އެކި ކަހަލަ ފަލްސަފާތަކުން ބަރާވެފައިވާ އެތައް ދީންތަކެއް ދުނިޔެ މައްޗަށް ފެތުރިފައި ވީނަމަވެސް، އިސްލާމީ ހިދާޔަތާއި އަލިކަމުން ޖަރީވެފައިވާ މުސްލިމު އާއިލާއަކަށް އުފަންވުމަކީ ކިހާ ބޮޑު ނިޢުމަތެއްކަން ގިނަ ފަހަރު ތަސައްވަރެއް ނުކުރެވެއެވެ. ޤަބޫލުކުރަމެވެ. މުސްލިމު އާއިލާއަކަށް އުފަންވީކަމުގައިވިޔަސް ދީން ދަސްކޮށް އުނގެނުމާއި، ދީނުގައި އަންގަވާފައިވާ ގޮތަށް ޢަމަލުކުރުމަށް އަމިއްލައަށް މަސައްކަތްތައް ކުރަންޖެހެއެެވެ. މުސްލިމު އާއިލާއަަކަށް އުފަންވިޔަސް، އިސްލާމް ދީން 'ހޯދައިގަތުމަށް' އަމިއްލައަށް މަގުތައް ފަހިކުރަން ޖެހެއެވެ. ނަމަވެސް ފާހަގަކޮށްލަން ބޭނުންވަނީ، މުސްލިމު އާއިލާއަކަށް އުފަންވީތީ އިސްލާމްދީނަށް އުޅުމަށް ލިބިފައިވާ މިނިވަންކަމެވެ. އަަމިއްލަ މީހާއަކީ މުސްލިމެއްކަން ފޮރުވައިން އުޅެން ނުޖެހޭކަމެވެ. މުސްލިމަކަށްވުމުގެ 'އައިޑެންޓިޓީ' ވަންހަނާކުރަން ނުޖެހޭކަމެވެ.

ބަންގީގެ އަޑާއެކު މަންމަމެން ނަމާދު ކުރުމަށް ހަނދާންކޮށްދެއެވެ. ނަމާދަށް ދިއުމަށް ނަސޭޙަތްތެރިވެ، ދަރިން މިސްކިތަށް ފޮނުވުމަށް ބާރުއަޅައެވެ. ނަމާދަށް ފަރުވާ ކުޑަކުރާނަމަ އެކަމާ ހިތްހަމަ ނުޖެހިގެން ގަދަކަމުން ނަމަވެސް ނަމާދު ކުރުވައެވެ. ނަމާދަކީ ދީނުގެ ތަނބުކަން ހަނދާން ކޮށްދީ ނަމާދުގެ މުހިންމުކަން ތަކުރާރުކޮށް ވިސްނައިދީ، ނަމާދަށް ހިތް ޖެއްސުމަށް މަސައްކަތް ކުރެއެވެ. ޤުރުއާން ކިޔެވުމަށް ބައްޕަމެން ނަސޭހަތްތެރިވެއެވެ. އަޑުހަރުކޮށް ކީރިިތި ޤުރުޢާނުގެ އާޔަތްތައް ތަޖުވީދުގެ މަގުން އެންމެ ރީތި ރާގަށް ކިޔާ އަޑުއަހަން ބޭނުންވާކަމަށް ބުނެ އެކަމަށް ހިތްވަރުދެއެވެ. ފިރިހެން ދަރިންގެ އަތުގައި ހިފައިގެން މިސްކިތަށް ޖަމާޢަތަށް ގޮސް، ދަރިންގެ ހިތުގައި މިސްކިތާމެދު ލޯބި ޖެއްސުމަށް މަސައްކަތް ކޮށްދެއެވެ. ކޮންމެ ބަންގިއަކަށް ނަމާދަށް ޖަމާޢަތަށް ގޮސް، ދަރިންގެ ކުރިމަތީ އެ ބައްޕަމެން ނަމޫނާ ދައްކައިދެއެވެ. މީގެއިތުރުން، އައުރަ ނިވާކޮށް އިސްލާމީ ފޭރާމުން ޒީނަތްތެރިވުމަށް މައިންބަފައިން ކުޑައިރުއްސުރެ ހާނުވައެވެ. އިއްފަތްތެރިކަން ރައްކާތެރިކޮށް ޝަރުޢީ ހިޖާބުން ނިވާވުމަށް ބާރުއަޅައެވެ. ތުނބުޅި ދިގުކުރަން ބޭނުންނަމަ އެކަން ފާޅުގައި ކުރެވެއެވެ. ހަމަމިއާއެކު، ބަރަކާތްތެރި ރަމަޟާން މަހުގައި ހާރު ކެއުމަށް ތެދުވަނީ އާއިލާ އެކީގައެވެ. މަޣްރިބް ނަމާދުގެ ބަންގީގެ އަޑަށް ރޯދަ ވީއްލަނީވެސް އާއިލާ އެންމެން އެއް ސުފުރާ މަތިންނެވެ. ރޯދައަށް ހުރިކަން އާއިލާއަށް ސިއްރުކުރާކަށް ނުޖެހެއެވެ.

ނަމަވެސް މިފަދަ ކޮންމެ ޢަމަލަކީ، އަލަށް މުސްލިމުވާ ކިތަށްމެ އަޚާކާއި އުޚުތެއްގެ ހުވަފެނަކަށްވުން އެކަށީގެންވެއެވެ. އަހަރުމެންގެ އާދައިގެ ދިރިއުޅުމުގައި ކޮންމެ ދުވަހަކު ކުރާ ކަންތައްތަކަކީ އަލަށް މުސްލިމުވާ ކޮންމެ މީހަކަށް އާދައިގެ ކަންކަމެއް ނޫނެވެ. ހެދިބޮޑުވަމުން އަންނައިރު މަގު ގެއްލިފައިވާ ކިތަށްމެ ބަޔަކުވެއެވެ. މައިންބަފައިން ނުވަތަ އުޅެ ބޮޑުވި މާހައުލެއްގައި އޮންނަ ދީންތައް ޤަބޫލުކޮށް، އެ ފަލްސަފާތަކާއި ވިސްނުންތަކުން ސިކުނޑި ބަރާވެފައިވަނިކޮށް، މާތް ﷲގެ ހެޔޮ ރަޙްމަތްފުޅާއި އިރާދަފުޅާއެކު އިސްލާމީ ހިދާޔަތް ލިބުނު އެތައް ބަޔަކުވެއެވެ. އެތައް އަޚުންނާއި އުޚުތުންނެކެވެ. އެކި ސަބަބުތަކާއި ގުޅިގެން އެ އަޚުންނާއި އުޚުތުންނަށް މިނިވަންކަމާއެކު އިސްލާމް ދީނަށް އުޅުމަށް ހުރަސްއެޅެއެވެ. އެގޮތުން، މައިންބަފައިންނަކީ ތަފާތު ދީނެއް ޤަބޫލުކުރާ ބަޔަކަށްވީތީ އެ މައިންބަފައިންގެ ރުޅިއާއި އަނިޔާވެރިކަމުން ސަލާމަތްވުމަށެވެ. އާއިލީ ގުޅުން ކަނޑާލާ، ދުރުހިލޭ މީހަކަށް ހެދުމުގެ ފުރުސަތު ބޮޑުވީމައެވެ. ނުވަތަ އުޅޭ މާލައުލުގެ ބޮޑު އިންސަންތައަކީ އެހެން ދީނީ އަޤީދާއެއްގެ މީހުންނަށްވުމުން އެ ބައެއްގެ ކިބައިން އަތުވެދާނެ ނުރައްކަލަކަށެވެ. މި ނޫންވެސް އެކި ސަބަބުތަކަށްޓަކައެވެ.

އެ އަޚުންނާއި އުޚުތުންނަށް ފާޅުގައި ނަމާދެއް ނުކުރެވެއެވެ. ފާޅުގައި މާތް ﷲގެ ގެކޮޅަށް ޖަމާޢަތަށް ގޮސް ނަމާދު ޤާއިމުކުރުން ވެފައިވަނީ ބޮޑު ހުވަފެނަކަށެވެ. ގޭގެ ކޮޓަރީގައި ނަމާދުކުރަނީ ކޮޓަރި ތަޅުލައިން ސިއްރުގައެވެ. ކޮޓަރި ދޮރުގައި މީހަކު ޓަކި ޖަހައިފިނަމަ އަވަސް އަވަހަށް މުސައްލަ ފޮރުވަންޖެހެއެވެ. ތަޖްވީދުގެ މަގުން އަޑުހަރުކޮށް ބާރަށް ޤުރުޢާން ކިޔެވުމަކީ ދުރުކަމެކެވެ. އާދައިގެކޮށް ޤުރުޢާން ކިޔަވަންވެސް ޖެހެނީ މީހަކަށް ނުފެންނަ ތަނެއްގައެވެ. އެ މުސްޙަފްވެސް ބާއްވަން ޖެހެނީ މީހުންގެ ލޯތަކަށް ވަންހަނާކޮށްފައެވެ. ހަމަމިއާއެކު، އެ ލޮބުވެތި އުޚުތުން ބޭނުންނަމަވެސް ހިޖާބުން ނިވާނުވެވެއެވެ. ބައެއް އުޚުތުން ބޭރަށް ގޮސް ހިޖާބުގައި ދުވަސް ހޭދަކޮށްފައި ގެއަށް އަންނަންވީމާ ނުވަތަ ގެއަށް އައިސް ހިޖާބު ނަގައެވެ. އާއިލާ ނުވަތަ މުޖްތަމަޢުގައި އުޅޭ މީހުންނަށް އެކަން ފަހުމުވެދާނެތީއެވެ. މީގެއިތުރުން، ތުނބުޅި ދިގުކޮށް ސުންނަތަށް ޢަމަލުކުރަން ބޭނުންނަމަވެސް އަޚުންނަށް އެކަން ނުކުރެވެއެވެ. އަދި ނިމުނީއެއް ނޫނެވެ. ރަމަޟާންމަހު ހާރުކާން ތެދުވަނީ އެކަނިމާއެކަނި ސިއްރުންނެވެ. ރޯދަވީއްލަނީ އެކަނިމާއެކަންޏެވެ. އެއް ސުފުރާމަތިން އާއިލީ ލޯތްބާއި އިޙްސާސްތަކެއް ފެންނާކަށް ނުހުރެއެވެ. ކޮންމެ އިންފާރަކުންވެސް ހަމަހިމޭންކަމާއި މަޑުމޮޅިކަމެވެ.

މުސްލިމު އާއިލާތަކަށް އުފަންވެފައިވާ އެތަށް ބަޔަކަށް އެންމެ އާދައިގެ ނުވަތަ 'ނޯމަލް' ކަންކަމަކީ އަލަށް އިސްލާމްވާ މުސްލިމް އަޚުންނާއި އުޚުތުންނަށް އެހާ ފަސޭހައިން ކުރެވޭ ކަންކަމެއް ނޫނެވެ. އިސްލާމްދީނަށް ފާޅުގައި އުޅުމުގެ އަގު އެންމެ ރަނގަޅަށް ވަޒަންކޮށް ތަސައްވަރު ކުރެވޭނެ އެއްބަޔަކީ އެ އަޚުންނާއި އުޚުތުންނެވެ. މިއީ ނުހަނު ބޮޑު ނިޢުމަތެއްކަން ގިނަ ފަހަރަށް އަހަރުމެންނަށް އޮންނަނީ ވަޒަން ނުކުރެވިފައެވެ. އެންމެ ފުރަތަމަ ދުނިޔެއަށް ނޭވާލީ ދުވަހުން ފެށިގެން އިސްލާމް ދީނަށް ހާނުވާނެ މައިންބަފައިންނާއި، އަމިއްލައަށް އިސްލާމްދީން އުނގެނި، ޢަމަލު ކުރުމަށް ލިބިފައި އޮންނަ މިނިވަންކަމަކީ ހާދަހާވާ ބޮޑު ރަޙުމަތެކެވެ. ހަމަޖެހިގެން އެއްވެސް ބިރަކާ ނުލައި ދީނީ ވާޖިބުތައް އަދާކުރުމަށް މި އޮތް ފުރުސަތަކީ ރަންމުތެކެވެ. މި ނިޢުމަތަށް އަބަދުވެ މާތް ﷲއަށް ޝުކުރުވެރިވާން ވާނެއެވެ.