މި ދިވެހި ރާއްޖޭގައި އެތައް ހިދުމަތްތަކެއް ތަފާތު ތަންތަނުގައި ތަފާތު އަގުތަކުގައި އަންނަނީ ދެމުންނެވެ. މިފަދަ ގިނަ ހިދުމަތްތަކާއި މެދު ރައްޔިތުން ހިތްހަމަޖެހުނެއް ކަމަކު، ޝަކުވާ ކުރާ ރައްޔިތުންނަކީ މަދުބައެއް ނޫނެވެ. މި ޝަކުވާތަކުގެ ރާގަށް ބަލާއިރު، ގިނައިން ކުރެވެނީ ހިދުމަތްތަކުގެ އަގު ބޮޑުކަމުގެ ޝަކުވާއެވެ. އަދި އެ ނެގޭ އަގާއި އެއްވަރަށް ހިދުމަތް ނުދެވޭކަމުގެ ޝަކުވާއެވެ.

ހިދުމަތްތަތަކީ ދެގޮތަކަށް ދެވިދާނެ އެއްޗެކެވެ. އެއްގޮތަކީ ވިޔަފާރި އުސޫލުން އެކަން ކުރުމެވެ. އަނެއް ގޮތަކީ ދަރުމައަށް އެކަން ކޮށްދިނުމެވެ. ވިޔަފާރިއުސޫލުން ހިދުމަތެއް ދޭ އިރު، އެ ހިދުމަތަކުން ނަގާ އަގަކީ އެ ވިޔަފާރިއެއްގައި ފައިދާ ހޯދަން އޮންނަ މަގެވެ. ވީ އިރު މި އަގަކީ އެއާއި މެދު ތަފާތު ނަޒަރުތަކުން ދެކެވި، ތަފާތު އެކި ގޮތްގޮތަށް ވާހަކަ ދެއްކޭނޭ އެެއްޗެކެވެ.

ރާއްޖޭގައި ވިޔަފާރި އުސޫލުން ހިދުމަތްތައް ދެމުންދާ ބައެއް ފަރާތްތަކުން އެ ހިދުމަތްތަކަށް ނަގާ އަގު ވަރަށްވެސް ބޮޑެވެ. އަގު ބޮޑުވުމަކުން އެއްވެސް މީހެއްގެ ޝަކުވާ އެއް ނެތެވެ. ނަމަވެސް ޝަކުވާ ކުރެވެން ފަށަނީ އެ ނަގާ އަގާއި އެއްވަރުގެ، ނުވަތަ އެ ފެންވަރުގެ ހިދުމަތްތައް އެތަންތަނުން ނުލިބޭތީއެވެ. ނުވަތަ ލިބޭ ހިދުމަތްތަކުގައި ލަސްކަމާއި ފުރިހަމަކަން ނުހުންނާތީއެވެ. އާދޭހެވެ! ފަހަރުގައި އެ ފުރިހަމަކަން ނުހުރެދާނެއެވެ. ނަމަވެސް ފުރިހަމަ ކުރުމަށާއި އަވަސްކުރުމަށް އިސްކަން ދޭން ވާނެ ނޫން ހެއްޔެވެ؟

ބޮޑެތި އަދަދުތަކުން ފައިސާ ނެގުމަށްފަހު ހިދުމަތް ދެވޭއިރު، އާދައިގެ ކަންކަމުގައިވެސް އެތައް ވަގުތަކާ އެތައް ދުވަހެއް އެބަ ހޭދަވެއެވެ. ޖެހޭ ކުދި ކުދި މައްސަލަތައް ހައްލު ނުވެ އެތައް ޒަމާނެއް ހޭދަވެއެވެ. ފިނިކުރަން ޖަހާ ފަންކާ އެނބުރެނީކީއެއް ނޫނެވެ. އަލިކުރަން ދިއްލާ ބޮކިތައް ފިޔަޖަހަނީއެވެ. ފިނިވައި ފޮނުވައިދޭ އޭސީތައް ހުއްޓި ގާވެފައެވެ. ފުރާޅުމަތިން ފެން ފައިވަނީއެވެ. ފާހާނާތައް ނުތާހިރުކަމުން ބޯދިއްކޮށްލަން ނުކެރެއެވެ. މިއީ އަޅުގަނޑުގެ ވާހަކައެއް ނޫނެވެ. މިއީ މީސްމީޑިޔާގައި މީހުން ލިޔެ އާއްމުންނާ ހަމައަށް ގެނެސްފައި ހުންނަ ޝަކުވާތަކެވެ. މިކަންކަމުގައި ފަހަރުގައި ދޮގާއި ތެދުވެސް ހުރެދާނެއެވެ. މިކަމުގައި މުހިއްމީ އެދެވޭ ހައްލެކެވެ.

ނެގޭ ބޮޑު އަގާއި އެއްވަރަށް ދެވޭ ހިދުމަތުގެ ފެންވަރުވެސް ރަނގަޅުވާން ޖެހޭނެއެވެ. އަވަސްވާން ޖެހޭނެއެވެ. ނޫންނަމަ އާއްމުން ޝަކުވާ ކުރާނެއެވެ. އެހެނީ މިޒަމާނުގައި އާއްމުންނަށް އެނގޭ އެއް ކަމަކީ އެތަންތަންށް ވަންނަ ބޮޑު ފައިދާއެވެ. ބަޔަކު މުއްސަނދިވެދާ ކަމެވެ. އެހެންކަމުން މިކަމުގައި ހިދުމަތްތައް ދޭ ފަރާތްތަކުން ވިސްނަން ވާނެއެވެ. އާއްމުންގެ ނަފްރަތާއި، ނުރުހުމާއި، މަލާމާތާއި، ބަދުބަސްތަކާއި، އެސްފީނާއިން ސަލާމަތްވުމަށް މިކަންކަމަށް ވިސްނާ ފަރުވާތެރިވުމަކީ މުހިއްމު ކަމެކެވެ.