ދުނިޔޭގެ ދިރިއުޅުމަކީ ދަތި އުނދަގޫ ދިރިއުޅުމެކެވެ. ފަސޭހަކަމާއެކު ލިބޭ ކާމިޔާބީ އެއީ މި ދުނިޔޭގައި ތަދު އެއްޗެކެވެ. ލިބުމަށް އެދޭ ކާމިޔާބީގައި ބުއްދީގެ ބޭނުން ކުރުމީ ދައްޗާއި އުނދަގޫ ފިލާގޮސް ފަސޭހަ ކަމާއެކު ކާމިޔާބީއާއި ހަމައަށް ވާސިލް ވެވިދާނޭ މަގެކެވެ. 

އެއްބަޔަކު ކާމިޔާބީ އާއި ހަމައަށް ވާސިލްވުމަށް ބޮޑެތި ފިޔަވަޅުތަކެއް އަޅާއިރު އަނެއްބަޔަކު ނަގަނީ ކުދިކުދި ފިޔަވަޅުތަކެކެވެ. އެކިމީހުންގެ ވިސްނުމާ ހިޔާލު ތަފާތު ވެދާނެއެވެ. ނަމަވެސް މިގޮތަށް ދިރިއުޅުމުގައި ނަގާ ފިޔަވަޅުތައް، މާ ބޮޑެތި ފިޔަވަޅުތަކެއް ކަމުގައި ވާނަމަ، ކާމީޔާބީއާ ހަމައަށް ވާސިލްވުން މިއޮންނަނީ ވަރަށް ދަތި އުނދަގޫ ކަމަކަށް ވެފައެވެ. ނަމަވެސް ކުދިކުދި ފިޔަވަޅުތައް އިސްކުރާނަމަ، ކާމިޔާބީއާއި ހަމައަށް ވާސިލްވުމަށް މާ ބޮޑު ތަކުލީފެއް އުފުލާކަށް ނުޖެހެއެވެ. ނަފްސާނީ ދިރާސާވެރިން ނެރެ ދައްކާ އެއް ފަލްސަފާ އަކީ މިއީއެވެ.

މިކަމަށް ބާރުދޭ މިސާލެއް ގޮތުން އެބައިމީހުން ދައްކާ ތަސްވީރަކީ ހަރުގަނޑެއްގެ ތަސްވީރެކެވެ. ހަރުގަނޑެއްގެ މިސާލެކެވެ. ކާމިޔާބު އޮތީ އެ ހަރުގަނޑުގެ އެއްމެ އުހުގައެވެ. ދެ ހަރުގަނޑު އެބަ ހުއްޓެވެ. އެއް ހަރުގަނޑުގެ ހަރުތައް މަދުވެފައި ހަރުތަކުގެ ދުރުމިން ބޮޑެވެ. އަނެއް ހަރުގަނޑުގެ ހަރުތައް ގިނަވެފައި ހަރުތައް ކައިރިއެވެ.

ހަރުތައް ދުރު، ހަރުތައް މަދު ހަރުގަނޑުން އެެއްމެ ހަރުފަތެއް ވެސް ގިރާ ކުރެވެނީ އެތައް ބުރަ މަސައްކަތަކުންނެވެ. އެތައް ދަލެއް އޮހޮރައިގެންނެވެ. އެ އެންމެ ހަރުފަތެއްވެސް ގިރާ ކުރެވޭއިރު، އިންސާނާ ހުންނަނީ ބަލިވެ ހަންވެފައެވެ. ޖެހި ޖެހިގެން އެފަދަ ދެތިން ހަރުފަތް ގިރާ ކުރުމަށްފަހު، އެ އިންސާނާ ވަރުބަލިކަމުގައި ނާއުންމީދު ވެއެވެ. އަބަދު އެ ވަރުބަލި ކަމުގައި އުޅެންވީތޯ ހިތާހިތުން ކިޔާލާ އުންމީދު ކަނޑާލެވެއެވެ. ތަކުލީފާ ބުރަ ބޮޑު ވީމައެވެ.

އެއްކަހަލަ ހަރުތައް ކައިރި، ހަރުތައް ގިނަ ހަރުގަނޑުން އަރަން ދިމާކުރާ އިންސާނާ، މާ ބޮޑު ތަކުލީފެއް، ބުރައެއް ނެތި، އެ ހަރުތައް ގިރާ ކުރަމުން ދެއެވެ. މާ ބޮޑު ވަރުބަލިކަމެއްވެސް ނެތިއެވެ. ނަމަވެސް އެ އިންސާނާ އެތައް ހަރުފަތެއް ގިރާކުރަން ޖެހެއެވެ. މިއީ ކުދިކުދި ހަރުފަތްތަކެކެވެ. ނަތީޖާ އަކީ މާ ބޮޑު ވަރުބަލިކަމެއް ނެތި، ހަރުގަނޑުގެ އެއްމެ އުހަށް މަޑު މަޑުން ވާސިލް ވެވުމެވެ. ކާމިޔާބީ އާއި ހަމައަށް ދެވުމެވެ.

މި މިސާލުން ދިރާސާވެރިން ފާހަގަ ކުރާ ކަމަކީ ދިރިއުޅުމުގައި ކާމިޔާބީއާއި ހަމައަށް ވާސިލްވާން އެދޭ މީހާ، ބޮޑެތި ހިރާސްތަކާ ކުރިމަތި ނުލާށެވެ. ކުދި ކުދި ހިރާސްތައް ނަގައިގެން އެކަން ކަމުން އަރައިގަނެގެން ކުރިއަށް ދާނަމަ، ކާމިޔާބީ އާއި ހަމައަށް ދިޔުމަށް މާ ބޮޑު ވަރުބަލިކަމެއް ތަކުލީފެއް އުފުލާކަށް ނުޖެހެއެވެ. މިމަގުން ދިރިއުޅުން ބައްޓަން ކުރާނަމަ، ކާމިޔަބަކީ ދަތު އެއްޗެއް ކަމުގައި އޮންނަ އޮތުން ނިމިގެން ހިނގައިދާނެއެވެ.