އިންސާނާގެ ހަޔާތުގައި ތަފާތު އެތައް ކަމެއް ކުރިމަތިވާނެއެވެ. އެއް އިންސާނަކާ އަނެއް އިންސާނަކު ތަފާތުވާނެއެވެ. މީހާގެ ސިފަޔާއި ހުންނަ ގޮތާއި ކުރާ ކަންކަމާއި އަދި ކޮންމެ މީހަކަށް ލިބިދޭ ރިޒުގާއި ރޯދިވެސް ތަފާތުވެދާނެއެވެ. މިއީ ދުނިޔޭގެ އާދައެވެ. ކަން ހިނގާ އުސޫލެވެ. ކަންކަން ތަރުތީބުވެ، ދަތުބީރުވަމުންދާ ގޮތެވެ. މިކަމުގެ މައްޗަށް އިންސާނާއަށް އޮތީ ކެތްތެރިވުމެވެ. ޝަކުވާކޮށް ބަހަނާދެއްކުމެއް ނެތެވެ. އެހެނީ ކެތްތެރިކަމުގެ ނަތީޖާ ފޮނިވާނެއެވެ.

އިންސާނުން އަބަދުވެސް ކޮންމެވެސް މޮޅު ކަމަކަށް ހިތް އެދެއެވެ. އަދައްވުރެ ފަހި މާދަމައަކަށް އެދެއެވެ. ލިބިފައިވާ ނިޢުމަތްތައް ގިނަ ވުނަށް އެދެއެވެ. މިއީ އިންސާނާގެ ޠަބީއަތެވެ. ކަންމިހެން ހުރިނަމަވެސް އިންސާނާގެ ވިސްނުމަށް ގެނައުން މުހިއްމު ކަންތައްތަކެއް ހުންނާނެއެވެ. އެގޮތުން އިސްވެ ބުނިފަދައިން ކެތްތެރިކަމަކީ އެއްމެ މުހިއްމު އެއްކަމެވެ.

އެއް ނިޢުމަތަކަށް އެދި ތިބި ދެމީހަކަށް، އެކަކަށްވުރެ ކުރިން އަނެކާއަށް އެ ނިޢުމަތެއް ލިބިދާނެއެވެ. ދެމީހުން ކުރެ ކޮންމެވެސް އެކަކަށް މާ ގިނައިން ނިޢުމަތްތައް ލިބިދާނެއެވެ. މިހާލަތުގައި އަނެކާ އެކަމުގެ މައްޗަށް ޝަކުވާ ނުކުރާށެވެ. ހަސަދަވެރިނުވާށެވެ. އަބަދުވެސް ހެޔޮކޮށް ވިސްނާށެވެ. ތިމާއަށް އެ ނިޢުމަތެއް ލިބުން ލަސްވުމަކީ ތިބާގެ އުނިކަމެއް، ނުވަތަ އަނެކާގެ މޮޅު ކަމެއްވެސް ނޫނެވެ. އެހެނީ އަހަރެމެން އިންސާނުންނަށް ލިބޭ ކޮންމެ ނިޢުމަތެއްގެ ވެރި ފަރާތަކީ މާތް ﷲ އެވެ. އެކަލާންގެ ދެއްވި ރިޒުގެއް، ރޯއްޖެއް ނޫނީ ނުލިބޭނެއެވެ.

ކެތްތެރިކަމަކީ އޭގެ މޭވާ ފޮނި ކަމެކެވެ. އެފަދަ ކިތައްމެ މިސާލެއް ދުނިޔޭގެ މާޒީގައި ހިބގާފައި އެބަ ހުއްޓެވެ. އަދި ކިއެއް އެފަދަ ދިރިހުރި އެތައް މިސާލުތަކެއްވެސް މިއަދުވެސް ފެންނާން އެބަ ހުއްޓެވެ. ކަންކަން ލަސްވެ، ކަންކަމުގެ އިންތިޒާރު ދިގުލައިގެން ދަނީ އެކަމެއް ނުވާން ވެގެނެއް ނޫނެވެ. ފަހަރުގައި ދިގުލައިގެން އެދާ ކަމެއްގެ އާހިރު ނަތީޖާ އަވަހަށް ލިބުނު ނިޢުމަތެއްގެ ނަތީޖާއަށްވުރެ ފޮނިވެފާ މީރު ވެދާނެއެވެ. ގިނައިން ނިޢުމަތްތައް ލިބުނު މީހާގެ ނިޢުމަތްތަކަށްވުރެ، މަދުން ނިޢުމަތްތައް ލިބުނު މީހާގެ ނިޢުމަތައް މާ ފުރިހަމަވެފާ ފައްކާވެދާނެއެވެ.

ކަންކަން މިހެން ހުރުމާއި އެކު، ނިޢުމަތެއް ލިބުމުގައި ލަސްކަމެއް އުޅުނަސް، އަދި މަދުކަމެއް އުޅުނަސް ކަންބޮޑުނުވާށެވެ! މާތް ﷲ އެމީހަކަށް ދެއްވަވަން ހުރި ރިޒުގެއް އެހެން އެއްވެސް މީހަކަށް މަނައެއް ނުކުރެވޭނެއެވެ. އަހަރެމެން އިންސާނުންގެ ރޭވުންތެރިކަމަށްވުރެ އެ އިލާހުގެ ތަގުދީރު މާ ފުރިހަމަ ވާނެއެވެ. ހުރިހާ ކަމެއްގައިވެސް އޮތީ މާތް ﷲ އަށް ދެންނެވުމާއި، އެކަލާންގެއަށް ޝުކުރުވެރިވުމެވެ.