ދަރަންޏަކީ ކޮންމެ މީހެއްގެ ބޮލުގައި އެޅިފައި އޮތެއްކަމަކު ހަމަ ދަރަންޏެކެވެ. ދަރަނި ބޮލު އެޅޭ މީހާގެ މަގާމާ އޭނާގެ މާލީ ތަނަވަސްކަމަކަށް ދަރަނި ފަރުވާލެއް ނުބަހައްޓާނެއެވެ. ދަރަނި އަދާ ކުރާނޭ ތަނަވަސްކަން ހުރިތޯ ނެތްތޯއެއްވެސް ދަރަނި ނުބަލާނެއެވެ. ކޮންމެ މީހެއް ނެގި ނަމަވެސް ދަރަނި ވާނީ ހަމަ ދަރަންޏަށެވެ.

އާދޭހެވެ! ދަރަނި އަދާކުރުމުގައި ތަނަވަސް މީހުންނަށްވުރެ، އަތްމަތި ދަތި މީހުންގެ ސަމާލުކަމާއި ޝައުގުވެރިކަން މާ ބޮޑެވެ! އަމިއްލަފުޅަށް ވިސްނާލާށެވެ! ކުޑަކޮށް ތިމާ ދަންނަ މީހުންނާއި ގާތް މީހުންގެ ހާލަތާ މެދު ވިސްނާލާށެވެ. ތިމާ އާއި އެކު، ނުވަތަ ތިމާއަށް އެނގިގެން މީހުން ކޮށްފައު ހުންނަ ދަރަނީގެ މުއާމަލާތްތަކާއި މެދު ވިސްނާލާށެވެ. މި ދެންނެވި ފަދައިން ކަންކަން ހިނގައޭ މިހާރު ހިތަށް އަރާނެއެވެ. ކުޑަކޮށް ބޮލުގައި ޖަހާލާނެއެވެ. 

އާނއެކެވެ! އެއީ ތެދެކެެވެ. ކިރިޔާ ފުދިގެން އުޅޭ މީހާ އޭނާގެ ދަރަނި އަދާކުރާލެއް އަވަހެވެ. މި ދައްކަނީ އާއްމު ހާލަތުގެ ވާހަކައެވެ. ފަހަރުގައި މިފަދަ މީހަކު، މާ ބޮޑަށް ދަރަނިވެރިވެފައިވެސް ހުރެދާނެއެވެ. ނަމަވެސް ހަމަ ގިނަ މީހުންނީ އަވަހަށް ދަރަނި އަދާކުރަން ޝައުގުވެރިވާ މީހުންނެވެ. މިކަންކަން މިހެން ހުއްޓެއް ކަމަކު، ތަނަވަސް މީހާ، ފުދިގެން އުޅޭ މީހާ، ގިނައިން ލިބޭ މީހާ، އޭނާ ނަގާ ދަރަނި އަދާކުރުމުގައި ފަރުވާ ކުޑަކުރާތީ ފެނެއެވެ. މިއީވެސް ޖުމުލްކޮށް ޖުމުލަ ހާލަތެވެ. ނަމަވެސް މީގެ ތެރޭގައިވެސް ދަރަނި އަދާކުރުމަށް ފަރުވާތެރި މީހުން އުޅެދާނެއެވެ.

އަތްމަތި ދަތިކަމުން ފަގީރު ކަމުގެ ރަހަ ލުމަކީވެސް ގަބު ކަމެކެވެ. ތަނަވަސްކަމުން ގޮސް މުއްސަނދިކަމުގެ ރަހަ ލުމަކީވެސް ގަބު ކަމެކެވެ. މިކަންކަން މިހެން އޮތަތީވެ، އިސްލާމް ދީނުގައިވެސް އައިސްފައިވަނީ ހުރިހާ ކަމެއްގައިވެއް މެދުމިން އިހްތިޔާރު ކުރާށެވެ. ދަރަނީގެ ވާހަކައިގައިވެސް އޮތީ މިފަދަ ހާލަތެކެވެ. މެދުމިނުގެ އާމްދަނީއެއް ލިބޭ މީހާ ނުވަތަ އެއަށްވުރެ ތަންކޮޅެއް ދަށް އާމްދަނީއެއް ލިބޭ މީހާ އޭނަަގެ އަރަންޏާއި ދަރަންޏަށް ވަރަށް ބޮޑަށް ފަރުވާތެރި ވެއެވެ. ނަމަވެސް ފަގީރުކަމުގައިވާ މީހާ އާއި ތަނަވަސްކަމުގައިވާ މީހާ، ދަރަންޏަށް ސަމާލުކަން ނުދޭ ކަމީ ދުނިޔެ ދަންނަ ހަގީގަތެކެވެ. އިސްވެ ބުނެވުނު ފަދައިން، ފަގީރު ކަމާއި މުއްސަނދިކަމުގެ ސަބަބުން އިންސާނާގެ ވިސްނުމާއި ހިޔާލު ގަބު ވަނީއެވެ. އީމާންތެރިކަމާއި އިހްސާންތެރިކަންވެސް ގަބު ވަނީއެވެ. އެހެންކަމުން ކޮންމެ މީހަކީވެސް މެދުމިނުގެ ދިރިއުޅުމެއް އުޅުމަށް ލޯބިކޮށް މަސައްކަތްކުރާ މީހެއް ކަމުގައި ވުމީ މުހިއްމު ކަމެކެވެ.

ދަރަންޏަކީ އޭގެ ނުރައްކާ ބޮޑު އެއްޗެކެވެ. ދީނީ އިލްމުވެރި ބޭކަލުން ވިދާޅުވާގޮތުގައި މީހެއްގެ ދަރަންޏެއް އަދާ ނުކޮށް އޮއެމެ، އޭނާ މަރުވެއްޖެނަމަ، އެ ދަރަނި އަދާކުރުމަށް ދާންދެން އޭނާ ކަންވަޅުގައި އެކޮޅުކޮޅުން އެލުވިފައި ހުންނާނެއެވެ. މިއީ ކޮންފަދަ ބިރުވެރި ކަމެއްތޯއެވެ. އެހެންކަމުން ކައްވަޅުގެ މި އަޒާބުން ސަލާމަތްތެރިވެ ހުރުމަށްވެސް ދަރަނި އަދާކުރުން އަވަސްވެގަންނަން ޖެހޭނެއެވެ.