ވިއްސާރަ ވިލާގަނޑެއް ހަދައިފިކަން ނުވަތަ ވާރޭ ވެހެން އުޅޭކަން، އުޑުމައްޗަށް ނުބަލާ، ލަފާކޮށްފާ ބުނާ މީހުން އަހަރެމެންގެ ތެރޭގައި މަދެއް ނުވާނެއެވެ. ހާއްސަކޮށް އުމުރުން ދޮށީ މީހުންނެވެ. އެމީހުން އެ ބުނާ އެއްޗެއް ބުނަނީ އެމީހުންގެ ތަޖުރިބާގެ މައްޗަށް ބިނާކޮށެވެ.

ވިއްސާރަ އައުމުގެ ކުރިން، ނުވަތަ ވާރޭ ވެހުމުގެ ކުރިން އެކަން ދެނެގަންނަ އެއް ގޮތަކީ ދިލަ ހޫނެއް އިހުސާސް ކުރެވުން. މިކަން ގޭތެރޭގައި އިންނަ މީހަކަށްވެސް އިހުސާސް ކުރެވޭނެއެވެ. އާއްމުކޮށް މާހައުލުގައި ހުންނަ ހޫނުކަމަށްވުރެ، ގަދަ އަދި ދިލަ ހޫނެއްގެ އިހުސާސް ކުރެވޭނެއެވެ. މި ހޫނުގައި ދާހިއްލުމާ ހޫނު އެރުން އެހާބޮޑަށް އިހުސާސް ކުރާކަށް ނުޖެހޭނެއެވެ. އެހެނީ މި ހޫނުގައި ވާނީ ދިލަ ކަމެކެވެ. ކުރެވޭނީ ހަނގަނޑު އަނދާ ކަހަލަ އިހުސާސެކެވެ.

މުސްކުޅިވެރިން ބުނާ ގޮތުގައި މިގޮތަށް ދިލަ ހޫނުގަނޑެއް ކުއްލިއަކަށް ވާނަމަ، އޭގެ މާނައަކީ އޭގެ އިރުކޮޅެއް ފަހުން ވިލާގަނޑެއް ހަދާ ވިއްސާރަ ވެހޭނެެއެވެ.

މިކަމުގައި ސައިންޓިފިކަލީ، ގޮތުން ބަލާނަމަ މިއީ ހަމަ ތެދު ވާހަކަ އެކެވެ. އެހެނީ މިކަމުގައި ސާބިތު ހެކިތައް ވާތީއެވެ. އުޑުގައި ހުންނަ ވިލާތަކުގައި ފެން ހުންނަނީ އާވީގެ ގޮތުގައެވެ. އޭގެ ދިޔާ ތާސީރަކު ނޫނެވެ. އެހެންކަމުން ވާރޭ ވެހުމަށްޓަކައި މި އާވީގެ ގޮތުގައި ހުރި ފެންތައް، ދިޔާ ފެނަށް ބަދަލުވާން ޖެހެއެވެ.

އާވި، ފެނަށް ބަދަލުވާ މަރުހަލާ އަކީ އެ މަރުހަލާއެއްގައި ޖައްވަށް ގިނަ ހަކަތަ ތަކެއް ދޫވެދާ މަރުހަލާ އެކެވެ. މި މަރުހަލާގައި ޖައްވަށް ދޫވެގެންދާ ހަކަތަ ތަކުގެ ރައްދު ނަތީޖާއެއްގެ ގޮތުން، އުފެދެނީ ހޫނެކެވެ. ނުވަތަ "ހީޓް އެނާޖީ" އެކެވެ. އެހެންކަމުން އެ ވިލާގަނޑަކުން ވާރޭ ވެހުމުގެ ކުރިން، މި ހޫނު ޖައްވު ތެރޭގައި ފެތުރިގަނެއެވެ.

ދިރާސާވެރިން ފާހަގަ ކުރާގޮތުގައި މިގޮތަށް ހޫނު އިހުސާސް ކުރެވޭނީ އެބަޔަކާ ކައިރި ހިސާބެއްގައި އުފެދި ފައްކާވާ ވިލާގަނޑަކުން އެކަނި ކަމަށެވެ. މާ ދުރުން އަންނަ އަދި ވެހެމުން އަންނަ ވިލާގަނޑަކުން މި ހޫނުގެ އިހުސާސް ކުރަން ނުޖެހޭނެއެވެ. 

ސައިންޓިފިކަލީ މިކަންކަން މިހެން ހުރުމާއެކު، އަހަރެމެންގެ އިސްރަށްވެހިން މި ކިޔާ އެއްޗެއްގައި އޮށްޓަރެއް ހުންނަ ކަން އެބަ އެނގެއެވެ. އެހެންކަމުން ދިލަ ހޫނުގަނޑެއް މާހައުލުގައި އުފެދި އިހުސާސް ކުރަން ޖެހިއްޖެނަމަ، ވިއްސާރައިގެ ކޮޅުމަތި ފެނުނީ ކަމަށް ދެކެވިދާނެއެވެ.