މާތް ﷲ އިންސާނުން ހައްދަވާ މި ބިމުގެ ހަލީފާވެރިން ކަމުގައި ލާއްވާފައިވަނީ އެކަލާންގެ ހެއްދެވި އެންމެހާ މަހުލޫގުންގެ މައްޗަށް މި އިންސާނާ މާތްކުރައްވާ މަތިވެރި ކުރައްވާފައެވެ. އިންސާނާއަށް ވިސްނުމާއި ހިޔާލުކުރުމުގެ ނިއުމަތާއި ބުއްދީގެ މާތް ނިއުމަތްވަނީ ދެއްވާފައެވެ. ކޮންމެ އިންސާނަކަށްވެސް އަބުރަކާއި އިއްޒަތެއް ވަނީ ދެއްވާފައެވެ. ހުރުމަތްތެރިވެގެންވާ މި އިންސާނާގެ ކަރާމާތަކީ ރައްކާތެރި ކުރެވިގެންވާ ނިއުމަތެކެވެ.

އިންސާނާގެ ފުރާނައިގެ އަގަކީ ނަގުދުން ކިރޭނެ އެއްޗެއް ނޫނެވެ. ގެއްލިއްޖެ އަބުރެއް އަނބުރާ ނުލިބޭނޭ ބުނާ ފަދައިން ގެއްލިއްޖެ ފުރާނައެއްގެ ހަގީގީ ބަދަލެއް ނުދެވޭނެއެވެ.

ޖާހިލިއްޔަޒަމާނުގައި އިންސާނާގެ އަބުރާއި، އިއްޒަތާއި، މިނިވަންކަމާއި އަދި މާލާއި ފުރާނައަކީ އޭގައި އެއްވެސް އަގެއް އެކުލެވިގެންވާ އެއްޗެއް ނޫނެވެ. އެބައިމީހުންގެ އަންހެން ދަރީން ދިރިތިއްބާ ވަޅުލަނީ އެ މައުސޫމު ފުރާނައިގެ ކަރާމާތާއި އަގަށް ވިސްނާނުލައެވެ. ވާރުތަ މުދާގަނޑެއް ފަދައިން އެބައިމީހުންގެ އަންހެނުން ދަމަމުން ދިޔައީ އިންސާނިޔަތު ކަމުގެ ކުޑަވެސް އަގަލެއް ހިތުގައި ނެތިއެވެ. ނަމަވެސް އިސްލާމީ ނޫރުގެ އަލިކަމުން، އެ ޖާހިލިއްޔަ ޒަމާނުގެ އަނދިރިކަން ފިލުވައިލިއެވެ. އިންސާނިއްޔަތަށް ހުރި ރަހުމަތުގެ އަލި ދަންމަރު މުޅި ކާއިނާތުގައި ދިއްލައިލިއެވެ.

އިންސާނެއްގެ އަބުރަށް ނުވަތަ ކަރާމާތަށް ހުތުރުވާފަދަ އެއްވެސް އަމަލެއް ކުރުމަކީ އިސްލާމްދީން ނަހީކުރާ ކަމެކެވެ. މީހުންގެ އަބުރުކަތިލަމުން، އިންސާނީ ކަރާމާތް ނަގާލަމުން އުޅުމީ ހުތުރުކަން ބޮޑު ނަޖިސް ފާފައެކެވެ. ކޮންމެ އިންސާނަކީ ހުރުމަތްތެރި ކުރެވިގެންވާ އަބުރަކާއި ކަރާމާތެއް މިލްކުވެގެންވާ އިންސާނެކެވެ.

ކޮންމެ ފުރާނައަކީ ހުރުމަތްތެރި ކުރެވިގެންވާ ޠާހިރު އެއްޗެކެވެ. އެއްވެސް ހައްގަކާއި ނުލާ ފުރާނައެއް ނެތިކޮށްލުމީ މުޅި އިންސާނިއްޔަތު ނެތިކޮށްލުން ކަމުގައި މާތްވެގެންވާ އިސްލާމް ދީން އަންގަވައެވެ. ހަމަ އެއާއިއެކު ފުރާނައެއް ސަލާމަތްކޮށްފިނަމަ މުޅި އިންސާނިއްޔަތު ސަލާމަތްކޮށްފި ކަމަށްވެސް މި ދީން ހާމަކުރެއެވެ. ވަށައިގެންވާ ހުރިހައި ކަމަކުން އިންސާނާގެ ފުރާނަ ވަނީ ހުރުމަތްތެރި ކުރައްވާ ހިމާޔަތްކުރައްވާފައެވެ. 

ހަނގުރާމައިގެ މައިދާނަކީ އިންސާނުންގެ އެތަކެއް ފުރާނަތަކެއް ނެތިގެންދާ މާހައުލެކެވެ. ނަމަވެސް އިސްލާމްދީން ގޮވާލަނީ ހަނގުރާމައިގައި ފިލަންދުވާ ދުޝްމަނުންނާއި، އަޅުންނާއި، ކުޑަކުދިންނާއި، އަދި އަންހެނުން ނުމެރުމަށެވެ. އެހެނީ އެއީ ހުރުމަތްތެރިވެގެންވާ ޠާހިރު ފުރާނަތަކެކެވެ.

އިންސާނެއްގެ ފުރާނަ ނެތިކޮށްލުން ވާޖިބުވާ ހާލަތްތަކެއް އިސްލާމްދީނުގައި ވަނީ ކަނޑައެޅިފައެވެ. އެއީ ބޮޑެތި ފާފަތުން ފާތަކެއް ކޮށްފި އިންސާނެކެވެ. ކުށެއްގެ އަދަބު ދެވުމަކީ އަނިޔާ ވެރިވުމެއް އަދި ހަރުކަށި ވުމެއްވެސް ނުމެނޫންމެއެވެ. މިފަދަ ހާލަތްތަކުގައި އެ ފުރާނައެއް ދުއްވާލުމުގައި ރިއާޔަތްކުރަންޖެހޭ ބައިވަރު ކަންތައްތަކެއް ވެއެވެ. މިކަމުގައި ވަކި ހާއްސަ ތަރުތީބެއް ކަނޑައެޅިފައިވެއެވެ. އަދި އެކަމުގެ ނިޔާ އިސްލާމީ ދައުލަތެއްގެ ހާކިމަކު ކަނޑައަޅާންވެސް ޖެހޭނެއެވެ. އެނޫން ގޮތަކަށް އެފަދަ އަމަލެއް ކުރުމަކީ ހަޑި މުޑުދާރު އަމަލެކެވެ. އަދި އެީ މުޅި އިންސާނިއްޔަތު ނެތިކޮށްލުމެވެ.

ކޮންމެ އިންސާނެއްގެ އަބުރާއި، އިއްޒަތާއި، ޝަރަފާއި، ކަރާމާތާއި އަދި ފުރާނައަކީ ހުރުމަތްތެރިކުރެވި، ހިމާޔަތްކުރެވިގެންވާ ޠާހިރު އެއްޗެކެވެ. އެއްވެސް ހައްގަކާއި ނުލާ އެއްވެސް ފުރާނައެއް ނެތިކޮއްލުމުގެ ހައްގު އެއްވެސް އިންސާނަކަށް މި ބިންމަތީގައި ލިބިގެނެއް ނުވެއެވެ.