ދިވެހިބަހުގައި ނަންތައް އުފެދިފައި ހުރީ ކޮންމެ ނަމެއްގައިވެސް މާނައެއް އެކުލެވޭ ގޮތަށެވެ. އެގޮތުން ދާދި އެއް މާނަތަކެއް އެކުލެވޭ ތިން ބަހަކަށް ބަލައިލާނަމެވެ. އެއީ ރައްޓެހިން، ރަހުމަތްތެރިން އަދި އެކުވެރިންނެވެ. ފެންނަ ފެނުމަށް މި ތިން ބަސްވެސް އެއްބަޔަކަށް ރައްދުކުރެވެއެވެ. އަދި އަޅުގަނޑުމެންގެ ދިރިއުޅުމުގައި މިގޮތަށް ރައްދުކޮށްވެސް ހެދެއެވެ. ނަމަވެސް މި ތިން ބަހުގެ ހަގީގީ މާނަތަކަށް ވިސްނާލުން މުހިންމެވެ.

ރައްޓެހިންނަކީ އެމީހަކު ދެކެފަރިތަ ކޮންމެ މީހެކެވެ. ނުވަތަ އެމީހެއްގެ ރަށުގެ އަހުލުވެރިންނެވެ. ހަމައެއާއިއެކު ރައްޓެހިންނަކީ ވަރަށް ގިނަވެސް ބައެކެވެ. ނަމަވެސް ކޮންމެ ރައްޓެއްސަކީ ރަހުމަތްތެރިއަކަށް ނުވަތަ އެކުވެރިއަކަށް ނުވެދާނެއެވެ.

ރަހުމަތްތެރިންނަކީ އެމީހެއްގެ ފަރާތުން އަޅާލުމާއި އޯގާތެރިކަމާއި ކުލުނާއި ހަމްދަރުދީވުން ލިބޭ މީހުންނެވެ. އަދި އެމީހުންނަކީ އެކަކު އަނެކެއްގެ އުފާތަކުގައި ބައިވެރިވެ، ހިތާމަތަކުގައި ހިތްވަރުދޭ މީހުންނެވެ. މިއީ މި ދުނިޔޭގައި ވަރަށްވެސް މަދުބައެކެވެ. ނަމަވެސް ކޮންމެ ރަހުމަތްތެރިއަކީ ރައްޓެއްސެކެވެ. އެކަމަކު ކޮންމެ ރަހުމަތްތެރިއަކީ އެކުވެރިއަކަށް ނުވެދާނެއެވެ.

އެކުވެރިންނަކީ އެމީހަކާއި އެކު އުޅޭ ކޮންމެ މީހެކެވެ. ގާތް ވުމުގެ ސަބަބުން އެކުގައި އުޅެވޭ މީހުންނެވެ. މިއީ ވަރަށް އަވަސް އަވަހަށް ބަދަލުވެދާނެ ބައެކެވެ. އެހެނީ ދިރިއުޅޭ މާހަލު، ނުވަތަ ހާލަތު ބަދަލުވެއްޖެނަމަ އެކުވެރިންވެސް ބަދަލު ވާނެތީއެވެ. ކޮންމެ އެކުވެރިއަކީ ރައްޓެއްސެކެވެ. ނަމަވެސް ކޮންމެ އެކުވެރިއަކު އެއީ ރަހުމަތްތެރިއަކަށް ނުވެދާނެއެވެ.

މި ގުޅުންތަކުގެ ތެރެއިން އެންމެ ދުރު ގުޅުމަކީ ރައްޓެހިކަމުގެ ގުޅުމެވެ. އެއަށްފަހު އެކުވެރިކަމުގެ ގުޅުމެވެ. އެންމެ ވަރުގަދަ އަދި އެންމެ ހަރުދަނާ ގުޅުމަކީ ރަހުމަތްތެރިކަމުގެ ގުޅުމެވެ.