ބައެއް މީހުންގެ ލޯތަށް ކަނުވެފައި ކަންފަތްތައް ބީރުވެފައި ވިސްނުން ގަބުވެފައި ހުންނަ ވާހަކަ އަޑު އަހަމުއެވެ. ނަމަވެސް މިއީ ހަގީގަތުގައިވެސް ބައެއްމީހުންނަށް ވެފައި ހުންނަ ގޮތެއްކަމެއް ނުދެނަހުރީމެވެ. މިކަމުގެ މައްޗަށް "ތީރުން" ބެލި ބެލުމުގައި ހަމަ ހަގީގަތުގައިވެސް ލޯތަށް ކަނު، ކަންފަތްތައް ބީރު، ވިސްނުން ގަބު ބަޔަކު ދިވެހިންގެ ތެރޭގައި އުޅެއެވެ. ޖިސްމާނީ ގޮތުން ހިއްސުތައް ހަމައެވެ. ފުރިހަމައެވެ. ނަމަވެސް ވިސްނުން ގަބުކަމުގެ ސަބަބުން ދެކޭމީހުންނަށް ހީވަނީ އެބައިމީހުންގެ ޖިސްމާނީ ހިއްސުތައްވެސް މަސައްކަތްނުކުރާ ކަމަށެވެ.

އިޖްތިމާއީ މިފަދަ ތަފާތު އެތައްކަމެއް މިދުވަސްވަރު ހާމަވަމުން އެބަ ދެއެވެ. އެހެނީ އިޖްތިމާއީ ގޮތުންނާއި ސިޔާސީ ގޮތުން މުޅި ގައުމު މި ވަނީ ހަލަބޮލިކަމެއްގެ ތެރޭގައެވެ. މިކަންކަމުގެ ތެރެއިން ބައެއް މީހުންގެ އަސްލު ސޫރަ ހާމަވާން އެބަ ފަށައެވެ. މިފަދަ ބައެއް މީހުންނީ އިސްވެ ދެންނެވިފަދައިން ލޯތަށް ކަނު، ކަންފަތްތައް ބީރު، އަދި ވިސްނުން ގަބު މީހުންނެވެ.

މިފަދަ މޭރުމަކުން އިންސާނުންނަށް މިހާތަބު ކުރަން ހަގީގަތުގައި ލަދު ގަނެއެވެ. ނަމަވެސް މިއީ އެއްވެސް މީހެއްގެ ޖިސްމާނީ އުނިކަމަކަށް ކުރާ މަލާމާތެއް ނޫނެވެ. ގައުމުގެ މި ހަލަބޮލިކަމުގައި އެކި މީހުންގެ ވާހަކަތައް އެކި ގޮތްގޮތަށް އެނބުރި އަސްލެއް އަސާސެއް ނެތް ވާހަކަތައް ދައްކާ އުޅޭތީ ބުނެވޭ މިސާލީ ބަހެއްގެ ގޮތުން އެ އިބާރާތް ބޭނުން ކުރެވެނީއެވެ.

އެއްބަޔަކު މީގެ ކުރިން ބުނެފައި ހުރި އެތައް ވާހަކައެއް، ނުބުނާ ކަމަށް މިއަދު ފާޅުގައި އެބަ ބުނެއެވެ. ހެކިތަކާއި ވީޑިއޯތައް ހުއްޓެއް ކަމަކު، ހަމަ ނުބުނަމޭ ކިޔާ ދޮގު ހަދަނީއެވެ. ކުރަން ބުނެފައި ހުރި އެތައް ކަމެއް ކޮށް ދުނެވުމުން، މައާފަށް އެދުމެއްވެސް ނެތި، އެއީ ކޮށްދޭން ބުނި ކަންކަން ނޫންކަމަށް އެބަ ބުނެއެވެ. އެހެން ބަޔަކު ކޮށްދީފައި ހުރި ކަންކަން، އެއީ ފާޅުގައި އެމީހުން ކޮށްދީފައި ހުރި ކަންކަން ކަން އެނގެން އޮންނަ އިރުގައިވެސް، އެއީ ތިމަންނާ ކޮށްދިން ކަންކަމޭ ބުނެ ރޯ ބުހުތާނު ދޮގުތައް ހަދައެވެ. 

މީހުން ތަނަކު މާ ގިނައިން އެއްވެފައި އޮތްތަން ފެނި އަތުން ހިފުމަށްފަހުގައިވެސް، އެކަމާ ހިތްޕުޅާ ނުވާނަމަ، ގިނަ ބަޔަކު ނެތްކަމަށް ފާޅުގައި ދޮހުހަބަރު ފަތުރަމުން ދަނީއެވެ. އަނެއްބަޔަކު މީހުން ނެތްކަން ފާޅުގައި އިނގުނަސް، ވަރަށްގިނަ މީހުން ތިބިކަމަށް ބުނެ ދޮގުހަދަމުން ދެއެވެ. މިފަދަ އެތައް ކަމެކެވެ. 

މިސަބަބުތައް މިހެން ހުރުމާއި އެކު ލޯތަށް ކަނު، ކަންފަތްތައް ބީރު، އަދި ވިސްނުން ގަބު ބަޔަކު އެބަ އުޅެއޭ ނުބުނެވޭންވީ އެއްވެސް ސަބަބެއް ނެތެވެ. އެއްގޮތަކީ އެބައިމީހުންނަށް ހަގީގަތް ނޭނގުމެވެ. އަނެއްގޮތަކީ އެބައިމީހުންގެ އަގީދާ ފާސިދުކަމުން، ދޮގު ހެދުމާއި ހަގީގަތް ގަބޫލު ނުކުރުމާއި، ޒާތީ ތައައްސުބު ބޮޑުކަމުން އޮޅުވާލައިގެން މަންޒަރު ބަދަލުކުރަން ބޭނުން ވުމެވެ. ކަނޑައެޅިގެން ހެދެނީ ދޮގު ކަމާއި، ދޮގު ހެދުމަކީ ވޭންދެނިވި އަޒާބު ހުރިކަމެއްކަން އެނގިހުރެވެސް ދޮގު ހަދަނީއެވެ.

މިކަންކަން މިހެން ހުރުމާއި އެކު، ދިވެހި މުޖުތަމައުގައި ލޯތަށް ކަނު، ކަންފަތްތައް ބީރު، އަދި ވިސްނުން ގަބު ބަޔަކު އެބަ އުޅެއޭ ބުނެވޭނެއެވެ. އަޅުގަނޑުމެންގެ އުންމީދަކީ އަޅުގަނޑުމެންގެ ތެރެއިން ހަމަ އެކަކުވެސް އެފަދަ މީހެއް ކަމުގައި ނުލެއްވުމެވެ.