އެކި ކަހަލަ މޯނިން ރޫޓިންއާއި ނައިޓް ރޫޓީންގެ ވުޖޫދުން ހަލަބޮލިވެފައިވާ ދިރިއުޅުމުގައި އެންމެ ރަނގަޅު ސެލްފް ކެއަރއަކީ ކޮބާކަން އެނގޭ ހެއްޔެވެ؟ އަމިއްލަ ނަފްސަށް އަޅާލާ، އަމިއްލަ ނަފްސަށް އޯގާތެރިވެ ރަނގަޅަށް ބެލެހެއްޓުމަށް ކުރެވޭނެ އެންމެ ރަނގަޅު ކަމަކީ ކޮބާ ހެއްޔެވެ؟ އެއީ ފާފަތަކުން ދުރުހެލިވެ ހުރުމެވެ. އަމިއްލަ ނަފްސު ފާފަތަކުން ތާޙިރުކުރުމެވެ. މާތް ﷲ ނަހީކުރެއްވި ކަންތައްތަކުން ދުރުވުމެވެ. ހަށިގަނޑުގައި އުނގުޅާ އެކި ޒާތް ޒާތުގެ ކްރީމާއި މޫނު ދޮޮންނަ ފުޅިތަކާއި (ފޭސް ވޮޝް) ސައިބޯނީގެ އިތުރުން އަގުބޮޑެތި ލޯޝަނަށްވުރެވެސް މީހާ ރީތިކޮށް ތާޒާކޮށްދޭނީ ހެޔޮ ޢަމަލުތަކާއި ތައުބާއިންނެވެ. ފާފަތަކުން ދުރުހެލިވެ ހުންނަ ހުރުމެވެ. 

ފުންކޮށް ފީނާލުމުން އެނގި ހާމަވަނީ ފާފަތަކުގެ ސަބަބުން އިންސާނާއަށް ނޭދެވޭ އެތައް އަސަރުތަކެއް ކުރާކަމެވެ. ފާފަތަކަށް ދެވިހިފައި އެކަމުން ދުރުވާން އުނދަގޫވެއެވެ. ހަމަމިއާއެކު، ކަންނެތްވެ، މީހާ ލޮޑުވުމުގެ އިތުރުން ކަންތައްތައް މަތިން ފޫހިވެއެވެ. ކުރެވޭ ފާފައާމެދު އެއްވެސް ލަދުވެތިކަމެއް ނެތުމާއި ނަމާދު ކުރާހިތްނުވުމާއެކު ނަމާދު ކުރިޔަސް އެއްވެސް ހިތްހަމަޖެހުމެއް އަދި ހަމަޖެހުމެއް ނުލިބެއެވެ. މީގެ އިތުރުން، ޤުރުއާނުގެ މޫރިތި އާޔަތްތައް އަޑުއިވޭ ހިނދު ހިތައް އެއްވެސް އަސަރެއް ނުކުރާއިރުގައި، ހެޔޮ ޢަމަލުތަކުންނާއި ކީރިތި ވަންތަ ﷲގެ މަތިން ހަދުމަކުރުމުން ނުހަނު ދުރުވެވެއެވެ. މިހެންގޮސް އެތައް ކަހަލަ ނޭދެވޭ އަސަރެކެވެ. އެތައް ގެއްލުމެކެވެ.

ފާފަތަކަކީ އިންސާނާ ޖިސްމާނީ ގޮތުންނާއި، ޖަޒްބާތީ ގޮތުން އަދި ނަފްސާނީ ގޮތުން ބަލިކަށިކޮށް ހަޔާތުގެ ހަތަރު އުދަރެސް ފެނުޖައްސާ ކަޅު ވިލާގަނޑުތަކެކެވެ. ވަކި ކަންތައްތަކެއް މާތް ﷲ ޙަރާމްކުރެއްވީ އިންސާނުންގެ ލާބަޔާ މަންފާއަށެވެ. އެކަމެއްގެ ސަބަބުން ގެއްލުންތަކެއްވާތީއެވެ. އެކަމުން ދުރުވުމުގައި ޙިކުމަތްތަކެއްވެސް ވާތީމެއެވެ. ފާފަތައް އިންސާނާ ހަލާކުކޮށް ބިކަކޮށްލައެވެ. އެހެންކަމުން އެންމެ ރަނގަޅު ސެލްފް ކެއަރ އަކީ  ނުވަތަ އަމިއްލަ ނަފްސަށް އަޅާލުމަށް ކުރެވޭނެ އެންމެ ރަނގަޅު އެއް ކަމަކީ ފާފަތަކުން ނަފްސުތައް ދުރުކޮށް ރައްކާތެރިކުރުމެވެ. ގިނަގިނައިން އިސްތިޣްފާރުކޮށް ހެޔޮ ޢަމަލުތައް ގިނަ ކުރުމެވެ. މީގެ ސަބަބުން އަޅާއާއި މާތް ﷲއާ ދެމެދު އޮންނަ ގުޅުން ވަރުގަދަވެ، އެކަލާނގެ ރުއްސެވުން ލިބުމުގެ މަގުތައް ކޮށިގެން ދާނެއެވެ. ހިތުގައި ﷲއަށާއި އިސްލާމް ދީނަށް ލޯބި ޖެހި، ކީރިތި ޤުރުޢާނުގެ އާޔަތްތަކަކީ ކަންފަތުގައި ޖެހޭ އެންމެ ހިތްގައިމު، ހިތައް ފިނިކަން ގެނެސްދޭ އަޑުކަމުގައި ވާނެއެވެ. ނަތީޖާއެއްގެ ގޮތުން، މީހާގެ ހިތައް ހަމަޖެހުން ލިބި، ދުނިޔެއާއި އާޚިރަތް ބާއްޖަވެރި ކުރުމަށްޓަކައި މަސައްކަތް ދާނީ ކުރެވެމުންނެވެ. (އިންޝާ ﷲ)

ކުރެވިފައިވާ ފާފަތަކަށް ހޮޔެހިތުން ތަޢުބާވެ ރަޙްމާންވަންތަ މާތް ﷲގެ ހަޟްރަތުން ފާފަ ފުއްސެވުން އެދި ދަންނަވަންވީއެވެ. އެ ފާފަތައް ތަކުރާރު ނުކުރުމަށް އަޒުމް ކަނޑައަޅަންވީއެވެ. އެއީ ފާފަތައް ތަކުރާރު ކުރެވެމުންގޮސް، އެކަމަށް ދެވިހިފައި އެކަމަށް މީހާ ހޭނިގެން ދިއުމުން އެ ކުރެވެނީ ގޯސްކަމެއްކަން އިޙްސާސް ނުވާ މިންވަރަށް ކަންތައް ދިއުމަކީ ބިރުވެރި ކަމަކަށްވީތީއެވެ. އެ ހިސާބަށް ވާސިލްވުމުގެ ކުރިން ހިކި ފަސްގަނޑަށް ދިއުމަށް ދަތުރު ކުރަންޖެހެއެވެ. ސަލާމަތުގެ އައްސޭރީގެ މަލަމަތި ފެންނަންފަށާނީ އޭރުންނެވެ.