އައުއަހަރަކަށް މަރުހަބާ ކިޔަނީ ނިމި ދިޔަ އަހަރަށް އަލްވަދާއު ކިޔަމުންނެވެ. ދުނިޔޭގެ އާދައަކީވެސް މިއީއެވެ. ބަދަލު ވުމެވެ. އައު ވުމެވެ. ފަސްދީ ދިއުމެވެ. މާޒީއެއް އުފެދުމެވެ. ހަޔާތެއް ދައުރުވުމެވެ. ނިމުމަކާއި ފެށުމެކެވެ. ނިމިދިޔަ ކަންކަން ވެ ނިމުނީއެވެ. ފެށުނުކަންކަން ހެޔޮކޮށް ގެންދިއުމުގެ އިހްތިޔާރު އޮތީ އިންސާނާގެ އަތްމަތީގައެވެ. މިފަދައިން ނިމިދިޔަ އަހަރުވެސް އެ ނިމުނީއެވެ. ދެނެއް އެ އަހަރަކައިގެން އުޅުމެއް ނެތެވެ. ދެން އޮތީ މި ފެށުނު އައު އަހަރުގެ ކަންކަން ހަރުދަނާކޮށް ތަރުތީބުކޮށް ކުރިއެރުވުމެވެ.

އަލްވަދާއު ކިޔޭ ކޮންމެ އެއްޗަކާއި ތަނަކާއި ބަޔަކާއި ކަމަކީ އެތައް ހަނދާންތަކަކާއި އެތައް ތަޖުރިބާ ތަކަކާއި އެތައް ފިލާވަޅުތަކެއް އޭގައި އެކުލެވިގެންވާ ތަކެއްޗެވެ. އައު އަހަރަކަށް މަރުހަބާ ކިޔާއިރު، ނިމިދިޔަ އަހަރުގެ މިފަދަ ހަނދާންތަކާއި އިބުރަތްތަކާއި ތަޖުރިބާ ތަކާއި ފިލާވަޅުތަކަކީ އައު އަހަރަށް ނުހަނު ބޭނުންތެރި ތަކެއްޗެވެ. ނިމިދިޔަ އަހަރު، އަހަރެމެންނަށް ދޫކޮށްދިޔަ މި ހަދިޔާތަކުން އެ އަހަރަށް ސީދާ ފައިދާއެއް ނުކުރިއެއް ކަމަކު، މި ފެށުނު އައު އަހަރަށް އެތައް ގޮތަކުން، މި ހަދިޔާތަކުން ފައިދާ ކުރާނެއެވެ.

ނިމިދިޔަ އަހަރަކީ މާޒީއެވެ. އެއީ މުސްތަގުބަލު ބަލާ ލޯގަނޑެވެ. ނިމިދިޔަ އަހަރު އަހަރެމެންނަށް ދިން ހަދިޔާތަކަކީ މި ފެށުނު އަހަރުގައި ކުލަޖައްސާ އުޖާލާކުރަން ލިބުނު ހަދިޔާތަކެވެ. ކަނާއަތަކާއި ވައަތަށް ލިބުނު ހަދިޔާތަކަކީވެސް ހަމަ މިމޭރުމުން ބޭނުން ކުރެވިދާނެ ހަދިޔާތަކެކެވެ. މިކަމުގައި އޮތީ އިންސާނާގެ ބުއްދި އިސްކުރުމެވެ. ކާމިޔާބީއަށް މަގު ކޮށުމުގައި ތަކުރާރުކޮށް އެއް ތަނެއްގައި މާ ގިނައިން ކަތިވަޅި ނުތަޅާށެވެ. އެކަން ދަސްކޮށްދެނީ ނިމިދިޔަ އަހަރުގެ ތަޖުރިބާ އެވެ. ފިލާވަޅުތަކެވެ. 

އާދޭހެވެ! އަހަރެއް ފާއިތުވެ ދިޔުމަކީ އުފާވެރިކަމަކާއި ހިތާމަވެރިކަމެއްވެސް އެކަމުގައި މުލާގާތު ކުރާނެ ކަމެކެވެ. އުފަލަކީ މުޅިން އައު އަހަރަކަށް ދުނިޔެ ކިޔާ މަރުހަބާއެވެ. ހިތާމައަކީ ތިމާގެ ހަޔާތުން އެއް އަހަރު ފާއިތުވެ ދިއުމެވެ. ދުނިޔެއާއި ތިމާގެ އުމުރު ކުރުވުމެވެ. މިކަންމިހެން ހުރުމާއި އެކު، އަޒުމް ކަނޑައަޅަންވީ އެއް ކަމަކީ މި ފެށުނު އަހަރަކީ ނިމިދިޔަ އަހަރަށްވުރެ ހުރިހާގޮތަކުން މޮޅު، ކާމިޔާބު އަހަރެއް ކަމުގައި ހެދުމެވެ. މިކަން ކުރުމަށްޓަކައި ނިމިދިޔަ އަހަރު ދަސްކޮށްދިން ފިލާވަޅުތަކާއި ދަރުސްތަކަކީ ވަރަށްވެސް އަގުހުރި ތަކެއްޗެވެ. މިދިޔަ އަހަރުގެ ތަޖުރިބާތަކާއި އިބުރަތްތައްވެސް ހަމަ މިފަދައެވެ. އެހެންކަމުން މި ފެށުނު އައު އަހަރަށް މަރުހަބާ ކިޔަންވާނީ ދިރިއުޅުމުގައި ކުރިއެރުމެއް އެދިގެންނެވެ. ދިރިއުޅުމުގައި ފަހަތަށް އެޅޭ ފިޔަވަޅެއްގެ ގޮތުގައެއް ނޫނެވެ!