މައިންނާ ދަރިންނާ ދެމެދު ވަނީ ކޮންފަދަ މާތް، މަތިވެރި ގުޅުމެއް ހެއްޔެވެ؟ އެއީ އިންސާނުން އަމިއްލައަށް ބިނާކުރި ގުޅުމެއް ނޫނެވެ. އެއީ ޤުދުރަތުގެ ގުޅުމެކެވެ. އެ ގުޅުމުގެ ފުރިހަމަ ކަމާއެވެ.

އިންސާނާ މައިމީހާގެ ބަނޑުން ނުކުތުމަށްފަހު މައިމީހާއާއި އޮންނަ ޤުދުރަތީ ގުޅުން އިތުރަށް ބަދަހިކޮށްދެނީ މައިމީހާ ގާތުންދޭ ކިރުންނެވެ. އެ ދަރިފުޅާއި މައި މީހާ ގާތްވި ވަރަކަށް، އުރާ ލޯބިކޮށް ހެދިވަރަކަށް މައިމީހާގެ ހަށިގަނޑުގައި ކިރު އުފެދޭ މިންވަރު އިތުރުވެއެވެ. މި ގުޅުމަކީ ޤުދުރަތުގެ ގުޅުމެއްކަން ދޭހަވާން މިއީވެސް ކޮންފަދަ މާތް މިސާލެއް ހެއްޔެވެ؟

އަހަރެމެން ދިވެހިންގެ ދިރިއުޅުމުގެ ވައްޓަފާޅީގައި މައިން، އެމީހުންގެ ދަރިން އުރައިގެން އުޅޭ އުޅުމަކީ އެއީ ވަރަށްވެސް ފުރިހަމަ ރީތި މަންޒަރެކެވެ. ކުއްޖާ ހިނގަން ފަށާ ހިސާބުންވެސް، އެ ދަރިން އުރާ ހަދައެވެ. އަދި އޭގެ ފަހުގައިވެސް، ދުރު މަންޒިލްތަކަށް ދިއުމުގައި މައިން، އެމީހުންގެ ދަރިން އުރާ، ކިހިލިޖަހައިގެން ހިނގައެވެ. މިއީ ދިވެހިންގެ އާދައެވެ. ނަމަވެސް މި އާދަ މަޑުމަޑުން ދިވެހިންގެ ތެރެއިން ނެތެމުން އެބަދެއެވެ. ކަންމިހެން ހުރިނަމަވެސް އުފާކުރާ ކަމަކީ ރާއްޖޭގެ ބައެއް ރަށްރަށުގައި މި އާދަ އަދިވެސް މިގޮތަށް އޮންނަ ކަމެވެ. މައިން އެމީހުންގެ ދަރިން އުރައިގެން ތަންތަނަށް ހިނގާ ހަދާކަމެވެ.

އާއްމުކޮށް މިގޮތަށް، ދަރިން އުރައިގެން މަންމައިން ހިނގާ ހަދަނީ ސުކޫލުތަށް ދޮށަށާއި ޤުރުއާން ކުލާސްތަކަށާއި ޓިއުޝަން ކްލާސްތަކަށެވެ. ފާހަގަކޮށްލަން ޖެހެނީ އެކުދިން އެތަންތަނަށް ގެންގޮސްދިނުމާއި ގެނައުމަކީވެސް އެ މަންމައިން އުފަލާއެކު ކުރާ ކަންކަމެވެ. މެންދުރު އަވިބާރު ގަޑީގައި އެއް ކިހިލީގައި ދަރިފުޅު ޖަހައިގެން އަނެއް އަތުން ކުޑަ ނަގައިގެން އެ ގަދަ ހޫނުގައި ހަރު ހިނގުމެއްގައި ހިނގައެވެ. ވިއްސާރަ ދުވަސްދުވަހު ކުޑަ އަޅައިގެން ފެންގަނޑުތެރޭގައި ދަރިން އުރައިގެން އެ މަންމައިން ހިނގައެވެ. ކުދިންގެ ބަރުދަން ބަރަަސް އެއްވެސް ޝަކުވާއެއް ނެތިއެވެ.

މައިން، އެމީހުންގެ ދަރިން އުރައިގެން އުޅޭ މަންޒަރު ފެނުމަކީ، އެ މަންޒަރު ބަލާ މީހަކަށްވެސް ހާދަހާވާ ހަމަޖެހުން ލިބޭ ކަމެކެވެ. ޒަމާން ބަދަލުވެ ބަނޑުމަތީގައްޔާ ބުރަކަށީގައި ކޮންމެވެސް ވަސީލަތެއް ބޭނުންކޮށްގެން ދަރިން "ހަރުކޮށްގެން" އުޅުން އެއީ އަދި އުރައިގެން އުޅުމެއް ނޫނެވެ. ފުރޮޅުލީ ގޮނޑި ގޮނޑިއަށް ލާ، އެދަރިން ކޮއްޕާ، ތަންތަނަށް ގެންދިޔަސް އަދި އުރައިގެން ހުރުމުން އެ ކުރެވޭ އިހުސާސެއް ގާތްގަނޑަކަށްވެސް ނުކުރެވޭނެއެވެ. މައިމީހާގެ ހަށިގަނޑުގައި އެ ދަރިންގެ ހަށިގަނޑު ޖެހި މައި މީހާގެ ހަކަތައިން އެ ދަރިން އުފުލާ ހެދުމަކީ ވަރަށްވެސް ތަފާތު ހިތްހަމަ ޖެހުމެއް ލިބޭނެ ކަމެކެވެ. ދަރިންނަށާއި މައިންނަށެވެ.