އިހްތިރާމްކުރުމާއި ގަދަރުކުރުމަކީ ދުނިޔޭގެ ތާރީޚުގައިވެސް ފަނޑުވުނެއްނެތި ހިނގަމުން އައި ވަރަށް މަތިވެރި އާދައެކެވެ. ދިވެހި މުޖުތަމައުގައިވެސް ޒަމާނުއްސުރެ އެކަން އޮތީ އެގޮތަށެވެ. މެހުމާންދާރީ އަދާކުރުމުގައި ދިވެހީންނަކީ ނަމޫނާ ބައެއްކަމަށް ބޭރުގެ އެތަކެއް ސައްސާހުންވެސް ލިޔުއްވާފައި އެބަވެއެވެ.

ނަމަވެސް ޒަމާނާއި ތާރީހަށް އަންނަމުންދާ ބަދަލުތަކާއި އެކީ އިހްތިރާމްކުރުގެ އާދައަށްވެސް ބޮޑެތި ބަދަލުތަކެއް ދަނީ އަންނަމުންނެވެ. ހިތްހެޔޮކަމާއެކީ ސަލާމަށް ދިއްކޮއްލި ހިތްހެޔޮ އަތްތައް މިއަދު ފެންނާކަށް ނެތެވެ. ލޯތްބާއި އޯގާތެރިކަމާއެކީ ދިއްކޮއްލާ ލުނބޯ ހުތު ފަނިތަށިތައް މިއަދު ހުސްވެއްޖެއެވެ. ކުލުނާއި އަގަލާއި އެކީ ކޮނޑުގައި ފިރުމާލި އޯގާތެރި ފިރުމުންތައް މަދުވެއްޖެއެވެ. އިހްތިރާމްކުރުމުގައި ދިވެހިން ގެންގުޅުނު ތަރުތީބު އޮޅިއްޖެއެވެ. އާދަތައް ފަސްލެވިއްޖެއެވެ.

ބަދަލުވި ޒަމާނާއި އެކީ ބަދަލުތައް އައި ކަމުގައި ވިނަމަވެސް އިހްތިރާމުކުރުމުގެ އާދަ ގެއްލުނީ އެއްނޫނެވެ. އިހްތިރާމް ނުކުރަނީކީއެއްވެސް ނޫނެވެ. އިހްތިރާމުގެ ތަރުތީބު އޮޅުނީއެވެ. އިހްތިރާމު ކުރުގެ ވައްޓަފާޅި މުޅިން ބަދަލުވީއެވެ. ދިވެހިން ނުދަންނަ، ދިވެހިންނާ ބީރައްޓެހި ވައްޓަފާޅިއެއް ދިވެހިން އިހްތިޔާރު ކުރީއެވެ. ސަލާމުގެ ބަދަލުގައި "ހާއި" ޖަހާލެވެނީއެވެ. ލުނބޮއެ ހުތު ފަނި ތަށިތައް، ކޮފީ ތަކަށާއި ތައްޔާރީ ބުއިންތަކައް ބަދަލުވީއެވެ.

ޒަމާނުގެ ކުލަތަކުގެ ތެރޭގައި ޒީނަތްވިނަމަވެސް އަބަދުވެސް ހަނދާނުގައި ބަހައްޓަންވީ މުހިންމު ނުކުތާތަކެއް އެބަހުއްޓެވެ. އަަޅުގަނޑުމެންނީ ދިވެހިން ކަމެވެ. މެހުމާންދާރީ އާއި އިހްތިރާމްކުރުމުގައި މުޅިދުނިޔެއަށް ނަމޫނާ ދެއްކި ބައެއް ކަމެވެ. އެކުވެރިކަމާއި އެއްބައެއްވަންތަ ކަމުގައި މިސާލު ދެއްކި ބައެއްކަމެވެ. މިއަދު އަޅުގަނޑުމެންނީ އެ މަތިވެރި ކާބަފައިންގެ ދަރިންކަމެވެ.