ހިސާބަށްވުރެ އަނގަގަދަ ވުމުން، ބޭލޭނީ ތިމާގެ ސޯޓެވެ! އާނއެކެވެ! މިއީ ތެދެކެވެ! ދެމީހަކު އެއްވެލައިފިނަމަ އެތަނުގައި މާ އަނގަގަދަ މީހަކު ހުރެދާނެއެވެ. މަޖިލީހެއް ޖަލްސާއެއްވިޔަސް އެތަނެއްގައިވެސް މާ އަނގަގަދަ މީހަކު ހުރެދާނެއެވެ. އާއްމު އިޖްތިމާއީ ސަރަހައްދެއްގައި އެއްވެލައިގެން ތިބޭ ބަޔަކު ތެރޭގައިވެސް މާ ވާހަކަ ގިނަވެގެން އުޅޭ މީހަކު ހުރެދާނެއެވެ. އާއިލާއެއްގެ ތެރޭގައްޔާއި މަސައްކަތު މާހައުލުގައިވެސް މިފަދަ މީހުން ތިބެދާނެއެވެ. ގިނަ ފަހަރަށް މިފަދަ މީހުންގެ ގަދަ އަނގައިގެ ސަބަބުން ބޭލެނީ އެމީހުންގެ އަމިއްލަ ސޯޓެވެ!

ބައެއް މީހުންނަކީ އިސްވެ ވާހަކަ ފަށާ މީހުންނެވެ. އަނެކާ އެއްޗެކޭ ނުބުނަނީސް އަމިއްލަ އަށް ކޮންމެވެސް ވާހަކަ ތަކެއް ދައްކަން ފަށައެވެ. އަނެކާގެ ސަމާލުކަމެއް ނުލިބުނަސް ފަރުވާލެއް ނެތެވެ. ތިމާ ކިޔަން ބޭނުންވާ އެއްޗެއް ކިޔާލާ ނިންމާލައެވެ. އަނެކާ އާ ވާ ބެހޭ ކަމެއްވެސް ނެތެވެ. އެހެނަސް އަނެކާ ކޮށްލާ ނުސީދާ ސުވާލަކުން އަނެއްކާވެސް ކޮންމެވެސް މޮޅު ވާހަކައެއް ދެއްކޭތޯ ބަލައެވެ. މިހެން މާ އަނގަގަދަ ވެގެން އުޅެން ހަދައިގެން އަމިއްލަ މީހާގެ ކުށްތަކުގެ ވާހަކަވެސް އެހެން މީހުންގެ ގާތުގައި ހުރެގެން ދެއްކެނީއެވެ. އެހެންކަމުން ބަސްމަދުކުރަން ސަމާލުކަން ދޭންވާނެއެވެ.

މަޖިލިސްތަކުގައިވެސް މާ އިނގިގެން ވާހަކަ ދައްކާ، އުރައްޕަތެއް ނެތް މީހުން އުޅެއެވެ. އެމީހުންގެ ވާ އަޑު ގަދައެެވެ. ދެން އަނގަވެސް ގަދަ ނުވާންވީ ސަބަބެއް ނެތެއްނޫންހެއްޔެވެ؟ މިފަދަ މީހުން ބޮޑެތި މަޖިލީސް ތަކުގައި މާ އަނގަގަދަވެގެން އުޅެން ހަދައިގެން ބުނަން ނުވާ އެތައް ވާހަކައެއްވެސް އޮންނަނީ ބުނެވިފައެވެ. ދެން އެހެން ބުނެވުނީތީ އެވާހަކައެއް އަނބުރާލަން އަނެއްކާވެސް ކޮންމެވެސް މޮޅު ވާހަކައެއް ދައްކައެވެ. ހުއްޓުމެއް ނެތެވެ. އެއްމެ ފަހުން ދެއްކެނީ ބޭކާރު ވާހަކައެވެ. ވާހަކަ ދައްކާ ނިމޭތަނާ މީހާ އޮންނަނީ ފަޟީހަތްވެ ނިމިފައެވެ.

ދެމީހަކު އެއްވެލާ ތަނެއްގައިވެސް އަނގަގަދަ މީހަކު ހުރެއްޖެނަމަ، ހާދަހާވާ ވާހަކައެއް އެމީހަކު އެބަ ދައްކައެވެ. އެމީހެއްގެ މޮޅުކަމާއި ކޮންމެވެސް މޮޅު ކަމެއްގެ ވާހަކައެވެ. އޮށް ނެތް ބޮޑެތި ކަރާ ފަޅާ ހަދާނެއެވެ. އެއްމެ ފަހުން ގޮސް، ދުވަހަކު މީހެއް ގާތުގައި ނުބުނަން ނިޔަތްގަނެފައި ހުންނަ ވާހަކަތައްވެސް ދެއްކޭތަން އެބަ އާދެއެވެ. އާހިރުގައި އޮންނަނީ އެމީހެއްގެ އަމިއްލަ ސޯޓު އަރުވަން ޖެހިފައެވެ.

އަނގަގަދަ މީހުން ގިނަ ކަމުން އެތައް ބަޔަކު ފަޟީހަތް ވެގެން ދެއެވެ. އެވެނި މިވެނި ބަޔަކު އެވެނި މިވެނި ގޮތަކަށް އުޅުނޭ ބުނެ، ބައެއްގެ ވާހަކަ ދައްކާ އިރު، އެމީހެއްގެ އަނގަގަދަ ކަމުން އެމީހަކުވެސް އެއްމެ ފަހުން އޮންނަނީ އެކަމެއްގައި ބައިވެރި ވެވިފައެވެ. ބައެއްގެ ގޯސް ވާހަކަ ދައްކާއިރު، ހަމަ އެވާހަކައިގެ އެހެން "ބާބެއްގައި" މި މީހާގެ ގޯސް ވާހަކަވެސް އެބަ އާދެއެވެ. 

އާނއެކެވެ! މިފަދަ އަނގަގަދަ މީހުން ވާހަކަ ދައްކާއިރު އަޑު އަހާ މީހުން ގާތަށް ހާދަވާ ހިނިއާދެއެވެ. އަދި ބައެއްފަހަރު ރުޅިވެސް އާދެވެއެވެ. ބައެއްފަހަރު ދައްކާ ވާހަކަ ދިމާނުވާވަރުން، ޓިއުނު ނުވެގެން އުޅޭ ރޭޑިއޯއެއް ފަދައޭވެސް ހިތަށް އަރައެވެ.

އާނއެކެވެ! ހިސާބަށްވުރެ އަނގަގަދަ ވުމުން ބޭލޭނީ ހަމަ ތިމާގެ ސޯޓެވެ! އެހެންކަމުން މަޑުމައިތިރި ކަމާއި ބަސްމަދު ކަމަށް ލޯބި ކުރާށެވެ. ބޭކާރު ވާހަކަ ދެއްކުމުން ދުރުވާށެވެ. ނުބެހޭ ކަންކަމާ ނުބެހޭށެވެ! ވާނުވާ ނޭނގި ވާހަކަ ނުދައްކާށެވެ.