އިސްރާއީލުގެ ޒައިނިސްޓު ޔަހޫދީން، ފަލަސްޠީނުގެ ބިމަށް ގަދަކަމުން ވެރިވެގަނެ، އެ ބިމުގެ އަހުލުވެރިންގެ ނަސްލު ނައްތާލުމަށް މިހާރު ހިންގަމުންދާ ބޮޑު ގަތުލު އާއްމުގައި ފަލަސްޠީނުގެ އެތައް ބަޔަކު ވަނީ މި ދުނިޔެއާއި ވަކިވެގެން ގޮސްފައެވެ. ކުށެއް ނެތް މައުސޫމު ޅަ ކުދިންނާއި އަންހެނުންނަކީ މި ގަތުލު އާއްމުގެ ޝިކާރައެކެވެ. އާބާދީތަކާ އާއިލާތައް އެއްކޮށް ނައްތާލަމުންދާއިރު، އެތައް ބައެެްގެ ގެދޮރާ މުދާ އަންދާ އަޅިއަށް ހަދަމުން ދަނީ އެއްވެސް އިންސާނިއްޔަތު ކަމެއް ނެތިއެވެ.

އިސްރާއީލުގެ މި ލާއިންސާނީ އަނިޔާތަކާ ހަމަލާތަކުގެ ސަބަބުން ފަލަސްޠީނުގެ އެތައް ލައްކަ ބަޔަކު ވަނީ، އެބައިމީހުންގެ ގެދޮރުތަކުން ނުކުންނަން މަޖުބޫރުވެފައެވެ. މުދަލާ ގެދޮރު ދޫކޮށް، ރެފިއުޖީ ކޭންޕުތަކުގައި ތޮށްޖެހިގެން އުޅެން ވަނީ މަޖުބޫރުވެފައެވެ. ސާފު ބޯފެނާއި، ތާހިރުވާނެ ފެންވެސް ލިބުން ވަނީ ދަތިކަމަކަށް ވެފައެވެ.

އަލް-ޖަޒީރާ ނޫހުން ރިޕޯޓުކޮށްފައިވާ ގޮތުގައި ފަލަސްޠީނުގެ ގިނަ އަންހެނުން މިއަދު ދަނީ ޕީރިއެޑް ނުވާ ބޭސް ކަމުންނެވެ. މައްސަރުކަންކަން ދިމާނުވާ ބޭސް ބޭނުން ކުރަމުންނެވެ. އެ ނޫހުގައި ރިޕޯޓުކޮށްފައިވާ ގޮތުން ފަލަސްޠީނުގެ އަންހެން ކަނބަލުން މިފަދައިން އަމަލުކުރަން މަޖުބޫރުވީ މައްސަރުކަންކަމުން ސާފުތާހިރުވާނޭ ފެން ލިބެން ނެތުމާއި، އެ ދުވަސްވަރު ބޭނުން ކުރާނޭ "ޕެޑް" ފަދަ ތަކެތި ލިބެން ނެތުމާއި އެކުގައެވެ.

ފަލަސްޠީނުގެ ޙާން ޔޫނިސްގެ ދެކުނު ކޮންޕްލެކްސްގައި މަސައްކަތް ކުރަމުން އަންނަ، އަންހެނުންގެ ހާއްސަ ޑަކްޓަރެއް ކަމަށްވާ ޑރ. ވާލިދް އަލް ޙައްޠާބާއި ހަވާލާދީ އަލް-ޖަޒީރާގައި ރިޕޯޓުކޮށްފައި ވަނީ ފަލަސްޠީނުގެ ގިނަ އަންހެނުން މިއަދު "ނޯއެތިސްޓްރޯން" ނަމަކަށް ކިޔާ ބޭހެއް ބޭނުން ކުރާ ކަމަށެވެ. މިއީ އަންހެނުންގެ ހަށިގަނޑުގައި ހުންނަ ހޯމޯނުތަކަށް ބަދަލުގެނެސް، މައްސަރުކަންކަން ދިމާވުން ލަސްކުރުވާ ބޭހެކެވެ.

މައްސަރުކަންކަން ކުރިމަތިވެފައިވާ އަންހެނާއަށް ސާފުތާހިރު ކަމަކީ ވަރަށްވެސް މުހިއްމު ކަމެކެވެ. އެހެންކަމުން ސާފުތާހިރު ވެވެން ނުހުންނަ ނަމަ، މައްސަރުދުވަސްވަރުގައި އެއީ އަންހެނާއަށް އުފުލަން ބުރަ، ވޭނީ ތަކުލީފުތަކެވެ. މާތް ﷲ ފަލަސްޠީނަށް އަމާންކަން މެދުވެރި ކުރައްވާ ނަޞްރު ދެއްވާންދޭވެ!