ދިވެހީންނަކީ ޒަމާނުއްސުރެ ރީތި އުސޫލުތަކެއް މަތީ ދިރިއުޅެމުން އައި ބައެކެވެ. ހަރުދަނާ ދިރިއުޅުމެއް ތަރުތީބުކުރަމުން އައި ބައެކެވެ. ނަމަވެސް ބަވަނަވެފައިވާ މި ދުނިޔޭގެ ނުފޫޒުން ދިވެހިންގެ އެތަކެއް ގިނަ އާދަތަކެއްގެ ތަރުތީބު ބަދަލުކޮށްލައިފިއެވެ. އެގޮތުން ބަދަލުވެގެން ދިޔަ އެއް އާދައަކީ އަވަހަށް ނިދުމާއެކު މުނާޖާއަށް ފަތިހަށް ތެދުވެ އުޅޭ، ރީތި އާދައެވެ.

ދިވެހިންނަކީ އެބައިމީހުންގެ މަސައްކަތްތަކުގައި ހީވާގިބައެކެވެ. ފަރުވާތެރި، ކަމަށް ކަމޭހިތައިގެން ކަންކަން ކުރަމުން އައި ބައެކެވެ. ދިވެހިންގެ ނިދުމުގެ އާދައަކީ އެބައިމީހުންގެ ދިރިއުޅުން އުޖާލާވެ ބާއްޖްވެރިވި އެއް ސަބަބެވެ. އިޝާ ނަމާދުގެ ފަހުން ހޭލާ ހުރުމުގެ މާ ބޮޑު ބޭނުމެއް އޭރުގެ ދިވެހިންގެ ދިރިއުޅުމަކު ނެތެވެ. އެހެން ކަމުން އިޝާ ނަމާދުގެ ފަހުން، ރޭގަނޑުގެ ކެއުމަށްފަހު ވަގުތުކޮޅެއް ހޭދަކޮށްލުމަށްފަހު ނިދައެވެ. މާދަމާގެ މަސައްކަތަށް އެބައިމީހުންގެ ހަށިގަނޑު ފައްކާކޮށް ތާޒާކަންމަތީ ބެހެއްޓުމަށެވެ.

އަވަހަށް ނިދުމާއެކު ފަތިހާ ހޭލުމަކީ އިންސާނާގެ ނަފްސާނީ ދުޅަހެޔޮކަން އިތުރުކޮށްދޭ ކަމެކެވެ. އެގޮތުން ފަތިހާ ހޭލާ މީހެއްނަމަ ތެޅިފޮޅޭކަށް ނުޖެހޭނެއެވެ. ހަމަ ޖެހިގެން ކަންކަމަށް ވަގުތު ދީގެން ހިތްހަމަޖެހިގެން ތެދުވެވޭނެއެވެ. ވަގުތުގެ ހަމަ ހިމޭންކަމުން ހިތްތަށް މޮޅިކުރުވާ ހިތްތަކަށް ތަސައްލީ ވެރި ކުރުވާނެއެވެ. ދުނިޔޭގެ ބޭކާރު އަޑުތަކުން އިންސާނާގެ ކަންފަތް ދުރުވެ، ޤުދުރަތީ ތާސީރެއްގައި އިންސާނާގެ ކަންފަތް ތެތްމާލެވޭނެއެވެ. ދުވަސް ފެށުމުގައި މިފަދަ މަޑުމައިތިރިކަމެއް އިންސާނާގެ ނަފްސަށް ލިބުމީ މުޅި ދުވަސް އެ އިންސާނާއަށް މަޑުމައިތިރި ވާނޭ ކަމެކެވެ.

ފަތިހާ ހޭލާ، އެ ދުވަހުގެ ފަތިސް ނަމާދަކީ އިންސާނާ ކުރާ ފުރަތަމަ "ކަސްރަތަށް" ވެދާނެއެވެ. ނަމާދުން އިންސާއަށް ލިބޭ ރޫހާނީ ހިތްވަރަކީ މުޅި ދުވަހު އެ އިންސާނާގެ ނަފްސުގައި ބާރުވެރިކަން ދެމިގެން ދާނޭ ކަމެކެވެ. އަދި ހަމައެއާއި އެކު، އެ ހަމަހިމޭން ވަގުތުގައި (ނަމާދުގައި) ކުރެވޭ ހަރަކާތް ތަކުން އިންސާނާގެ މަސައްކަތް އެދުވަހަށް ފެށެއެވެ. މާތް ﷲ ގެ މަދަދާ ރޯއްޖަށް އެދިގެން ފެށިއްޖެ ދުވަހެއް އަބާއްޖަވެރި ނުވާނޭކަމީ ޝައްކެއް ހުރިކަމެއް ނޫނެވެ.

އިރުއަރާ މަންޒަރަކީ ތަސްވީރުކުރެވިގެން ބޮޑެތި މައުރަޒުތަކުގައި ބޮޑުއަގުގައި ވިކެމުންދާ ތަސްވީރުތަކެކެވެ. އެ ތަސްވީރުތަކުގެ އަގު އުފުލިފައި އެ ވަނީ އެ މަންޒަރުތަކަކީ އިންސާނާގެ ލޮލަށް ތަދު މަންޒަރުތަކަކަށް ވާތީއެވެ. ނަމަވެސް ފަތިހާ ހޭލާ އިންސާނާގެ ލޮލަށް މި މަންޒަރަކީ ތަދު މަންޒަރަކަށް ނުވާނެއެވެ. އެ މަންޒަރު ހަމަ ލޮލުން ބަލާލުމަކީ މަދު ބަޔަކު ހޯދައިގަންނަ ނިއުމަތެކެވެ. ނަމަވެސް ދުވަހަށް މަރުހަބާ ކިޔަމުން އަރާ އިރަށް އިސްތިގުބާލު ކުރުމަކީ މި ނިކަމެތި އިންސާނާގެ ހިތް މުޅިން ދިލްކަޝް ކޮއްދޭނެ ކަމެކެވެ.

ފަތިހާ ހޭލައިފި އިންސާނަކު އޭނާގެ ހެނދުނުގެ ނާސްތާ ހިއްސާކުރާނީ ހަރަކާތްތެރި ވުމަށްފަހުގައެވެ. ސިއްހީ މާހިރުން ދެއްވާ ލަފައަކީވެސް މިއެވެ. ހެނދުނުގެ ނާސްތާ އަކީ އިންސާނާ ހޭލާ ގޮތަށް ކާ ކެއުމަކަށް ނުހަދާށެވެ. ވަގުތުކޮޅަކު ހަރަކާތްތެރިވުމަށްފަހު ހެނދުނުގެ ނާސްތާއަށް އިންސާފު ކުރުމަކީ އޭގެ ސަބަބުން ވައިގެ އުނދަގޫތަކުން ދުރުވެ، އަދި އެނޫންވެސް ސިއްހީ މަންފާތަކެއް ކުރުވާނޭ ކަމެކެވެ.

ދިވެހިންގެ ޒަމާންވީ ދިރިއުޅުމަކީ މި ނިޒާމުން ތަރުތީބުވަމުން އައި ނިޒާމެކެވެ. ނަމަވެސް މިއަދު މި ނިޒާމުން ތަރުތީބުވާ ދިވެހިންގެ އަދަދު ވަރަށްވެސް މަދެވެ. އަދުގެ ހާލަތު މި ނިޒާމަށް ތަން ނުދެނީ ކަމަށްވެސް ވެދާނެއެވެ. ނަމަވެސް ދަންނަން ޖެހޭ ހަގީގަތަކީ، ދުވަހުގެ ހަގީގީ ފެށުމަކީ ހަމަ ފަތިހާ ހޭލުން ކަމެވެ. އުނދަގޫ ކަމެއް ކަމުގައި މިކަން ވީނަމަވެސް، ކުޑަ ހިތްވަރެއް ލުމަށްފަހު އަޅުގަނޑުމެންގެ ދިރިއުޅުން މި ނިޒާމަށް ފައްތާލުން ވަރަށްވެސް މުހިންމެވެ. ދުނިޔޭގައި ހަމަ ޖެހިގެންވާ ހާލު ބާއްޖަވެރި ދިރިއުޅުމެއް އުޅެވޭނީ އަވަހަށް ނިދަން އާދަކޮށް ފަތިހާ ހޭލަން އާދަވެގެންނެވެ.