ގަންނަ މުދަލުގެ ކޮލިޓީ ޗެކް ކުރުމަކީ ނުވަތަ ބެލުމަކީ ވަރަށް ގިނަ މީހުން ކުރާ ކަމެކެވެ. މުދަލުގެ އަގު ބެލުމާއި އެކު އެ މުދަލަކީ ކޮލިޓީ ރަނގަޅު، ފެންވަރު ރަނގަޅު މުދަލެއްތޯވެސް ބަލައެވެ. ރަނގަޅު މޮޅު ކޮލިޓީއެއްގެ މުދަލެއްތޯ ބެލުމަށް ބަލާ އެއްމެ މުހިއްމު އެއް ކަމަކީ އެ މުދަލެއްގެ ބްރޭންޑެވެ. ނުވަތަ އެ މުދަލެއް ވިއްކަން ހުންނަ ފިހާރައެކެވެ. ބައެއް ފަހަރު މުދަލުގެ އަގަކީވެސް އެ މުދަލެއްގެ ކޮލިޓީ ދެނެގަތުމަށް އެހީތެރިވެދޭ އެއްޗެކެވެ. އާއްމުކޮށް އަގު ބޮޑުކޮށް ހުންނާނީ ފެންވަރު ރަނގަޅު މުދަލެވެ. މިއީ އާދަވެ އާއްމުކޮށް މުދަލުގެ ފެންވަރު ބެލުމަށް އަހަރެމެން ބަލާ ކަންކަމެވެ. ނަމަވެސް މުދަލުގެ ކޮލިޓީ ޗެކް ކުރުމުގައި އިހުމާލުވާ ވަރަށް ބޮޑު ކަމެއް އެބަ އޮތެވެ!

އަހަރެމެން މުސްލިމުންނަށް ވީހިނދު، އަހަރެމެން ގަބޫލުކުރާ އެއް އަޤީދާއެއް އޮވެއެވެ. އެއީ މުދަލާ ފައިސާ އާއި ތަނަވަސްކަމަކީ މާތް ﷲ ދެއްވާ ނިޢުމަތެއް ކަމެވެ. މިކަން އޮތީ މިހެން ކަމުން، އަހަރެމެންގެ މުދަލާ ފައިސާގައި ބަރަކާތެއް ވާކަމަށްވެސް އަހަރެމެން ގަބޫލުކުރަމުއެވެ. މި ބަރަކާތަކީވެސް ﷲ ގެ ޙަޟްރަތުން ލިބިދޭ ބަރަކާތެކެވެ. މުދަލުގެ ކޮލިޓީ ނުވަތަ ފެންވަރު ބެލުމުގައި އަހަރެމެން އިހުމާލުވާ ކަމަކީ މިއީއެވެ. އެ މުދަލެއްގައި ﷲ ބަރަކާތް ލައްވާތޯ ނުވަތަ ނޫންތޯއެވެ. އެ އިލާހުގެ ބަރަކާތަށްވުރެ ވަކިން މޮޅު ކޮލިޓީއެއް މުދަލެއްގައި ހުންނާނެ ތޯއެވެ؟

އަހަރެމެން އަބަދުވެސް ކުރާ ޝަކުވާތަކެއް ހުރެއެވެ. ކިތައްމެ މޮޅު އެއްޗެއް ގެނަޔަސް، ނުވަތަ ކިތައްމެ އަގުބޮޑު އެއްޗެއް ގަތަސް، ދުވަސްކޮޅެއް ނުވެ ހަލާކުވާ ވާހަކައަކީ ބައެއްމީހުން ދައްކާ ވާހަކައެވެ. ބޮޑު އަގުގައި ފެންވަރު ރަނގަޅު ސާމާނު ބޭނުން ކޮށްގެން އަޅާ ގެދޮރުގައި މާ ގިނަ ދުވަސްތަކެއް ނުވެ ރެނދު އަޅާ ވާހަކަވެސް ދައްކައެވެ. މިހިރަ މިހިރަ ކަންކަން މި މެދުވެރިވަނީ އެ މުދާ ތަކެއްގައި ދުނިޔެވީ ކޮލިޓީ ނެތިގެންނެއް ނޫނެވެ. މިއީ މި އިންސާނާ ވިސްނާލަން ޖެހޭ މުހިއްމު ކަމެކެވެ. އެ މުދަލުން އެ މަދުވަނީ ބަރަކާތުގެ ކޮލިޓީ ނޫންތޯއެވެ!

މާތް ﷲ މުދަލެއްގައި ބަރަކާތް ލައްވަނީ އެ މުދަލެއް އެ އިންސާނަކު ހޯދާ ގޮތެއްގެ މައްޗަށެވެ. އަދި އެ މުދަލަކުން އެ އިންސާނަކު ކުރާ ބޭނުމެއްގެ މައްޗަށެވެ. އެ އިލާހު ނުރުއްސަވާ ގޮތެއްގައި ހޯދާ މުދަލެއްގައި އެ އިލާހުގެ ބަރަކާތް އޮންނާނެތޯއެވެ! ހަރާމް ގޮތުގައި ހޯދާ ފައިސާ އާއި މުދަލުގައި އަދި އެ ފައިސާއިން އިމާރާތް ކުރާ އިމާރާތްތަކުގައި ﷲ ސުބްޙާނަހޫ ވަތަޢާލާގެ ބަރަކާތް އޮންނާނީ ކޮން ހަމައަކުން ތޯއެވެ؟ އާދޭހެވެ! ނޯންނާނެއެވެ!

ހުރިހާ ކަމަކަށް ކުޅަދުންވަންތަ އިލާހުގެ ބަރަކާތް އެ މުދަލަކަށް ނުލިބޭ މުދަލަކީ، ދުނިޔެވީ ކޮލިޓީ ކިތައްމެ ރަނގަޅު މުދަލެއް ނަމަވެސް، އެ މުދަލެއްގެ އުމުރު ކުރުވެގެން ހިނގައިދާނެ މުދަލެކެވެ. އެ މުދަލަކުން ނަފާވެރިކަން ނުވާ މުދަލަކަށް ވެގެން ހިނގައިދާނެއެވެ. އެހެންކަމުން މުދަލެއްގެ ކޮލިޓީ ނުވަތަ ފެންވަރު ބަލާއިރު، އެ މުދަލެއް ތިމާ ހޯދި ގޮތަކާ އެ މުދަލަކުން ތިމާ ކުރާ ބޭނުމަކާއި މެދު ވިސްނާލާށެވެ. އެ ކަންކަމަކީ މާތް ﷲ ގެ ރުއްސެވުން ލިބިގެންވާ ކަންކަންތޯ ދެނެގަންނާށެވެ. އެ އިލާހުގެ ރުހިވޮޑިގަތުމެއް ނުވާ މުދަލަކާއި އެ އިލާހުގެ ބަރަކާތުން އެއްކިބާ ކުރައްވާފައިވާ މުދާ ތަކުގައި ހުންނާނީ ކޮން ކޮލިޓީއެއް ހެއްޔެވެ؟ އެ އިލާހަކީ ހަމަ ކޮންމެ ކަމަކަށް ކުޅަދުންވަންތަ އިލާހެވެ! ތިމާ ގަންނަ މުދަލުގެ ކޮލިޓީ ޗެކް ކުރާއިރު މި ކަންކަމަށް ސަމާލުކަން ދޭށެވެ! މުދަލެއްގެ ހަގީގީ ކޮލިޓީ އަކީ އެ މުދަލެއްގައި ﷲ ލައްވަވާ ބަރަކާތެވެ!