މައިން، ދަރިންނަށްޓަކައި ވާ ގުރުބާނީގެ ވާހަކަ އަކީ އަބަދުވެސް ދެކެވޭ ވާހަކައެކެވެ. އަދި އެ ގުރުބާނީގެ ފުރިހަމަ އަގު ދަރިންނަށް އަދާ ނުކުރެވޭނެ ވާހަކަ އަކީވެސް އައު ވާހަކައެއް ނޫނެވެ. ނަމަވެސް މިފަހަރު މި ބަލާލަނީ ދަރިއަކު، އޭނާގެ މައިމީހާއަށްޓަކައި ވީ ގުރުބާނީއެއްގެ ވާހަކައެވެ. މިއީ 2019 ވަނަ އަހަރު ހިނގައި ދިޔަ ހާދިސާއެކެވެ. ނަމަވެސް މި ފަހުންވެސް މި ވާހަކަ ވަނީ އަނެއްކާ އަލުން ފެންމަތިވެ، ގިނަ ބަޔަކު ޝައުގުވެރި ކުރުވާފައެވެ. 

އެމެރިކާގެ އަވަށެއް ކަމަށްވާ ފިލަޑެލްފިއާގެ ޒުވާނަކު އޭނާގެ މަންމައަށްޓަކައި ވީ ގުރުބާނީގެ ވާހަކައިން މުޅި މީސްމީޑިޔާގެ މަންސަތައް އޭރުގައި ފުރާލިއޭ ބުނުން ދޮގަކަށް ނުވާނެއެވެ. 35 އަހަރުގެ ޖެރްމައިން ނަމަކަށް ކިޔާ ކަޅު ނަސްލުގެ މި އެމެރިކާ މީހާ އަކީ "ހީރޯ" އެކެވެ.

ޖެރްމައިން އާއި އޭނާގެ ދައްތަ އަދި އޭނާގެ މަންމަ އުޅެމުން އައީ ފިލަޑެލްފިއާގެ ގެއެއްގެ 19ވަނަ ފަންގިފިލާގައެވެ. ސިއްހީ ހާލަތު ނިޔާކުރި ގޮތުން ޖެރްމައިން ގެ މަންމަ އަކީ ދާންމަތިވެފައިވާ މީހެކެވެ. އެކަނި ތެދުވެ، އަމިއްލައަށް އަމިއްލަ ކަންކަން ނުކުރެވޭ މީހެކެވެ. އެ މަންމަގެ ކަންކަން ބަލަހައްޓަމުން އައީ އޭނާގެ ދެ ދަރިންނެވެ.

އެގޮތުގައި އެ އާއިލާ އުޅެމުން ދަނިކޮށް، އެ މީހުން އުޅެމުން އައި ގޭގައި އަލިފާނުގެ ހާދިސާއެއް ހިނގިއެވެ. އެއާއި އެކު، އެ ގެއިން ކަރަންޓު ކެނޑި، ލިފްޓް ބޭނުން ނުކުރެވޭ ގޮތް ވިއެވެ. އަދި ސިޑި ބަރީގެ ބާރު ބޮޑުވެ، ސިޑި ބަރީގައިވެސް ހިސާބަކަށް އަލިފާނުގެ އަސަރު ހުއްޓެވެ. ވަގުތަކީ އެ މަންމަގެ ދެ ދަރިން، ގޭގައި ނެތް ވަގުތެކެވެ. 

އަލިފާނުގެ ހާދިސާގެ ހަބަރު ލިބުމާއި އެކު، އެ މަންމަގެ އަންހެން ދަރި ލަސްނުކޮށް ގުޅީ ޕޮލިހަށެވެ. ފިރިހެން ދަރި، ޖެރްމައިން ވީ ތަނެއް ނުމެ އިނގެއެވެ. ނަމަވެސް ޖެރްމައިން އެ ވަގުތު، ތިރިއަށް ފޭބީ ފިހާރައަކަށް ކަމަށް ވެއެވެ. ޖެރްމައިން ބޭރުގައި ހުއްޓާ އަލިފާނުގެ ހާދިސާ ހިނގާ، ލިފްޓް ބޭނުން ނުކުރެވި، އަދި ސިޑި ވެސް ބޭނުން ކުރެވެން ނެތުމާއި އެކު އެ ޒުވާނާ، އޭނާގެ ދާންމަތިވެފައިވާ މަންމަ ސަލާމަތް ކުރުމަށް، އެ އިމާރާތުގެ ބޭރުން، 19 ވަނަ ފަންގިފިލާއާއި ހިސާބަށް އެރިއެވެ. ބެލްކަނި ތަކުންނާއި އޭސީ ތަކުގެ އެހީގައި އިމާރާތުގެ ބޭރުން، އެހާ އުހަށް އެއްވެސް ސަލާމަތީ ވަސީލަތެއް އަދި އާލާތެއް ބޭނުން ނުކޮށް އެ ޒުވާނާ 19 ވަނަ ފަންގިފިލާއަށް އެރީ އެ ޒުވާނާގެ މަންމަ ސަލާމަތް ކުރުމަށެވެ.

މަންޒަރު ދުށް މީހުންނާ ހަވާލާދީ ސީ.އެން.އެން ގައި އޭރު ރިޕޯޓުކޮށްފައިވާ ގޮތުން ޖެރްމައިން އެގޮތަށް އަމަލު ކުރީ އެ މަންމައަށް ގުޅާފައި ހުންނަ މެޝިނެއް، ކަރަންޓު ދިއުމުން މަސައްކަތް ނުކޮށް ހުރުމާއި އެކު އެ މަންމަ އަށް ލިބިދާނޭ ގެއްލުމަކުން ސަލާމަތް ކޮށްދިނުމަށް، އެ މެޝިން، "މެނުއަލްކޮށް" މަސައްކަތް ކުރާނޭ ގޮތް ހެދުމަށެވެ.

ޖެރްމައިން ގެ ދައްތަ ފުލުހަށް ގުޅުމާއި އެކު، އަދި އަލިފާނުގެ ހާދިސާ ހިނގައިގެން އަލިފާން ނިވާ ސިފައިން އެ ސަރަހައްދަށް ދިޔައިރު، އެ އިމާރާތުގެ ބޭރުން، ޖެރްމައިން އަރަމުންދާ މަންޒަރު ފެނެއެވެ. އަދި އެ މަންޒަރު ވީޑިއޯކޮށް ގިނަ ބަޔަކު ދިޔައީ މީސްމީޑިޔާގައި ހިއްސާވެސް ކުރަމުންނެވެ. ސީ.އެން.އެން ގައި އާއްމުކޮށްފައިވާ މައުލޫމާތުގައި ބުނާގޮތުން އޭނާ އެރީ 19ވަނަ ފަންގިފިލާއާ ހަމައަށެވެ. ނަމަވެސް ބައެއް އެހެން މަސްދަރު ތަކުގައި 15ވަނަ ފަންގިފިލާ ކަމަށްވެސް ވެއެވެ. އަދި އޭނާ އެ އިމާރާތަށް އެރީ، އޭނާގެ އުނަގަނޑަށް ކުރިން ލިބިފައި ހުރި އަނިޔާއަކަށް ފަރުވާ ކުރަމުން ދިޔަ ވަގުތެއްގައި ކަމަށްވެސް ވެއެވެ.

ކޮންމެއަކަސް ޖެރްމައިން ގެ މި ބިރުކުޑަ އަދި ހިތްވަރުގަދަ އަމަލުގެ ސަބަބުން، އެ ޒުވާނާގެ ހިތުގައި އޭނާގެ މަންމަ އަށް އޮތް ލޯބި ވަރަށް ބޮޑަށް ހާމަ ވެގެން ހިނގައްޖެއެވެ. އަހަރެމެން ކޮންމެ މީހަކީވެސް، އަހަރެމެންގެ މަންމައިންގެ ހައްގުގައި މިފަދަ ގުރުބާނީތައް ވާން ކެރޭ ބައެއް ކަމުގައި ލައްވާށިއެވެ. އޭނާގެ މި އަމަލުގެ ސަބަބުން، އޭނާ އަކީ "ހީރޯ" އެއް ކަމަށްވެސް ގިނަ ބަޔަކު ދެކުނެވެ. ސުވާލަކީ މިވަރުންވެސް އެ މަންމައަށްޓަކައި އެ ޒުވާނާ އެ ވީ ގުރުބާނީ އާއި އެ މަންމަ އެ ޒުވާނާއަށްޓަކައި ވީ ގުރުބާނީ ބައްދަލުވާނެތޯއެވެ؟

 

އަމީރް ވެރާ، ސީ.އެން.އެން -2019