މަސްތުވާތަކެއްޗަކީ މިއަދު ދުނިޔޭގެ ހުރިހާ ގައުމެއްގައިވެސް ގެންގުޅޭ ތަކެއްޗެވެ. އަދި ކޮންމެ ގައުމެއްގައިވެސް ގެންގުޅުން މަނާ އެއްޗެއްސެވެ. އަހަރެމެންގެ މި ކުޑަކުޑަ ދިވެހި ރާއްޖޭގައިވެސް މަސްތުވާތަކެތި ބޭނުންކުރާ މީހުން މަދެއް ނޫނެވެ. އަދި ކިއެއްތަ ކުދިކުދި ރަށްތަކުގައިވެސް މިކަން އޮތީ މިހެނެވެ. މި ރަށްތަކުގައި މަސްތުވާތަކެތީގެ ވާހަކަ ދެކެވޭއިރު، މިއިން ކޮންމެ ރަށަކުންވެސް ހަނދާނަށް އަންނަ މީހުންގެ ނަންތަކެއް އުޅޭނެއެވެ. ދުލުކުރިއަށް ބަރުވެލާ މީހުންގެ ނަންތަކެއް އުޅޭނެއެވެ.

ކަންމިހެން ހުރުމާއި އެކު އެނގޭ އެއް ކަމަކީ މި ރަށްތަކުގައި މަސްތުވާތަކެތި ބޭނުންކުރާ މީހުންނާއި އޭގެ މުއާމަލާތްކުރާ މީހުންނަކީ ކޮން ބައެއްކަން އެ ރަށްރަށުގެ ރައްޔިތުންނަށް އެނގޭކަމެވެ. އަދި އެކަމުގެ ވާހަކަ ރަށުތެރޭގައި ގަދަޔަށް ދައްކާކަމެވެ. ނަމަވެސް ހިތާމަ އަކީ އެފަދަމީހުން އެ މިނިވަންކަމުގައި އެ މުޖުތަމައުތައް ފަސާދަކުރުމުގައި އުޅޭކަމެވެ.

ރަށްރަށުގެ ތަރައްގީއަށާއި ކުރިމަގަށް ހުރަސް އެޅޭ އެންމެ ބޮޑު އެއް ސަބަބަކީ މިފަދަ މީހުން މުޖުތަމައުތަކަށް ދޫވެފައި އޮންނަ އޮތުމެވެ. މިފަދަ މީހުންގެ އަޑު ގަދަވާނެއެވެ. މިފަދަ މީހުން ހަމައިން ނެއްޓި، އާންމު ރައްޔިތަކަށް ގެއްލުމެއް ދީފާނެ ކަމުގެ ބިރަށް މި މީހުންގެ ކުރިމަތީ ރަށްރަށުގެ ކަމުވޮށިގެންވާ މީހުން ބޯގުދު ކުރެއެވެ. އަދި ހުރިހާ ތަނަކު މި މީހުންގެ ބާރާ ނުފޫޒު ހިންގައެވެ. އެއީ އެކަމަކުން ނަތީޖާއެއް ނުފެންނަފަދަ ކަންކަން ކަމުގައި ވިޔަސް މެއެވެ.

ދަންނާށެވެ! މިފަދަ މީސްމީހުންގެ ބަސް އަހައިގެން، މިފަދަ މީސްމީހުންގެ ބަހަށް ކަންކަން ދީލާލައިގެން، ކަންކަން އިސްލާހުވާނީ ކިހިނަކުން ހެއްޔެވެ؟ އިސްލާހު ކުރަން ޖެހިފައިވާ ބައެއްގެ ފުށުން ރަށްވެހި ކަންކަމަށް އިސްލާހެއް ހޯދޭނީ ކިހިނަކުން ހެެއްޔެވެ؟

ދިވެހި ރާއްޖޭގެ މުޖުތަމައުތަކުގައި މަސްތުވާ ތަކެތި ބޭނުންކޮށް، އޭގެ ވިޔަފާރި ކުރާމީހުން، ބޮޑާކަމާއި ކިބުރުވެރިކަމާއި އެކުގައި އުޅެނީ އެބައިމީހުންނަށް ހައްގު އަދަބު ނުދެވޭތީއެވެ! އިސްލާމް ދީނުގެ އަސާސީ ހުކުމްތައް ނޭނގޭތީއެވެ! މަސްތުވާތަކެއްޗަކީ ހަރާމް ތަކެތިކަން ނޭނގޭތީއެވެ! ހަރާމް ކަންކަމަކީ ކޮބައިކަން ނޭނގޭތީއެވެ! އަޒާބަކީ ކޮބައިކަން ނޭނގޭތީއެވެ! ސުވަރުގެއާއި ނަރަކައަކީ ކޮންތަނެއްކަން ނޭނގޭތީއެވެ! ދީނަކީ ކޮބައިކަން ނޭނގޭތީއެވެ! ހަލާލާއި ހަރާމަކީ ކޮބައިކަން ނޭނގޭތީއެވެ! އުޅެންވީ ގޮތް ބަތާންވެފައިވާ ފޮތަކީ ކޮބައިކަން ނޭނގޭތީއެވެ! އުޅުމުގެ ވައްޓަފާޅި ފެންނަން އޮތް ސުންނަތަކީ ކޮބައިކަން ނޭނގޭތީއެވެ! ޖުމުލަކޮށް ދަންނަވާނަމަ މުސްލިމަކަށް ވީތީ އެނގެންޖެހޭ އަސާސީ ކަންކަން ނޭނގޭތީއެވެ!

ކުށްވެރިއަކީ މަސްތުވާތަކެތީގެ މުއާމަލާތްތަކުގައި އުޅޭ މީހުން ހެއްޔެވެ؟ ނުވަތަ އެމީހުންގެ މައިންބަފައިން ހެއްޔެވެ؟ އިސްލާމީ ރިވެތި އަހުލާގާއި ތަރުބިއްޔަތު ލިބިގެން ބޮޑުވެފައިވާ ޒުވާނާ ހަމަ ޔަގީނުންވެސް މަސްތުގެ މަގު އިހްތިޔާރެއް ނުކުރާނެއެވެ. އެހެންކަމުގައިވާނަމަ މިކަމުގައި މަސްތުވާތަކެތި ބޭނުންކޮށް އޭގެ މުއާމަލާތްކުރާ މީހުންގެ މައިންބަފައިންވެސް އެކަމުގެ ޒިންމާ ނަގަން ޖެހޭނެއެވެ. އެހެނީ ދަރިންނަކީ އަމާނާތެކެވެ! އެދަރިން ބަލާ ބޮޑުކުރި ގޮތާއި މެދު، މާތް ﷲ ގެ ހަޟްރަތުގައި ޖަވާބުދާރީ ވާން ޖެހޭނެއެވެ!

ތިޔަ ރަށުގައި މަސްތުވާތަކެތީގެ ވާހަކަ ދައްކާނަމަ، ހިތަށް އަރަނީ ކޮންކޮން ބައެއްގެ ނަންތަކެއް ހެއްޔެވެ؟ އެނަންތައް ހިތުގައި ބާއްވާލާށެވެ! ބައެއްގެ ނަންތައް ހިތަށް އައިނަަމަ އެއީ ދެރަ ކަމެކެވެ. އެއީ މުޖުތަމައު ތަކުގައި މިކަން ފެތުރި އާއްމުވެފައިވާލެއް ބޮޑުކަމުގެ ނަތީޖާއެވެ. މާތް ﷲ އަޅަމެންގެ މުޖުތަމައުތައް، މަސްތުގެ ވަބާއިން ސަލާމަތް ކުރައްވާށިއެވެ! އަދި އޭގެ ވިޔަފާރި ކުރާ، މުޑުދާރު މީހުންގެ ކިބައިން މުޖުތަމައުތައް ސަލާމަތް ކުރައްވާށިއެވެ!