ދުނުޔޭގައި އެތަކެއް ކަމެއް ކުރުމަށް އިންސާނާ ބޭނުން ވެއެވެ. އެގޮތުން ބައެއް ކަންކަން ކުރުމަށް ވަރަށް ދުރާލާ ތައްޔާރުވެސް ވެއެވެ. އަދި އަނެއްބައި ކަންކަން ކުރަނީ ހަމަ ކުއްލިއަކަށް އިންތިޒާމުކޮށް ރާވާލައިގެންނެވެ. އެހެންނަމަވެސް، ކަންކަން ކުރަން، ކުރާ ޕްލޭނާ އެއްގޮތަށް ކުރެވެނީ މަދު ކަމެކެވެ. މިކަމުގައި ސަބަބުތަކެއް އެބަ ހުއްޓެވެ.

ކޮންމެ ކަމެއް ކުރުމަށްވެސް ކޮންމެސް ޕްލޭންތަކެއް އަހަރަމެން ކުރަމުއެވެ. މި ޕްލޭން ތަކާ އެއްގޮތަށް އެ ކަންކަން ނުވާ އެއް ސަބަބަކީ ދިމައިވާ ކުއްލި ހާލަތްތަކެވެ. ފަހަރުގައި އެއީ ގުދުރަތީ ކަމަކަށް ވެދާނެއެވެ. ނުވަތަ މީހަކު ގަސްތުގާ ކުޅަ ކަމެއްގެ ނަތީޖާގެ ސަބަބުން ދިމައިވާ ކަމެއް ކަމުގައިވެސް ވެދާނެއެވެ. 

ކަމެއް ކުރުމަށް ޕްލޭން ކުރާއިރު، މާ ގިނަ މީހުންގެ ހިޔާލާ މަޝްވަރާގެ މަތިން ޕްލޭން ކުރުމަކީ ބައެއް މީހުން ދެކޭ ގޮތުގައި މޮޅު ކަމެކެވެ. ނަމަވެސް އަމަލީ ގޮތުން އެކަންކަމާ ކުރިމަތި ލާން ވުމުން، ހިޔާލު ގިނަ ވުމަކީ ކުރާ ޕްލޭނާއި އެއްގޮތަށް ކަންކަން ނުހިނގާ އެއް ސަބަބެެވެ. 

އަހަރެމެންގެ ތެރެއިން ގިނަ މީހުންނީ ހިޔާލީ ދުނިޔެއަށް މާ ބޮޑަށް ލޯބިކުރާ ބައެކެވެ. އެހެން ވަނީ ސަބަބުތަކެއް ނެތިއެއް ނޫނެވެ. މީސްމީޑިޔާއިން ފެންނަ މަންޒަރުތަކުގެ ސަބަބުނެވެ. އެެހެންކަމުން، ކަމެއް ކުރަން ޕްލޭން ކުރާއިރު، ޕްލޭން ކުރެވެނީ ހިޔާލީ ދުނިޔެއްގައެވެ. ކުރެވޭ ހިޔާލުތައް އާސުމާނުގައި ބަހައްޓައިގެންނެވެ. އެހެންކަމުން އަމަލީގޮތުން އެކަން ކުރަން ވުމުން، އޮންނަނީ އެކަމެއް ނުވެފައެވެ.

ޕްލޭނާ އެއްގޮތަށް ކަންކަން ނުހިނގާ އަނެއް ސަބަބަކީ ތަޖުރިބާ މަދުވުމެވެ. ބަޔަކު ކުރާތީ ތިމަންނާމެނަށްވެސް ކުރެވޭނޭ ކަމަށް ހިތާ ޕްލޭން ކުރެއެވެ. ނަމަވެސް އެކަން ކުރަން އަމަލީގޮތުން އުޅެން ވުމުން، އެކަމުގެ ތަޖުރިބާ ނެތުމާއި އެކު ފަސޭހަ ކަމާއެކު އެކަމެއް ވާކަށް ނޯވެއެވެ. ދެން ފެންނަނީ އިސްޖާލާ އެކަމެއް ނުކޮށް ދޫކޮށްލާ މަންޒަރެވެ. ޕްލޭން ފެއިލްވާ ތަނެވެ.

ކަންނެތް ކަމަކީވެސް ޕްލޭން ފެއިލް ކޮށްލާ ކަމެކެވެ. ކަންނެތް ކަމުގެ ސަބަބުން ކޮށްފައި ހުންނަ ޕްލޭނާއި އެއްގޮތަށް ކަންކަން ނުރާތަން ފެނެއެވެ. ބުރަކަމުންނެވެ. އަނެއް ސަބަބަކީ ކަން ކުރާނޭ ބަޔަކު ނުހޯދާ ޕްލޭން ކުރުމެވެ. އަނެއް ކަމަކީ ވަގުތާ ހާލަތަށް ރިއާޔަތް ކުރުމެއް ނެތި ޕްލޭންތައް ތަރުތީބު ކުރުމެވެ. 

މި ހުންނަނީ ހައްތަހާވެސް ޕްލޭނާއި އެއްގޮތަށް ކަންކަން ނުހިނގާނެ ސަބަބުތަކެވެ. އަހަރެމެންގެ ތެރެއިން ގިނަ މީހުން ކުރާ ގިނަ ކަންކަން ހިނގަނީ އެމީހުން ޕްލޭން ކުރާ ގޮތަކަށް ނޫނެވެ. މިއީ ހިތި ނަމަވެސް ހަގީގަތެކެވެ. އެހެންކަމުން ދެންވެސް ކަމެއް ޕްލޭން ކުރާއިރު، އިސްވެ މި ބުނެދިން ބައެއް ސަބަބުތަކަށް ފަރުވާތެރިވެ، ސަމާލުވެ، ޕްލޭން ކުރާށެވެ. އޭރުން ޕްލޭނާއި އެއްގޮތަށް އެކަމެއް ވުމުވެ ފުރުސަތު ވަރަށް ބޮޑުވާނެއެވެ.