އެކި މީހުން ގަޔާވާނީ އެކި ކުލަކުލަ އަށެވެ. އެއްބަޔަކު ގަދަ ކުލަތަކަށް ލޯބިކުރާ އިރު އަނެއްބަޔަކަށް ކަމުދަނީ މަޑު ކުލަތަކެވެ. ކުލަތަކުގެ ތެރެއިން ލޮލުގައި އަޅައިގަތުން އެއްމެ ގަދަ ކުލަ އަކީ ކޮބާހެއްޔެވެ؟ މި ސުވާލަށް އެއްބަޔަކު، ރަތް ކުލައޭ ނުވަތަ ފްލޮރިސެންޓް އޮރެންޖް ކުލައޭ ބުނެފާނެއެވެ. ކަޅު ކުލަ އަކީވެސް މިގޮތަށް ފާހަގަ ކުރެވޭ ކުލައެކެވެ. ނަމަވެސް މިއީ އަދި އެ ސުވާލުގެ އެއްމެ ރަނގަޅު ޖަވާބުތަކެއް ނޫނެވެ.

ލޮލުގައި އަޅައިގަތުން އެއްމެ ގަދަ ކުލަ އަކީ ރީނދޫ ކުލައެވެ. ޖުމްލަކޮށް ހުރިހާ ސްކޫލް ބަހެއްގައި ހުންނާނީ ރީނދޫ ކުލައެވެ. ސަބަބަކީ ދުރުން ފާހަގަ ކުރަން ފަސޭހަ ކުރުމަށެވެ. ގިނަ އިންޒާރު ނުވަތަ ނުރައްކާ ބޯޑު ތަކުގައިވެސް ހުންނާނީ ރީނދޫ ކުލައެވެ. އެއީވެސް ދުރުން އެކަން ފާހަގަކޮށް އަންގައިދިނުމަށެވެ. މަގު ހުރަސްކުރާ ތަންތަނުގައިވެސް ގިނައިން ބޭނުން ކޮށްފައި ހުންނަނީ ރީނދޫ ކުލައެވެ. އަދި މަގުތަކުގައި ހުންނަ ބަންޕަރު ތަކުގައިވެސް ބައްޅި އަޅާފައި ހުންނާނީ އާއްމުކޮށް ރީނދޫ ކުލައިންނެވެ. މިއީވެސް ދުރުން ފާހަގަ ކޮށްދިނުމަށް ފަސޭހައަކަށް ފަރުމާކޮށްފައި ހުންނަ ގޮތެކެވެ.

ރީނދޫ ކުލަ މިހާ ފަސޭހައިން ލޮލުގައި އަޅަގަންނަ ކުލައެއްކަމުގައި ވާ ސަބަބުތަކެއް ހުރެއެވެ. އެއްކަމަކީ ރީނދޫކުލައިގެ ވޭވް ލެންތު، އެހެން ކުލަތަކަށްވުރެ ދިގުވާނެއެވެ. އެހެންކަމުން އިންސާނުންގެ ލޮލުގައި އަޅައިގަންނަލެއް ފަސޭހަ ވެދެއެވެ. މީގެ އިތުރުން ރީނދޫ ކުލަ އަކީ އިންސާނުންގެ ލޮލަށް "ނާޒުކު" ކުލައެވެ. ފަސޭހައިން އަޅައިގަނެ ފާހަގަވާ ކުލައެކެވެ. ސަބަބަކަށް ވަނީ ރީނދޫ ކުލަ އަކީ، ލޮލުގެ ފެނުމުގެ ހިއްސުގައި ހިމެނޭ ރަތްކުލަ އަދި ފެހިކުލަ، މި ދެކުލަ ދެނެގަތުމަށް އެހީތެރިވެދޭ އުސޫލުން ފެންނަ ކުލައެއް ކަމުގައި ވުމެވެ. އެހެން ކޮންމެ ކުލައެއް ފެންނަނީ އެ ކުލަ އަކަަށް ހާއްސަވެގެން ހިނގާ އުސޫލަކުންނެވެ. ނަމަވެސް ރީނދޫ ކުލަ ފެނުމުގައި، އެހެން ދެ ކުލައެއް ފެނުމަށް ހިނގާ އުސޫލު ހިނގައެވެ. މިއީ ޖިސްމާނީ ގޮތުން ރީނދޫކުލަ އަހަރެމެންގެ ލޮލުގައި އަޅައިގަތުން ބޮޑުވާ ސަބަބުތަކެވެ.

ނަފްސާނީގޮތުންވެސް، އިންސާނާގެ ލޮލުގައި ރީނދޫކުލަ ބޮޑަށް އަޅައިގަންނަ ގޮތެެއް މެދުވެރި ކުރުވައެވެ. އެއީ ރީނދޫ ކުލަ އަކީ އެކުލައަކުން އުޖާލާކަމާއި ހަމަޖެހުމާއި އަދި އުފާވެރިކަން އިހުސާސްކުރުވާ ކުލައެކެވެ. އަދި އަނެއްބައިފަހަރު މިއީ އިޝާރާތެއް ކުރުވާ ކުލައެއް ކަމަށްވެސް އިންސާނާ ނަފްސު ބުނެދޭ ކުލައެކެވެ. އެހެންކަމުން ރީނދޫ ކުލަ އަކީ ލޮލުގައި އަޅައިގަތުން ފަހި ކުލައެކެވެ.

ކުލަތަކުގެ ތެރެއިން ލޮލުގައި އަޅައިގަތުން އެއްމެ ގަދަ ކުލަ އަކީ ރީނދޫ ކުލަ ކަމުގައި ވަނީ ޖިސްމާނީ އަދި ނަފްސާނީ އަސަރުތަކެއްވެސް އޭގައި އެކުލެވިގެންނެވެ.