އަމުދުން ނުވެސް ވަނީއެވެ. ބަރުދަން ވެސް ހަމަ ކުއްލިއަކަށް ލުއިވިއެވެ. ދެން ޑަކްޓަރުގެ ލަފަޔާއި އެކު އެންޑޮސްކޮޕީ އެއް ހަދާ ބައޮޕްސީ ޓެސްޓެއް ހެދިއެވެ.

ޓެސްޓުގެ ނަތީޖާ ލިބުނު އިރުވެސް އޭނާ ހުރީ ހޮސްޕިޓަލުގައި ވަޒީފާ އަދާކުރާށެވެ. ލިބުނު އެ ޓެސްޓުގެ ނަތީޖާ ދައްކާގޮތުން، ބެއިލީއަށް ހުރީ މައިދާގެ ކެންސަރު ޖެހިފައެވެ. ކެންސަރުގެ ސްޓޭޖް 3 ގައެވެ. 

އެއާއި އެކު އޭނާގެ މުޅި ހަޔާތް އެއްކޮށް ހުއްޓުނު ފަދައެވެ. ޒުވާން އުމުރުގައި، ހީވާގި ކަމާއި އެކު މަސައްކަތް ކުރަމުން ދަނިކޮށް ކެންސަރުފަދަ ނުރައްކާތެރި ބައްޔެއް ހުރިކަން އެނގުމުންނެވެ. ބެއިލީއަށް ފަރުވާދިން ޑަކްޓަރުންނާ ހަވާލާދީ މީޑިއާ ރިޕޯޓުތައް ބުނާ ގޮތުގައި، އެ ބަލީގެ ކުރީކޮޅު، އެންޑޯސްކޮޕީއެއް ހެދުނު ނަމަ، ފަހަރުގައި ކެންސަރު ޖެހުމުން އޭނާ ސަލާމަތް ކުރެވުނީހެވެ. ގާޑް ފަދަ ބައްޔަކާ އެއްކަހަލަ އަލާމާތް ތަކަކާއި އާދައިގެ ކަންތައްތަކެއް ފާހަގަ ވުމުން، ކެންސަރު ފަދަ ނުރައްކާތެރި ބައްޔަކަށް އެއިރު ޑަކްޓަރުންނަށް ޝައްކުވެސް ނުކުރެވުނީއެވެ.

އިންސާނާ ކިތަންމެ މޮޅަށް ކިޔެވިޔަސް، އެނގިފައި ހުއްޓަސް، ތަޖުރިބާ މޮޅަސް، މި އިންސާނާ އަކީ ނިކަމެތި މީހެކެވެ. އާދައިގެ ކުޑަކުޑަ ކަންކަމުގެ ނަތީޖާ މި އިންސާނާއަށް ކިހާ ހިތިކޮށް އެބަ ލިބޭ ހެއްޔެވެ.