އިންސާނީ މުޖުތަމަޢުގެ އެންމެ މުހިންމު އަސާސްތަކުގެ ތެރެއިން އެއް އަސާސަކީ އިހުތިރާމުކުރުމެވެ. އެހެނަސް، މިއަދުގެ ދުނިޔޭގައި އަޅުގަނޑުމެންނަށް ފެންނަމުންދަނީ އިހުތިރާމުގެ އަގު ވެއްޓި، އޭގެ މުހިންމުކަން ގެއްލެމުންދާ މަންޒަރެވެ. މިއީ ވަރަށް ނުރައްކާތެރި ކަމެކެވެ. މިފަދަ މުޖުތަމަޢުއެއްގައި މުސްތަގުބަލު އޮތީ ގެއްލުމާއި ހަލާކުގެ އިންތިޒާރުގައި ކެތްމަދުވެފައެވެ.

އިހުތިރާމު ކުރުން ކުޑަވެ މި ރީތި އަހުލާގު ގެއްލިގެން ދިއުމުގެ ސަބަބުން މުޖުތަމަޢުގައި ފެންނަމުންދަނީ ހިތާމަވެރި މަންޒަރުތަކެކެވެ. މީހުން އެކަކު އަނެކަކަށް މަލާމާތްކުރުން އިންތިހާއަށް އިތުރުވެފައިވެއެވެ. ލަދުހަޔާތް ކުޑަވެ، ޖެއްސުންކުރުން އާންމުވެފައިވެއެވެ. މިއީ އިސްލާމީ މުޖުތަމަޢުއެއްގެ ސިފަތަކެއް ނޫނެވެ. މިފެންނަނީ ބަލުކަށިވެ، ރޫޅި ހަލާކުވެފައިވާ މުޖުތަމައުތަކުގެ ސިފަތަކެވެ.

އަމުރުތަކަށް ބޯލެނބުން މިއަދު ވަނީ ނެތި ގޮސްފައެވެ. ކޮންމެ މީހަކުވެސް ބޭނުންވަނީ އެމީހަކު ބޭނުންވާ ގޮތަކަށް ކަންކަން ވުމެވެ. އެހެންނަމަވެސް، އަނެކާއަށް އިހުތިރާމު ކުރުމުގެ މުހިންމުކަން ވަނީ އެމީހުންގެ ހިތްތަކުން ފޮހެވިފައެވެ. އިހުތިރާމު ލިބޭނީ އިހުތިރާމު ކޮށްގެންކަން ހަނދާން ނައްތާލާ، އިހުތިރާމު ހޯދަން، ޖެއްސުން ކުރުމާ މަލާމާތް ކުރުން އިތުރުވެއްޖެއެވެ. ބޮޑާވެ ކިބުރުވެރިވެ ތިމާވަރެއް ނެތިގެން އުޅުން އެއީ އިހުތިރާމުގެ ދޮރާށި ކަމުގައި ގަބޫލުކުރެވެން ފަށައިފިއެވެ.

މިފަދަ މުޖުތަމަޢުއެއްގައި ދިރިއުޅުމަކީ ނުރައްކާތެރި ކަމެކެވެ. އިހުތިރާމު ގެއްލިފައިވާ މުޖުތަމަޢުއެއްގައި އަމާންކަމެއް ނޯންނާނެއެވެ. އެކަކު އަނެކަކަށް އިތުބާރު ކުރުމެއް ނޯންނާނެއެވެ. އަދި މީގެ ސަބަބުން މުޅި މުޖުތަމަޢު ހަލާކުވެ، ގެއްލުމާ ކުރިމަތިލާން ޖެހޭނެއެވެ.

އަޅުގަނޑުމެން އެންމެން އެކުގައި މަސައްކަތްކޮށްގެން ނޫނީ މި ނުރައްކާތެރި ހާލަތުން އަރައިނުގަނެވޭނެއެވެ. އެކަކު އަނެކަކަށް އިހުތިރާމު ކުރުމަކީ އަޅުގަނޑުމެން އަލުން އާދަކުރަން ޖެހިފައިވާ ކަމެކެވެ. އެހެންނޫނީ، އަޅުގަނޑުމެންގެ މުޖުތަމަޢު ދާނީ ހަލާކާއި ގެއްލުމާ ދިމާއަށެވެ. އަޅުގަނޑުމެން އެންމެންވެސް މިކަމަށް ސަމާލުވެ، އިހުތިރާމުގެ އަގު ވަޒަންކުރަން ދަސްކުރަމާ ހިންގަވާށެވެ.