މައިން، ދަރިންނަަށްޓަކައި ވަނީ ކޮންފަދަ މާތް ގުރުބާނީއެއް ހެއްޔެވެ؟ މަޔަކު، އޭނާގެ ދަރިން ދެކެ ކިހާ ލޯބި ވޭ ހެއްޔެވެ؟ މިއީ މި ދިވެހިރާއްޖޭގެ ހޮސްޕިޓަލަކުން ފެނުނު ހަގީގީ މަންޒަރެކެވެ. އެ މަންޒަރު ފެނި އެތަން ދުށް އެތައް ބަޔަކު ފެންކަޅި ކުރުވި މަންޒަރެކެވެ.

ހޮސްޕިޓަލުގެ އެނދެއްގައި މަންމައަކު އެނދުމަތި ކުރެވުނެވެ. އެ މަންމަގެ ދެ ދަރިން އެ މަންމަ އާއި އެކު އައިސް އުޅުނެވެ. ވަގުތު ބަހައިގެން ދެދަރިންވެސް ކަންކަން ތަރުތީބު ކުރީ އަބަދުވެސް އެކަކު އެ މަންމަގެ ގާތުގައި ހުންނާނޭ ގޮތަކަށެވެ. ދުވާލުގެ ވަގުތުތަކުގައި އެ މަންމަގެ ގާތުގައި ހުންނަނީ އޭނާގެ އަންހެން ދަރިފުޅެވެ. ރޭގަނޑު އޭނާގެ ފިރިހެން ދަރިފުޅެވެ. އެ ފިރިހެން ދަރިއަކީވެސް ބޮޑު ޒުވާނެކެވެ. 

ބަލި އެނދުގައި އޮތް އެ މަންމަ އަކީ ނޭވާލާ ނިޒާމަށް ޖެހޭ ބައްޔެއް ކަމަށްވާ ކްރޮނިކް އޮބްސްޓްރަކްޓިވް ޕަލްމޮނޮރީ ޑިޒީޒް (ސީ.އޯ.ޕީ.ޑީ) އަށް ފަރުވާ ކުރަމުން ދިޔަ މަންމަ އެކެވެ. ނޭވާލުމަށް އުނދަގޫވެ، އޮކްސިޖަން (ސެޗުރޭޝަން) ދަށްވާތީ އޮންނަނީ އޮކްސިޖަން ގުޅާފައެވެ. ރޭގަނޑު ވުމުން ފާޑެއްގެ ބޮޑު މޫނުމައްޗެއް ކަހަލަ މާސްކެއް (ބައިޕެޕް) އަޅުވައެވެ. ކޮންމެއަކަސް އެ މަންމަ އަކީ ބަލި މީހެކެވެ.

ހޮސްޕިޓަލުގައި އެ މަންމަ އޮންނަތާ ދެތިން ދުވަސް ވެއްޖެއެވެ. އެ ރެއަކީ ވިއްސާރަ ރެއެކެވެ. ހިސާބަކަށް ހޮސްޕިޓާ ތެރެވެސް ފިނި ރެއެކެވެ. އެ މަންމަގެ ގާތުގައި އެރޭވެސް މަޑުކޮށްގެން އިނީ އެއްކަލަ ޒުވާން ފިރިހެން ދަރިއެވެ. ގޮނޑިއެއްގައި އިން އެ ޒުވާނާ އެރޭ އިނީ ހީކަރުވައިގަނެފައެވެ. ނަމަވެސް ފާޑަކަށް ނިދިފައި އިން އެ ޒުވާނާ، ހީކަރުވާތީ އުޅޭ މަންޒަރު ފެނެއެވެ. އިރުކޮޅަކުން ފެނުނީ އެ މަންމަގެ ގައިމަތީގައި އޮތް ބެޑްޝީޓުގަނޑު އެ މަންމަ އަމިއްލަ އަށް ނަގާ އެ ޒުވާނާގެ ގައިގާ ވަށާލި ތަނެވެ. އޭރު އެ މަންމަ އޮތީ އޮކްސިޖަނާއި ބައިޕެޕް ވެސް ގުޅާފައެވެ. ނަމަވެސް އުނދަގޫތަކަކާއި އެކު ނުނިދި އުޅުނު އެ މަންމަ އަށް، އޭނާގެ ދަރިފުޅު، ފިނިވެގެން އެ އުޅުމު މަންޒަރު ފެނި، އެ މައި ލަގޮނޑިއަށް ކެތް ނުވެ، އެ މައިމީހާގެ ގައިމަތީ އޮތް ބެޑްޝީޓުން އެ ދަރިފުޅަށް ހޫނުކަމެއް ދިނީއެވެ.

ހަމަ ގައިމުވެސް އެ މަންމަ އަށް ފިނިވާނެއެވެ. އަމުދުން ބަލި ހާލުގައިވާއިރު، އެ ފިނީގެ ސަބަބުން އެ މަންމަ އަށް ކިހާ އުނދަގުލެއް ވާނެ ހެއްޔެވެ؟ ކިހާ ފިނިވާނެ ހެއްޔެވެ؟ ނަމަވެސް އެ ބަލި މަންމަ އެ ފިންޏަށް ކެތްކުރީ، އެ މަންމަގެ ގާތުގައި އިން އޭނާގެ ދަރިފުޅަށް އަރާމު ނިންޖެއް ދެވޭތޯ ބަލަމުންނެވެ.

އާނއެކެވެ! މައިންގެ ފައިތިލަ ދަށުގައި ސުވަރުގެ ނުވާންވީ ކީއްވެ ހެއްޔެވެ؟ މައިންގެ ކުރިމަތީގައި ދަރިއަކު ދުވަހަކުވެސް ބޮޑެއް ނުވާނެއެވެ. އެ މައިންގެ ކުރިމަތީ ދަރިންނަކީ ހަމަ ދަރިންނެވެ. އެ ދަރިއަކަށް ކުޑަނަމަވެސް ގެއްލުމެއް އުނދަގުލެއް ވުން މައިން ނޭދޭނެއެވެ. ނިކަން އިސްވެ މި ބުނެވުނު ހާދިސާއަށް ނަޒަރު ހިންގާލަމާތޯއެވެ. އާދޭހެވެ! ހަމަ ޔަގީނުންވެސް އެއީ ހަމަ ކޮންމެ މަޔަކުމެ ކަންކުރާނޭ ގޮތެވެ. އެބައިމީހުންގެ އެ އޯގާތެރިކަމާއި، ދަރިންނަށްޓަކައި އެ ވާ ގުރުބާނީއާއި، ދަރިންނަށް އެ ކޮށްދޭ ހިދުމަތްތަކަކީ ދަރިންނަށް އޭގެ އަގު އަދާނުކުރެވޭފަދަ ފުރިހަމަ މަތިވެރި ގުރުބާނީއެކެވެ.