މާސިންގާހާ ދޮގުތައް ހަދަހަދާފައި ގޮސް ނިދަން އޮއެވޭ ހެއްޔެވެ؟ މިއީ އަހަރެމެން ހިތާހިތުން ކޮށްލުން ރަނގަޅު ސުވާލެކެވެ. މި ސުވާލުގެ ޖަވާބުގައި އާނއެކޭ ނުވަތަ އޮއެވެއޭ ބުނާނަމަ ސުވާލު އުފެދޭ ބައިވަރު ކަންކަން އެބަހުއްޓެވެ. އޭގެތެރެއިން އެއްމެ ހައްސާސް ނުކުތާ އަކީ ތިމާގެ އީމާންތެރި ކަމެވެ.

އާދޭހެވެ! މުސްލިމެއްގެ ގޮތުގައި އަހަރެމެން ތިބޭއިރު، ދޮގު ހެދުމާއި ދޮގު ހެކި ދިނުމާއި، ހަގީގަތް ނޭނގޭ ހަބަރުތައް ފެތުރުމަކީ ކިހާވަރެއްގެ ކަމެއްކަން އެނގޭނެއެވެ. ނޭނގޭ ބަޔަކަށް އެނގޭނޭހެން މިދިޔަ ހުކުރު ދުވަހު ހުކުރު ޚުތުބާގައިވެސް އެވާހަކަތައް ހަނދާން ކޮށްދީފިއެވެ. ދެންވެސް ދޮގު ވާހަކަ ދެއްކުމާއި ފެތުރުމުގެ ނުބައިކަން ނޭނގޭނަމަ އަނެއްކާވެސް ސުވާލު އުފައްދަން ޖެހެއެވެ. މި ސުވާލުތަކުގެ ވެސް އެއްމެ ހައްސާސް ނުކުތާ އަކީ އެމީހެއްގެ އީމާންތެރި ކަމެވެ.

ދީނާއިދުރު ވަނީ އެމީހަކު އައުރަ ނިވާ ނުކޮށް ހުރުމަކުން ނޫނެވެ. ދީނާއިދުރު ވިސްނުންތަކަކީ މީހާ ހުންނަ ގޮތަކުން ބުނެވެން ހުންނަ ކަންކަމެއް ނޫނެވެ. ދޮގު ހެދުމަކީ ދީނާއި ދުރު ވިސްނުމެއް، ފިކުރެއް ނޫންތޯއެވެ. ލާދީނީ ކަމުގެ އަސާސީ އެއް ސިފަ އަކީ ދޮގު ހެދުން ނޫންތޯއެވެ. ރަސޫލުންނާއި ބެހޭ ގޮތުން، ލާދީނީ މީހުން ނުވަތަ ކާފިރުން ދެއްކި ވާހަކަ ތަކަކީ ދޮގު ވާހަކަ ތަކެވެ. އެބައިމީހުން ފެތުރި ފިތުނަ އަކީ ދޮގާއި މަކަރާއި އޮޅުވާލުމުގެ ފިތުނައެވެ.

މިއަދު ދިވެހި ރާއްޖޭގެ ހާލަތު ނިކަން ދެކިބަލާށެވެ. އެތައް ހާސް ބަޔަކަށް ފެންނަން ހުންނާނެ ގޮތަށް ބައްޓަން ވެ ފަރުމާވެފައިވާ ނޫސް މަޖައްލާތަކުގައި ފަތުރަމުން ދަނީ ބުހުތާނު ދޮގުތަކެވެ. ހިތާމަ އަކީ މިފަދަ ދޮގު ހަބަރުތައް ފަތުރާ މުޖުތަމައު ފަސާދަކޮށް ޖަމާއަތުގެ އަމާންކަން ނަގާލާފަ ގޮސް ހަމަޖެހިލައިގެން މިބައިމީހުން ތިބޭ ކަމެވެ. އެތައް ބައެއްގެ އަބުރު ވެއްޔާ މޮޑި، އެތައް ބައެއްގެ ބޮލުގައި މުޑުދާރު ތުހުމަތު އަޅުވާ އަބުރު ކަތިލަން ބުހުތާނު ދޮގު ހަބަރުތައް ލިޔެ، އަރާމުގައި ނިދަން އަރާ ނޮންނަ ކަމެވެ. އަސްލުގައިވެސް މިއީ ހިތާމަ ހުރި ކަމެކެވެ. ސުވާލު އުފެދެނީ އެބައިމީހުންގެ އިމާންތެރި ކަމާމެދުގައެވެ.

ހުކުރު ދުވަހުގެ ހުކުރު ޚުތުބާއަކުން އެއްވެސް އަސަރެއް މިބައިމީހުންނަށް ނުކުރާ ކަހަލައެވެ. ޚުތުބާ އަޑުނާހަނީ ހެއްޔެވެ؟ ހުކުރަށް ނުދަނީ ހެއްޔެވެ؟ ނޫނީ ނަމެއްގައި ހުކުރަށް ގޮސް، ޚުތުބާވެސް ނަމެއްގައި އަޑު އަހާފައި އައިސް، ދީނާދުރު ކަންކަން (ދޮގު ހަބަރު ފެތުރުން) ކުރަނީ ހެއްޔެވެ؟ އެހެންކަމުގައި ވަނީނަމަ ދެންވެސް ސުވާލު އުފެދެނީ ހަމަ އޭނާގެ އީމާންތެރި ކަމާ މެދުގައެވެ.

އިސްލާމީ މުޖުތަމައެއްގައި ޣައިރު ދީން ފަތުރަން އުޅުނު މީހާ އެކޭ މުސްލިމު އަހުންތަކުގެ ތެރޭގައި ފިތުނަ އުފައްދަން ދޮގު ހަބަރު ފަތުރާ މީހެކޭ ހުރި ތަފާތަކީ ވަކި ކޮބައި ހެއްޔެވެ؟ މުސްލިމުން ބަލިކަށިކޮށް މުސްލިމުން ބައިބައި ކުރުމަކީ މުސްލިމުން އިސްލާމް ދީނާ ދުރުކުރުވަން ކުރާ އެއްމެ ފުރަތަމަ މަސައްކަތެވެ. ދިވެހި ރާއްޖޭގައި މިކަންކަން އޮތީ ދޮގު ހަބަރުތަކުގެ ތެރެއިން ފުރިހަމައަށް ކޮށްނިންމާފައެވެ. މި ގައުމުގައި މުސްލިމުން އެއްބަޔަކު އަނެއްބަޔަކާ ތިބީ މޫނު ޖައްސުވާފައެވެ. ދީނީ "ކާޑު" ގެ މަތިން ދިވެހި މުސްލިމުން ތިބީ ފޫހިވެފައެވެ. ދީނީ ކަންކަމަކީ މާ ބޮޑު ކަންތައްތަކެއް ަކަމުގައު ނުދެކެއެވެ.

ހެޔޮވާނީ ކިހިނެއް ހެއްޔެވެ؟ މިފަދަ ދޮގު ހަބަރުތައް ފަތުރާ މުޖުތަމައު ފަސާދަކޮށް، އެއްބައެއްގެ އަބުރު ކަތިލާފައި ގޮސް ނިދަން އަރާ ތިޔަ ތިބެނީ މާދަން ހޭލާނޭ ކަމަށް ހަމަ ޔަގީން ކޮށްގެން ހެއްޔެވެ؟ އީމާންތެރިކަމުގެ ބަލިކަށި ކަމާއެވެ. ވިސްނުމާއި ބުއްދީގެ ކޮށި ކަމާއެވެ.