މީސްމީޑިޔާގައި ތަފާތު ހަބަރުތަކާ ވާހަކަތައް އަބަދުވެސް ދަނީ ދައުރުވަމުންނެވެ. މިއީވެސް އެފަދަ ވާހަކައެކެވެ. މިއީ ޖަރުމަނުގެ ޒުވާނަކަށް ދިމައިވި ހާދިސާއެކެވެ.

އަހަރެމެން އާއްމުކޮށް ފިހާރަތަކަށް ގޮސް އެއްޗެހި ގަންނަ އިރު، އޭގެ މުއްދަތު ހަމަވާ ތާރީހަށް ބެލޭ މިންވަރު ވަރަށް މަދެވެ. ނަމަވެސް އެއީ މުހިއްމު ކަމެކެވެ. ޖަރުމަނުގެ މި ޒުވާނާއަށްވެސް ވީ މިފަދަ ކަމެކެވެ. އުމުރުން 23 އަހަރުގެ ޒޫކް ލޮރެންސް އާދައިގެ މަތިން ވިޔަފާރި ކުރާ ފިހާރައިން ވިޔަފާރިކޮށްގެން އައީ އާދައިގެ މަތިން އޭނާ ގަންނަ އެއްޗެހި ގަނެގެންނެވެ.

ދަތް އުނގުޅާ ބޭސް ވެސް ހުސްވެފައި ހުރުމާއި އެކު ފިހާރައިން ދަތް އުނގުޅާ ބޭސްފުޅިއެއްވެސް ގަނެގެން ގެނައެވެ. އާދައިގެ މަތިން ދަތްވެސް އުނގުޅާ ހަދިއެވެ. 

އޭގެ ގާތްގަނޑަކަށް ހަފްތާއެއް ފަހުން ހިރުގަނޑުން ލޭ އަންނަން ފެށިއެވެ. ޑަކްޓަރަށް ދައްކާ ބޭސް ބޭނުން ކުރިއެވެ. ނަމަވެސް ރަނގަޅެއް ނުވިއެވެ. ދެންވެސް އޭނާ އިތުރު ޑަކްޓަރުންނަށް ދެއްކިއެވެ. ހިރުގަނޑު އަންނަނީ ދުވަހަކަށްފަހު ދުވަހެއް ބަލިކަށިވަމުން ކަމަށް ޑަކްޓަރުން ބުނަމުން ދިޔައެވެ. އަދި އަނގައިގެ ސާފުތާހިރުކަން ދެމެހެއްޓުމަށް އަނގަ ދޮވުމާއި އެކު ދަތްދައްވެސް ބަލައިގެން މަޑު މަޑުން އުނގުޅަން ބުންޏެވެ. 

ފަރުވާ ކުރަމުން ދަނިކޮށް ހެލެން ފެށީ އޭގާގެ ފޭރާ ދަތެކެވެ. އަނިޔާއެއް ނުލިބެއެވެ. ނަމަވެސް އެ ދަތް ހެލެން ފެށީ ކުޑަ ދުވަސްކޮޅެއްގެ ތެރޭގައެވެ. ލަސްނުކޮށް ޑަކްޓަރަށް ދައްކަން އޭނާ ދިޔައެވެ. ނަމަވެސް ކަންދިމާ ކުރި ގޮތުން ޑަކްޓަރަށް ދެއްކުނީ އޭގެ ދެ ދުވަސް ފަހުންނެވެ. އޭރު އޭނާގެ އަނގައިގާ ނުހެލޭ ދަތެއް ނެތްކަމަށް އޭނާ ބުންޏެވެ. އޭރު ޑަކްޓަރުންނަށްވެސް ވާނުވާ އެއް ނޭނގުނެވެ. ނަމަވެސް އެއްމެ ފަހުން ޒޫކް ދެއްކި ޑަކްޓަރުގެ ލަފާގެ މަތިން ދަތް އުނގުޅާ ބޭސް ބަދަލު ކުރިއެވެ. 

ބޭސްފުޅި ބަދަލު ކުރަމުން ބޭސް ފުޅީގެ މުއްދަތު ހަމަވާ ތާރީހު ބަލާލިއެވެ. އެއީ އޭގެ އަހަރެއް ކުރިން މުއްދަތު ހަމަވެފައިވާ ބޭސްފުޅިއެކެވެ. ޒޫކް އޭނާގެ ޑަކްޓަރާ މި ވާހަކަ ހިއްސާކުރުމުން، ޑަކްޓަރުގެ ބަހަކަށްވީ، ޒޫކްގެ ހިރުގަނޑު ބަލިކަށިވެ، ދަތްތައް ހެލެން ފެށީ އެ މުއްދަތު ހަމަވެފައިވާ ބޭހުން ދަތް އުނގުޅުމުން ކަމަށެވެ. އޭގައި ހުންނަ ކެމިކަލްތަކުގެ މުއްދަތު ހަމަވުމުން އޭގެ އަސްލަށް ބަދަލުތަކެއް އަންނާނެ ކަމަށާއި އެކަމުގެ ސަބަބުން އެފަދަ ގެއްލުންތަކެއް ލިބިދާނޭ ކަމަށް ޑަކްޓަރުވަނީ ބުނެފައެވެ.

މިއަދު ޒޫކް ގެ ދަތްތައް ވަރުގަދަ އެވެ. އޭނާ ބުނާގޮތުން، މުއްދަތު ހަމަވެފައިވާ ބޭސްފުޅިއަކުން ދަތް އުނގުޅުމުން ދަތްކޮޅު ނުފޭބީ ހަމަ ކިރިޔާ އެވެ! އޭނާގެ ނަސޭހަތަކީ ފިހާރަތަކުން އެފަދަ ތަކެތި ގަންނަ އިރު، އޭގެ މުއްދަތުހަމަވާ ތާރީހު ހުރިހާ އެންމެންވެސް ބެލުމެވެ. އޭނާ ބުނާ ގޮތުގައި ވިޔަފާރިވެރިން މުއްދަތަކަށް ނުބަލާނެއެވެ. އެމީހުން އުޅޭނީ ފައިސާ އާއި ހެދިގެންނެވެ.

ހަވާލާ: މެޑިކަލް ނޮލެޖް