އޭ ލޮބުވެތި އުހުތުންނޭވެ! އަދުގެ މި ޒަމާނުގައި ޓެކްނޮލޮޖީގެ ކުރިއެރުމާއެކު، އަޅުގަނޑުމެންގެ ދިރިއުޅުމުގެ ވައްޓަފާޅިއަށް ވަނީ ބޮޑެތި ބަދަލުތަކެއް އައިސްފައެވެ. ސޯޝަލް މީޑިއާގެ ބޭނުން އިތުރުވެ، މުވާސަލާތީ ވަސީލަތްތައް ފުޅާވެފައިވާ މި ދުވަސްވަރު، އަޅުގަނޑުމެންގެ އަމިއްލަ ރައްކާތެރިކަމާއި އިސްލާމީ އަޚްލާޤަށް ސަމާލުކަން ދިނުމަކީ ވަރަށް މުހިންމު ކަމެކެވެ.

ލޯބިވާ މީހުންނަށް އަމިއްލަ ފޮޓޯ ފޮނުވުމަކީ މިހާރު އާންމުވެފައިވާ ކަމެކެވެ. ސޯޝަލް މީޑިއަށް ފޮޓޯތައް ދޫކޮށްލުމަކީވެސް އާއްމު ކަމެކެވެ. ނަމަވެސް، މިކަމުގައި ހުރި ނުރައްކާތަކާއި ނޭދެވޭ ނަތީޖާތަކަށް ވިސްނާލުން މުހިންމެވެ. އިސްލާމްދީނުގައި އަންހެނުންގެ ޢިއްފަތްތެރިކަމާއި ރައްކާތެރިކަމަށް ދެއްވާފައިވާ މަތިވެރި މަޤާމު ހަނދާން ބަހައްޓަންޖެހެއެވެ.

ފުރަތަމަ ކަމަކީ، ފޮޓޯ ފޮނުވުމުގައި ހުރި ނުރައްކާތަކެވެ. ފޮނުވިއްޖެ ފޮޓޯއެއް ފޮނުވުނީއެވެ! މިގޮތަށް ފޮނުވޭ ފޮޓޯތައް ފޮޓޯ ނުބައި ގޮތުގައި ބޭނުންކުރުމުގެ ފުރުޞަތު އޮވެއެވެ. މީގެ ސަބަބުން އަމިއްލަ އަބުރާއި ޢާއިލާގެ ޢިއްޒަތަށް އުނިކަން އަތުވެދާނެއެވެ. މިފަދަ އެތައް ކަމެއް ހިނގާ ކަމީ ދުނިޔެ، އަދި ކިއެއް މި ރާއްޖެވެސް ހެކިދޭ ކަމެކެވެ.

އިސްލާމްދީނުގައި އަންހެނުންގެ ސިއްރު ނުވަތަ ޢައުރަ ވަންހަނާ ކުރުމަށް އަމުރުކުރައްވާފައި ވެއެވެ. ޒާތްޒާތުގެ ފޮޓޯ ފޮނުވުމަކީ މި އަމުރާ ޚިލާފު ޢަމަލެކެވެ. އަޅުގަނޑުމެންގެ ޢިއްފަތްތެރިކަމާއި ލަދުވެތިކަމަކީ އަޅުގަނޑުމެންގެ އަގުހުރި ޒީނަތްތެރިކަމެވެ. ލޯބީގެ ގުޅުމެއްގައި ވިޔަސް، ކައިވެނި ނުކޮށް ހުންނަ ދެ މީހުން، އަމުދުން މިފަދަ ކަންކަމުން ދުރުހެލިވުމަށް އިސްލާމްދީން އަމުރުކުރެއެވެ. މިކަން މި މަގުން މިއޮތީ ދެ ފަރާތުގެވެސް ރައްކާތެރިކަމަށްޓަކައެވެ.

ލޮބުވެތި އުޚުތުންނޭވެ! ތިޔަކަނބަލުންގެ ޢިއްފަތްތެރިކަމާއި ރައްކާތެރިކަން ދަމަހައްޓަމާ ހިންގަވާށެވެ. ކިތައްމެ ލޯބިވި ކަމުގައިވިޔަސް، އަމިއްލަ ފޮޓޯ ފޮނުވުމުގެ ބަދަލުގައި، އިސްލާމްދީނުގެ މަތިވެރި އުސޫލުތަކާ އެއްގޮތަށް އުޅުމަށް އިސްކަންދޭށެވެ. އަޅުގަނޑުމެންގެ އަގުހުރި ވަގުތުތައް ﷲ އަށް ކިޔަމަންތެރިވުމަށާއި، ޢިލްމު އުނގެނުމަށާއި، ހެޔޮކަންތައްތައް ކުރުމަށް ހޭދަކުރަމާ ހިންގަވާށެވެ.

އަދި ހަނދާންކުރަމާ ހިންގަވާށެވެ، ޙަޤީޤީ ލޯބި ބިނާވެފައި އޮންނަނީ އިޙްތިރާމާއި، އަމާނާތްތެރިކަމާއި، އިޚްލާޞްތެރިކަމުގެ މައްޗަށެވެ. މި ސިފަތައް ދެމެހެއްޓުމަށް މަސައްކަތްކުރުމަކީ، އަޅުގަނޑުމެންގެ ގުޅުންތައް ވަރުގަދަ ކުރުމަށާއި، ﷲ ގެ ރުހިވޮޑިގަތުން ހޯދުމަށް އެޅޭ ބާރުގަދަ ފިޔަވަޅެކެވެ.

އަޅުގަނޑުމެންގެ ލޮބުވެތި އުހުތުންނޭވެ! ތިކަނބަލުންގެ އަމިއްލަ ނަފްސުގެ ޤަދަރާއި އަގު ދަނެގަންނާށެވެ. ތިކަނބަލުންނަކީ އިސްލާމްދީނުގައި މަތިވެރި މަޤާމެއް ދެއްވާފައިވާ ބައެކެވެ. އެހެންކަމުން، ކުޑަ ވަގުތުކޮޅެއްގެ އުފަލަށްޓަކައި، ދާއިމީ ގެއްލުމެއް ލިބިދާނެ ކަމެއް ނުކުރާށެވެ. ތިޔަބައިމީހުންގެ ޢިއްފަތްތެރިކަމާއި ލަދުވެތިކަން ރައްކާތެރިކުރާށެވެ. 

ﷲ އަޅުގަނޑުމެން އެންމެންނަށް ތެދުމަގު ދައްކަވައި، އެކަލާނގެ ރުހިވޮޑިގަންނަވާ ގޮތުގައި ދިރިއުޅުމުގެ ހެޔޮ ތައުފީޤު ދެއްވާށިއެވެ. އާމީން.