ދުނިޔޭގައި އިންސާނާ އުޅެމުންދާއިރު އަބަދުވެސް މައްސަލަތަކާއި ކުރިމަތިވާނެއެވެ. އުނި އެތައް ކަމަކާއި ބައްދަލުވާނެއެވެ. އެއީ ތިމާގެ އަމިއްލަ ނަފުސުގެ އުނިކަންތައްތަކާއި އެހެންމީހުންގެ އުނި ކަންތައްތަކެވެ. ދުނިޔޭގެ ދިރިއުޅުމުގައި މިއީ އެއްވެސް މައްސަލައެއް ނޫނެއެވެ. އެހެނީ މިއީ ދުނިޔޭގެ އާދައެވެ.

ކަންމިހެން ހުރުމާއި އެކު، މިފަދަ ކަންކަމުގެ މައްޗަށް އަބަދު ޝަކުވާ ކުރާ ބައެއްކަމުގައި އަހަރެމެން ވެގެން ނުވާނެއެވެ. އެހެނީ އުނި އެތައް ކަމަކާއި ފުރިހަމަނުވާ އެތައް ކަމެއް ތިމާގެ ކިބައިގައިވެސް ހުންނާނެތީއެވެ. އެހާރުން މިކަންކަމުގައި ޝަކުވާގެ އަޑު މަޑު ކުރަންވާނެއެވެ. އަބަދު އެހެންމީހުންގެ ޝަކުވާކުރަން ނުހަދާށެވެ. ތިމާއީ އެފަދައިން ޝަކުވާކުރާ މީހެއްނަމަ، ތިމާގެ ކިމައިގައި ހުރި މި އުނިކަންތައްތަކާއި ފުރިހަމަނޫން ކަންތައްތަކުގެ މައްޗަށް އެހެންމީހުން ޝަކުވާކުރާލެއް މާ ގިނަވާނެއެވެ.

މުޖުތަމައެއްގައި އިންސާނުން އުޅެން ޖެހޭނީ މުޖުތަމައު ގަބޫލުކުރާ ހަމަތަކަކާއި އުސޫލުތަކެއްގެ މަތީގައެވެ. މުޖުތަމައެއްގެ ސިފަ ޖަހާނީވެސް އޭރުންނެވެ. ކުދިކުދި މުޖުތަމައުތަކުގައި އެއްބަޔަކު އަނެއްބަޔަކަށް އަޅާލާ މަދަދުވެރިވުމީ އޮތް ކަމެކެވެ. އެނޫންނަމަ އެފަދަ މުޖުތަމައުތަކުގައި އެކުވެރިކަމެއް، އެއްބައިވަންތަ ކަމެއް ނުފެންނާނެއެވެ. ދިވެހިރާއްޖޭގެ ބައެއް ރަށްތަކުން މި މަންޒަރު އެބަ ހާމަވެއެވެ. ކުދިކުދި އާބާދީތަކުގައި އެކުވެރިކަމެއް ނެތެވެ. އެއްބައިވަންތަކަމެއް ނެތެވެ. ސަބަބަކީ އެ މުޖުތަމައުތަކުގައި އެއްބަޔަކު އަނެއްބަޔަކަށް އޮންނަންޖެހޭ އަޅާލުމާއި މަދަދުވެރިކަން ނެތިގެން ދިއުމެވެ. އެފަދަ މުޖުތަމައުތަކުން ފެނިގެންދަނީ އެއްބަޔަކު އަނެއްބަޔަކު ބަދުނާމު ކުރާތަނެވެ. ފަޟީހަތް ކުރާތަނެވެ. އެއްބަޔަކު އަނެއްބައެއްގެ ކުށް ހޯދާ އާއްމުކޮށް ބޭޒާރުކުރާތަނެވެ. މިއީ ދެރަވަރު ކަންކަމެވެ.

މިފަދައިން އިދިކީލަ ވިސްނުމުގައި ކަންކަން ކުރުމުގެ ބަދަލުގައި، އެފަދަ މުޖުތަމައުތަކުގައި އެއްބަޔަކު އަނެއްބަޔަކަށް އަޅާލާ، މަދަދުވެރިވެ، އެހީތެރިވެ، ހަނދާންކޮށްދީ، ބުނެދީ އޮޅުންފިލުވައިދޭނަމަ، އެފަދަ މުޖުތަމައުތަކުގެ އިޖްތިމާއީ ފޭރާން ކިހާ ސާފުވެފައި ނަލަވާނެތޯއެވެ. އިންސާނާގެ މި ތަސައްރަފު ފުދިފައިވާ ސިކުނޑިން ވިސްނާލުމުން މިކަން ފަހުމްވެދާނެއެވެ!

އާދޭހެވެ! އިހު ދިވެހި މުޖުތަމައުތަކުގައި އޮތް އެއްބައިވަންތަކަމާއި އެކުވެރިކަމަކީ މިފަދައިން އުފެދިފައިވާ އެކުވެރި ބަދަހި ގުޅުމެކެވެ. ފާޑު ކިޔުމާއި ފުރައްސާރަ ކުރުމާއި، މަލާމާތް ކުރުމާއި ފަޟީހަތްކޮށް ބޭޒާރު ކުރުމަކީ އޭރުގެ ދިވެހި މާ ފަރިތަ ކަންކަމެއް ނޫނެވެ. ނަމަވެސް ޒަމާނާއެކު އައި މި ބަދަލުތަކުގެ ނަތީޖާއަކީ ކޮންމެ މީހަކީވެސް، އެމީހެއްގެ ހިތުން ފުދިގެން އުޅޭ މީހެކެވެ. އެހެންކަމުން އަނެކާގެ އެއްވެސް އިހުސާސެއް ދެނެގަތުން އެއީ ލަދުވެތިކަމެއް ކަމުގައި ހީވެއެވެ.

ކުދިކުދި މުޖުތަމައުތައް އެއްބައި ކުރުމަށް، އެ މުޖުތަމައުތަކުގެ ތެރޭގައި އޮންނަ ގުޅުންތައް ހަރުދަނާކޮށް ބަދަހި ކުރާށެވެ. އެކުވެރިކަން އާލާކުރާށެވެ. އެއް ހަށިގަނޑެއް ފަދައިން މިސާލު ދައްކާށެވެ. އެއްބައެއް ވަންތަކަމުގެ ނަމޫނާ ދައްކާށެވެ. މިއީ ކުރަން މާ އުނދަގޫ ކަމެއް ނޫނެވެ. ތިބާގެ ހިތުގައިވާ ބޮޑާވެރިކަމުގެ ސިފަ، މަޑުމަޑުން ފުހެލާށެވެ. އެހާރުން ހިތްރިތި އޯގާތެރި، ރަހުމްކުރާ ބަޔަކު ކަމުގައި އަޅުގަނޑުމެން ވެދާނެއެވެ!