ހުކުރު ދުވަހުގެ ޙުތުބާ ނިމި ހުކުރު ކުރަން ފެށުމުން މިސްކިތައް އެރުމަކީ ހުކުރު ދުވަހު ޖަމާޢަތަށް މިސްކިތަށް ދިއުން ކަމުގައި ނުބެލެވޭނެއެވެ. އިމާމް މެމްބަރަށް އަރާއިރު ބައެއް މީހުންނަށް އަދި ފެންވަރާ ތާޙިރުވާން ނުފެށެއެެވެ. ގެއިން ނުކުމެވެނީ ޚުތުބާ ނިމެން ދެތިން މިނެޓަށް ވީމައެވެ. ހެޔޮ ޙާލުގައި ގަދަވެ ސަލާމަތުން ތިބެމެއެވެ. ﷲގެ އިރާދަފުޅާއެކު ބަލިމަޑުކަމެއް ނެތެވެ. ހަލަބޮލި ނުރައްކާތެރި މާހައުލެއްނޫނެވެ. ހަލަބޮލިވެފައިވާ ބިރުބޮޑު މަޝްރަހެއްވެސް ނޫނެވެ. ނަމަވެސް ތިބާގެ ނަޒަރު ހުއްޓާލަންވީ ފަލަސްތީނުގެ އަޚުންނަށެވެ.

މަޑުމައިތިރިކަމާއި ވިސްނުންތެރިކަމާއެކު އަޑުއަހާށެވެ. އެ އަޚުން ވަގުތަށް، ހުކުރު ނަމާދަށް ޖަމާޢަތަށް ދެއެވެ. އެ އަޚުން ޖަމާޢަތަށް ހުކުރަށް އެދާ މިސްކިތްތައް ޞަހްޔޫނީން ވަނީ ފުނޑުފުނޑުކޮށް ބިމާ ހަމަކޮށްފައެވެ. ނަމާދު ކުރަނީ ފުނޑުފުނޑުވެފައިވާ މިސްކިތްތަކުގެ މަތީގައެވެ. އެކި ދިމަދިމާލަށް ފެތުރިފައިވާ ގައުތަކާއި ކުނޑިތަކުގެ ތެރޭގައެވެ. އެ އަޚުން، މާތް ﷲގެ ގޮވާލުމަށް އިޖާބަދީ ނަމާދު ޤާއިމް ކުރުމަށް ޖަމާޢަތަށް މިސްކިތަށް ދަނީ ޤަތުލުޢާއްމެއްގެ ތެރޭގައި ތާށިވެފައި ތިބޭ ހިނދުގައެވެ. މިސްކިތަށް ގޮސް އެނބުރި އާއިލާގެ ގާތަށް އައުމުގެ އެއްވެސް ޔަޤީންކަމެއް ނެތް ޙާލުގައެވެ. ޖަމާޢަތުގައި ހަށަމް ބަނދެ ތިބޭ ވަގުތަކީ ބޮލަށް ބޮން އަޅާނޭ ވަގުތަކަށް ވެދާނޭ ކަމަށް ޤަބޫލުކޮށްގެނެވެ. މީގެ ފުންމިން ތަސައްވަރު ކޮށްލާށެވެ. މި ދައްކަނީ ބޮން އަޅާ ވާހަކައެވެ. އިންސާނާގެ ހަށިގަނޑު ވިިރުވާލާ އެކި ދިމަދިމާލަށް އެކި ގުނަވަންތައް ބުރުވާލުމުގެ ބާރު އޮތް ހަތިޔާރެއްގެ ވާހަކައެވެ. މުޅިތަން ސުންނާފަތިކޮށް، ނަސްލުތައް އެކީ މި ބިމުން ފޮހެލުމުގެ ޤާބިލުކަން އޮތް ހަތިޔާރެއްގެ ވާހަަކައެވެ. މުޅި ތަނުގައި ލޭގެ ކޯރުތައް ދަމާލުމަށް އިސްރާއިލުން ބޭނުންކުރާ ބޮންތަކާއި މެސައިލްތަކުގެ ވާހަކައެވެ. ވާރޭ ވެހޭހެން އެ މުސްލިމުންގެ ބޮލަށް އޮހެމުން އެ ދަނީ އެ ބޮންތަކާއި މިސައިލްތަކެވެ. މަގުތަކުގެ އެތައް މިތަނުގައިވާ ފުރާނަނެތް މަސްގަނޑުތަކާއި ހެދިފައިވާ ލޭގެ ކޯރުތަކަކީ ލޮލަށް ފަސޭހަ އަދި ހިތައް ކުޅަދާނަ މަންޒަރުތަކެއް ނޫނެވެ. ބަލައިލި ކޮންމެ ދިމާލަކުން ޞިހްޔޫނީންގެ އަނިޔާވެރިކަމުގެ އިންތިހާއެވެ. އިސްރާއީލުގެ ރަޙުމު ކުޑަ ހަމަލާތަކާއި ޖަރީމާތަކެވެ. ބިމާއި ހަމަކޮށްފައިވާ އިމާރާތްތަކުގެ ދުންތަކުން ކިލަނބުވެފައިވާ ޖައްވާއި މާހައުލެވެ. ރުއިމާއި ވޭނީ އާޙްތަކުން ގުގުމާލާފައިވާ އަޑުތަކެވެ. ކަރުނަ ނުހިކޭ މައުސޫމު ލޯތަކެވެ. ބަނޑުހައިހޫނުކަމާއި ފެންފޮދެންގެ ފިނިކަން ނުލިބޭ ކަރުތަކެވެ. އެ ނާމާންކަމާއި ބިރުވެރި ކަމެވެ. ހިތާމަޔާއި ހިތްދަތިކަމެެވެ. ނަމަވެސް އެ މުސްލިމް އަޚުންގެ އީމާންތެރިކަން އެ ހުރިހާ ގޮންޖެހުންތަކަށްވުރެ ގަދަޔަށް ވިދާލައެވެ. ހިތުގައިވާ ބިރުވެެރިކަމަށްވުރެ މާތް ﷲ އަށްޓަކައިވާ ލޯތްބާއި އިތުބާރު އިންތިހާއެވެ. ހިތުގައިވާ ނުތަނަވަސްކަމާއި ހާސްކަމުގައިވެސް އެންމެ އިސްކަމެއް ދެނީ ދީނީ ވާޖިބުތައް އަދާކުރުމަށެވެ. (اللهم بارك)

އެ ލޭއޮހޮރުވުންތަކާއި ޤަތުލުޢާއްމުގެ ތެރޭގައި، ވިއްސިވިހާލިވެފައިވާ މިސްކިތްތަކުގައި، އެ މުސްލިމް އަޚުންނަށް ޖަމާޢަތުގައި ނަމާދަށް ޤާއިމް ވެވޭއިރު، އަހަރުމެންނަށް ނުވާންވީ ކީއްވެ ހެއްޔެވެ؟ ދައްކަން އޮތީ ކޮން އުޛުރެއް ހެއްޔެވެ؟ ދެއްކެން އޮތީ ކޮން ބަހަނާއެއް ހެއްޔެވެ؟ ހުކުރު ދުވަހު ޖަމާޢަތަށް ހުކުރަށް ދިއުމަށް ފަލަސްތީނުގެ އަޚުން ދައްކަނީ ލާމަސީލި ނަމޫނާއެކެވެ. ތަޢުރީފު ޙައްޤު މިސާލެކެވެ. ވިސްނާ ފިކުރުކުރާ ކޮންމެ މީހަކަށް ޢިބުރަތެކެވެ.