ހީލަތާއި މަކަރުން ފައިސާ ހޯދުމަކީ މުޅި ދުނިޔޭގައިވެސް މިއަދު އާއްމުވެފައިވާ ބޮޑު ބަލިމަޑުކަމެކެވެ. އެކަން ކުރާމީހުން އެކަން ކުރަނީ، އެކަމުގެ ނަތީޖާ އެބައިމީހުން ދެކޭގޮތުގައި މާ ހެޔޮވީމައެވެ. އެއީ އެކަމުން ލިބޭ ފައިސާ އިންތިހާއަށް ގިނަވީމައެވެ. މިގޮތަށް އޮޅުވާލައިގެން ފައިސާ ހޯދާ މީހުންނީ އެބައިމީހުންގެ މުޅި ދިރިއުޅުން އެކަމުގެ މައްޗަށް ބިނާކޮށްގެން އުޅޭ މީހުންނެވެ. އެއްވެސް ޖެހިލުމެއް ނެތިއެވެ.

ޒަމާން ކުރިއަރާ ގޮސްފައިމިވާ ގޮތުން، އޮޅުވާލުމާ މަކަރުހެދުންވެސް މިވަނީ އިންތިހާއަށް ކުރި އަރާފައެވެ. އޮޅުވާލައިގެން ވާހަކަ ދައްކަނީ ގާތް އެކުވެރިން ކަމުގައި ހެދިގެންނެވެ. އާއިލާ މީހުން ކަމުގައި ވެގެންނެވެ. އެބައިމީހުންހެ އަމިއްލަ "އިހްތިޞާސްގެ" ތެރެއިން، އެބައިމީހުނަށް ނޭނގި، އެބައިމީހުންގެ ނަމުގައި އެހެން މީހުންނާ މުއާމަލާތްކުރެއެވެ. ފޯނު ބޭނުންކޮށްގެންނެވެ. ފޯނުގެ އެކި އެކި އެޕްލިކޭޝަންތައް ބޭނުންކޮށްގެންނެވެ. އަސްލުގައި ކަން ކުރާ މީހުނެއް ނޫހޯދެއެވެ. ކަން ކުރާ މީހުންނަށްވެސް އެކަން އެނގެއެވެ. 

މިގޮތަށް ފޯނު ބޭނުން ކޮށްގެން، ޝަހްސު އޮޅުވާލައިގެން އެ އޮޅުވާލެވުނު ޝަހުސެއްގެ އެކުވެރިންނާއި އާއިލާ މީހުންނާ މުއާމަލާތްކޮށް، ފައިސާއަށް އެދެއެވެ. ގާތް މީހެއް ކަމުންނާއި އާއިލީ މީހެއް ކަމުން، ކަމަކު ބުނުމުން ޖެހިލުމެއް ނެތި އެ ބުނާ އަދަދެއްގެ ފައިސާއެއް، އެ ބުނާމީހެއްގެ އެކައުންޓައް ޖަމާކޮށްލެވެއެވެ. އެހިސާބުން އެމީހަކު ގެއްލެއެވެ. ދެން އެ އޮބާލީއެވެ. ވީނުވީ އެއް ނޭނގެއެވެ. އެ ފައިސާ ހޯދޭނޭ ހަމަ އެއްމެ މަގެއްވެސް އަލިވެފައި އޮންނަހެނެއް ހިޔެއް ނުވެއެވެ.

އަނެއްބަޔަކު މަކަރު ހަދާ އޮޅުވާލަނީ ކޮންމެވެސް ފުލެޓެއް ނުވަތަ ކޮންމެވެސް އިނާމެއް ލިބުނު ކަމަށް ބުނެއެވެ. އަނެއްބަޔަކު އޮޅުވާލަނީ ކޮންމެވެސް އެހެންމީހެއްގެ އެކައުންޓާ އަނެކާގެ އެކައުންޓު ލިންކުވީ ކަމަށް ބުނެއެވެ. މިއީ މިގޮތަށް އޮޅުވާލާ އޮޅުވާލުންތަކާއި މަކަރުވެރި ހީލަތްތަކެވެ.

ބަރަހަނާ މަންޒަރުތަކާ ވީޑިއޯތަކުގެ ދަޅައިގާ ޖައްސުވާ، އެތައް ބައެއްގެ އަތުން އެތައް ފައިސާއެއް ދަނީ ފޭރެމުންނެވެ. ބަރަހަނާ މަންޒަރުތަކަށް ދެވިހިފާފައިވާ އެތައް ޒުވާނުންނެއް އުޅެމުންދާ މި ޖީލުގައި، މިފަދަ މަޅިތަކުގައި ޒުވާނުން ޖައްސުވާކަށް މަކަރުވެރި ހީލަތްތެރިންނަށް އެއީ އެއްވެސް ކަމެއް ނޫނެވެ. ޓެލެގުރާމާއި ސްނެޕް ޗެޓް ފަދަ މީސްމީޑިޔާގެ މަންސަތަކުގައި ބަރަހަނާ މަންޒަރުތަކުގެ ދަޅަ ދައްކައިގެން އެތައް ބައެއްގެ އަތުން އެތައް ފައިސާއެއް ދަނީ ހޯދަމުންނެވެ.

މިކަންކަން މިހެން ހިނގަމުން ދަނީ ހައްލުކުރާނޭ ގޮތެއް ނޭނގިއެވެ. ހަމަ ގައިމު ބަރަހަނާ މަންޒަރުތަކުގެ ދަޅައިގެ ނުޖެހި، އަހަރެމެންނަށް ސަލާމަތް ވެވިދާނެއެވެ. މިކަމުގައި އޮޅުވާލުމާ މަކަރު އޮތެއް ކަމަކު، އެދުންވެރިކަމުގެ ދަންޖާލުގައި ޖެހި ހަލާކާ ފަސާދައިގެ ތެރެއަށް ދަނީ އަމިއްލައަށެވެ. ނަމަވެސް އެހެން ހާލަތްތަކުގައި މިފަދައިން ކަން ނުވިއެއް ކަމަކު، އޮޅުވާލުމާ މަކަރުގެ މަޅީގައި ޖެހިގެން ދެއެވެ. 

އޮޅުވާލުން އިންތިހާއެވެ. މަކަރު ހެދުން އާސުމާނުގައެވެ. ހޭލުންތެރިވާ ވަރަކަށް އެއަށްވުރެ މޮޅެތި އުކުޅުތައް، މަކަރުވެރިން ހަދަން ފަށައެވެ. ސަލާމަތް ވުމެއް ނެތެވެ. އެފަދަ ސްކޭމަރުންގެ ބިރުވެރިކަން އަބަދުވެސް އޮވެއެވެ. އެބައިމީހުން އެ އޮޅުވާލަނީ އެބައިމީހުންގެ އަމިއްލަ ނަފުސުތަކަށެވެ. އެހެނެއްކަމަކު އެބައިމީހުންނަކަށް އެކަމެއް ނޭނގެއެވެ. ހުރިހާކަމެއް ހާމަވެ ފަޟީހަތް ވާނޭ ދުވަހެއް އަންނާނެއެވެ. އެދުވަހަކުން ސްކޭމެއް ނުޖެއްސޭނެއެވެ. އަދި އެދުވަސް ނާންނާނޭ ކަމަށްވެސް ސްކޭމެއް ނުޖެއްސޭނެއެވެ!