އަހަރެމެންގެ ތެރޭގައި ތަފާތު އެކި މިޒާޖުގެ މީހުން އުޅެއެވެ. ތިމާ ވަރެއް ނެތިގެން އުޅޭ ބޮޑާ މީހުންނަކީވެސް މަދު ބައެއް ނޫނެވެ. އެމީހުން ހިތުން އެމީހުން އެއީ ވަރަށް މޮޅު ބައެކެވެ. ވަރަށް ހުނަރުވެރި ޢިލްމީ ބައެކެވެ. އާނއެކެވެ. އެކަން އޮތީ އެހެނެވެ. ނަމަވެސް އޭގެތެރެއިން ގިނަ މީހުންގެ އަހުލާގެއް ނުހުރެއެވެ. ބަސްމަގު ހުތުރުވެފައި އުޅުން މާ ތާހިރެއް ނޫނެވެ. ދީނީކަންކަމަށް އަމުދުން ފަރުވާލެއް ނުބަހައްޓައެވެ. ހީވާ ކަހަލައެވެ. އެމީހުން އެތިބީ މާ މަތީގައެވެ.

މިއީ ރާއްޖޭގެ ރަށެއްގެ ކުޅިވަރު މައިދާނެއްގައި ހިނގައި ދިޔަ ހާދިސާއެކެވެ. އެކި އުމުރުގެ މީހުން ކުޅެން ގޮސް އުޅުނެވެ. އެތަނުގައި އެ ކުޅިވަރަށް މޮޅު، ކުޅަދާނަ ކުޅުންތެރިން ތިއްބެވެ. އަދި 18 އަހަރު ނުފުރޭ ކުޑަކުދިންވެސް މެއެވެ. އެތަނުގައި ވަކިން ފާހަގަ ކޮށްލެވޭ މޮޅު ކުޅުންތެރިއަކު ހުރެއެވެ. ހުނަރުގެ ގޮތުންނާއި ތަޖުރިބާގެ ގޮތުން އެއީ ހާދަހާވާ މޮޅު މީހެކެވެ. ނަމަވެސް އޭނާގެ ނެތީ ރީތި އަހުލާގާ ހެޔޮ ބަހުން ބަސްމޮށުމުގެ ރީތި އާދައެވެ.

ކުޅިވަރުގެ އެ މައިދާނުގައި އޭނާގެ ބަސްމޮށުންތެރިކަން ހުރީ ހުތުރުބަސްތަކުން ފުރިފައެވެ. ބޮޑާކަމާއި އެކު، މޮޅަށް ކުޅެމުން ދިޔަ، އެ ވަރުގަދަ ކުޅުންތެރިޔާ އެހެން ކުޅުންތެރިން ހަދާ ގޯސްތަކަށް މަލާމާތްކޮށް ޝަކުވާކޮށް އެހެން ކުޅުންތެރިންނާ ދިމާލަށް ހަޑިހުތުރު ބަސްވެސް ބޭނުން ކުރަނީ ބޮޑާ ކަމާއި އެކުގައެވެ. ނަމަވެސް އޭނާގެ ބަސް ހުއްޓި، އެ ވަރުގަދަ ކުޅުންތެރިޔާ ނިކަމެތިވެގެން ދިޔައީ އެ މައިދާނުގައި ކުޅެން ހުރި ކުޑަކުޑަ ކުއްޖެއްގެ އެއްމެ ޖުމުލައަކުންނެވެ. މިއީ މި ނިކަމެތި އިންސާނާގެ ހާލަތެވެ.

އެ ކުޑަ ކުއްޖާއަށް ކުޅުމުގައި ގިނަ ގޯސްތައް ހެދެއެވެ. ދަސްކުރާ ކުއްޖެއްކަމުން، ގޯހެއް ހެދުން އެއީ އެއްވެސް މައްސަލައެއް ނޫނެވެ. ނަމަވެސް އެކުއްޖާއަށް ހެދުނު ގޯހަކާއި އެކު، އެއްކަލަ ބޮޑާކަމާއި އެކު ކުޅެމުންދިޔަ ކުޅުންތެރިޔާ، އެ ކުޑަ ކުއްޖާގެ މަންމަ އަށާއި އެ ކުއްޖާއަށް ނިސްބަތްވާ ގޮތަށް ހުތުރު ބަހެއް ބުންޏެވެ. އެ އާއި އެކު އެ ކުޑަކުއްޖާ ކުޅުން ހުއްޓުވާލާ، އެ ބޮޑާކަމާއި އެކު ކުޅެމުންދިޔަ ބޮޑު މީހާ ކުރެން، ތިބުނި އެއްޗެއް ތަކުރާރުކޮށްލުމަށް އެދުނެވެ. އޭރު މުޅި ކުޅުވަރު މައިދާން އޮތީ ހިމޭން ވެފައެވެ.

އެއްކަލަ ބޮޑާ ކަމާއި ކިބުރުވެރިކަމާއި އެކު، ތިމާ ވަރެއް ނެތިގެން އުޅުނު، ކުޅެން މޮޅު އެ ޒުވާނާގެ ބަސް ހުއްޓުނެވެ. އެ ބުނި ބަސް ތަކުރާރު ކުރަން އެ ޒުވާނާ ފަސްޖެހުނެވެ. އަނގަ ބަންދުވިއެވެ. އެއްޗެކޭ ނުބުނެ ހުރުމުން އަނެއްކާ އެއްކަލަ ކުޑަކުއްޖާ، އެ ބުނިއެއްޗެއް ތަކުރާރު ކޮށްލަން އެދުނެވެ. ދެންވެސް އެއްކަލަ ޒުވާނާ ހަނު ހުއްޓެވެ. މައުލޫ އޮޅުވާލާ އަވަހަށް ކުޅެން ފަށަން އެ ޒުވާނާ އެދުނެވެ. އެއާއި އެކު އެއްކަލަ ކުޑަކުއްޖާ އެ ޒުވާނާއަށް ބުންޏެވެ. މާ ގަދަވެފައި އުޅުނަސް ތިބާގެ އަދަބެއް އަހުލާގެއް ނެތް ކަމާއި ބަސްމޮށުތެރިކަން ހުތުރު ކަމުން، ތިބާއީ ބޮޑު ދެރަ ފިނޑިއެކެވެ. 

އެހިސާބުން މުޅި އެ މައިދާނުގައި ކުޅެންތިބި އެއްމެންގެ މޫނުމަތިންހެން ތަފާތު ކުލަވަރުތަކެއް ފެނުނެވެ. އާނއެކެވެ. އެބުނީ ހަމަ ތެދެކެވެ. އެހާ މޮޅަށް، ބޮޑާ ކަމާއި ކިބުރުވެރިކަމާއި އެކު ކުޅެމުން އައި އެ ޒުވާނާ، ކުޑަ ކުއްޖެއްގެ ކުރިމަތީ ބަސްހުއްޓި، ފިނޑި އެވީ އޭނާގެ ބަސްމޮށުންތެރި ކަމުގެ ހުތުރު ކަމުންނެވެ. އާދޭހެވެ! އިންސާނާއަކީ ގަދަވެފައި އުޅުނަސް ހަމަ ބޮޑު ފިނޑިއެކެވެ.