އިންސާނުން ދިރިއުޅޭ މުޖުތަމައެއްގައި ޒާތްޒާތަށް ފުރުޅޭ ދޫތަށް ގިނަވެ އާންމު ވެއްޖެނަމަ އެ މުޖުތަމައެއްގެ ބާއްޖަވެރިކަން އަބާއްޖަވެރިކަމަށް ބަދަލުވެދާ ހުއްޓެވެ. އަމުދުން މިތުރުން ހަތުރުނަށް ހަދާނެތެވެ. ކަންކަމުގެ ހަގީގަތަކީ ފޮރުވި ވަންހަނާ ވެގެންވާ އެއްޗެއްކަމުގައިވެ ނިމިދާނެއެވެ.

ކަންކަމުގެ ހަގީގަތް ފާޅުގައި އޮޅުވާލާ، ދުވާލުގެ ގަދަ އަވީގައި ފުޅިބައްތި ހިފައިގެން ހިނގާ މީހުންނަކީ ހަމަ ކޮންމެ މުޖުތަމައެއްގައި އުޅޭ އަދި ކިއެއްތަ އުޅެމުން އަންނަ ބައެކެވެ. މުޅި ދުނިޔެ ދުށް އެއްމެ ޠާހިރު މުޖުތަމައަކީ މުޙައްމަދުގެފާނުން މަދީނާގައި، މުހާޖިރުންނާއި އަންޞާރުން އަޚްކުރައްވާ ބިނާކުރެއްވި މުޖުތަމައެވެ. ނަމަވެސް މުނާފިގުކަމާއި ނިފާގުކަމުގެ ކުލަ ޖެހިފައިތިބި ހަޑި މުޑުދާރު ބަޔަކުވެސް އެ މުޖުތަމައު ވަނީ ދެކިފައެވެ. އެބައިމީހުން، މާތް މުޙައްމަދުގެފާނުންގެ ޠާހިރު އަނބިކަނބަލުނަށް ނިސްބަތްކޮށް، އެ ކަމަނާއާއި ނުބައްދަލު ހަޑިހުތުރު ވާހަކަތަކެއް ފެތުރިއެވެ. ނަމަވެސް އެއީ ކައު ސާހިބާ މުޙައްމަދުގެފާނަށް ވަޙީ ބާވައިލައްވަމުން ދިޔަ ދުވަސްވަރެވެ. އެހެންކަމުން ކަމުގެ ހަގީގަތް މާތް ﷲ ވަނީ މުޙައްމަދުގެފާނަށް އަންގަވައި ދެއްވާފައެވެ. އަދި ކިއެއްތަ އެއީ ޤިޔާމަތާއި ޖެހެންދެން ކިޔޭނޭ އާޔަތްތަކެއް ކަމުގައިވެސް ވަނީ ލައްވާފައެވެ.

ޒަމާނުގެ ޞަފުހާތައް އުކެމުން މިއަދު ގުނަން މިޖެހޭ ދުވަސްތަކަކީ ދުނިޔޭގެ ބިމާއި މާތްވެގެންވާ އުޑުތަކާއި ދެމެދު އޮންނަ "ސީދާ ގުޅުން" ނެތް ދުވަސްވަރެކެވެ. އެހެންކަމުން މިފަދަ ދުވަސްވަރެއްގައި މިފަދަ ޒާތްޒާތައް ދޫ ފުރުޅަމުން ހިނގާ މީސްމީހުންގެ ފަރާތުން މުޖުތަމައުތަކަށް ކުރާ ގެއްލުމުގެ މިނަކީ އާދައިގެ މީޒާނެއްގައި ވަޒަންކުރަން ކުޅަދާނަ ގެއްލުންތަކަކަށް ނުވާނޭކަން ހަމަ ޔަގީނެވެ.

ހަގީގަތް އޮޅުވާލާ ދޮގު ބުހުތާނު ހަބަރުތައް މުޖުތަމައުތަކުގެ އެކޮޅުގައްޔާއި މިކޮޅުގައި ފަތުރާ، ތިމަތިމާމެންގެ އުނިކަން ފޮރުވާ، ދޭދޭ ގުޅުންތައް ހަލާކު ކުރަމުން ދާ ހަޑިމުޑުދާރު އިންސާނުންނަށް ގަދަކީރިތި ވަންތަ މާތް ﷲ ވަނީ ވަޢީދުގެ ބަސް ވަޙީކުރައްވާފައެވެ.

﴿6﴾ يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ 

 އޭ إيمان ވެއްޖެ މީސްތަކުންނޭވެ! ތިޔަބައިމީހުންގެގާތަށް فاسق އަކު خبر އަކާއިގެން އަތުވެއްޖެނަމަ، އޭގެ ދޮގުތެދުބަލައި، حقيقة ހޯދާށެވެ! (އެއީ) ނޭނގިތިބެ، ތިޔަބައިމީހުންނަށް ބަޔަކަށް ގެއްލުންދެވިދާނެތީއެވެ. ފަހެ، އެހެންވެއްޖެނަމަ، ތިޔަބައިމީހުން ކުރިކަންތަކުގެ މައްޗަށް ހިތާމަކުރާ ބަޔަކުކަމުގައި ތިޔަބައިމީހުން ވެދާނެތެވެ. 

[ އަލް ޙުޖުރާތް 6 ވަނަ އާޔަތް ]