ދަރުމަވެރިންގެ ހަގީގީ މަހްފޫމަކީ ކޮބައިހެއްޔެވެ؟ ދަރުމަވެރިން ކަންކަން ކޮށްދީ އުޅެނީ ދަރުމައަށެވެ. މަޖޫރީން މަސައްކަތް ކޮއްދީ އުޅެނީ އުޖޫރައަށެވެ. ފައިސާ ނުވަތަ އެނޫންވެސް މައުނަވީ އުޖޫރައަކަށެވެ. އެހެންކަމުން މަޖޫރީން އެމީހުންގެ އުޖޫރަ ނުލިބޭނަމަ އެކަމާ ޝަކުވާ ކުރުމުގެ ހައްގު އެމީހުންނަށް ލިބިގެން ވެއެވެ.

އަދުގެ ދުނިޔޭގެ ހާލަތު ޒަމާނާއި އެކުވެ މިވަނީ ބަދަލުވެފައެވެ. ކަންކަމުގައި މީހުން ދެކޭ ނަޒަރިއްޔާތު މިވަނީ ފުށުން ޖެހިފައެވެ. ނަމަވެސް ކަންކަމާއި އެކަންކަމުގެ ހަގީގަތެއް ބަދަލެއް ނުވެއެވެ. ބަދަލުވީ އެކަންކަމާއި މެދު މި އިންސާނާ ދެކޭ ގޮތެވެ.

ދުނިޔެ މިއަދު ތަހައްމަލު ކުރަމުންދާ ކޮވިޑުގެ ބިރުވެރި ދުވަސްތަކުގައި ދަރުމަވެރިންގެ ވާހަކަ އަކީ ވަރަށް ގަދައަށް ދެކެވޭ ވާހަކައެކެވެ. ދުނިޔޭގެ ހުރިހާ ހިސާބެއްގައިވެސް ދަރުމަވެރިން ދައްކަނީ ގަލަމާއި ދުލުން އެކަންކަމުގެ ޝުކުރު އަދާނުކުރެވޭހާ ފުރިހަމަ މިސާލުތަކެކެވެ. އެބަައިމީހުން އެބައިމީހުންގެ މަސައްކަތް ހަލާސް ކުރަނީ ދަރުމަ އެދިގެނެވެ. ކޮންމެހެން ދުނިޔަވީ ބަދަލަކަށް އަދި އުޖޫރައަކަށް އެދިގެނެއްވެސް ނޫނެވެ.

ކަންމިހެން ހުރިނަމަވެސް ދުނިޔޭގެ ބައެއް މުޖުތަމައުތަކުގައި ދަރުމަވެރިން އެމީހުންގެ މަގާމު އޮޅިގެން އުޅޭމަންޒަރު އެބަފެނެއެވެ. ނަމުގައި އެމީހުންނީ ދަރުމަވެރިންނެވެ. ނަމަވެސް އެމީހުންނަށް "އުޖޫރައެއް" ނުލިބިގެން އެކަމާ ޝަކުވާކޮށް އުޅޭމަންޒަރު ފެންނަނީ މަދެއްކޮށެއްނޫނެވެ. މީސްމީޑިޔާގެ އެކި އެކި ވަސީލަތް ތަކުގައި ދަރުމަވެރިންގެ "އުޖޫރަ" ނުވަތަ "އެލަވަންސް" ނުލިބިގެން އެކަމުގެ ޝަކުވާ ކުރެވޭލެއް މަދެއް ނޫނެވެ. ބޮޑެތި ގައުމުތަކުގައި އެގައުމުތަކުގެ ދައުލަތްތަކުގެ އިދާރާތަކުގައި މިކަމަށް އެދި ޓަކިޖަހަމުން ދެއެވެ. މިހާހިސާބުން އުފެދޭ ސުވާލަކީ އެއީ ހަގީގީ ދަރުމަވެރިންބާއެވެ. ނުވަތަ އެއީވެސް މަޖޫރީންގެ ބާވަތެއްބާއެވެ. މިވާގޮތެއް މުޅިއަކުން ސާފެއް ނުވެއެވެ! 

ޠާހިރު ހިތަކައިގެން، އިންސާނިއްޔަތަށް ދަރުމަވެރި ހިދުމަތަކަށް ނުކުންނަ ދަރުމަވެރިން އެލަވަންސެއް އަދި އުޖޫރައެއްވެސް ބޭނުމެއް ނުވާނެއެވެ. އެފަދަ އެދުމެއް ހިތުގައި ވަނީނަމަ ފަހުރުވެރިކަމާއެކު، ދަރުމަވަރިންގެ މި ރީތި ނަން ކިލަނބު ނުކުރައްވާށެވެ. ދަރުމަވެރިންގެ ދަފްތަރުގައި ޖެހި ހަގީގީ ދަރުމަވެރިންގެ އަގު ވައްޓާނުލާށެވެ.

އެންމެރަނގަޅެވެ! ތިބާ ކުރާ މަސައްކަތަށް އޭގެ އުޖޫރަ ލިބެން ޖެހޭނެއެވެ. ނަމަވެސް އުޖޫރައަކީ ފައިސާއިންނާއި ދަރުމައިން ދެވޭނޭ އެއްޗެކެވެ. ދަރުމަވެރިންނަކީ މިދެންނެވި "ދަރުމައިގެ" އުޖޫރަ އެދޭ މީހުންނެވެ. ފައިސާގެ އުޖޫރައެއް ނުވަތަ އެލަވެންސެއްވެސް އެދޭނަމަ ތިބާއީ ދަރުމަވެރިއެއްނޫނެވެ. ދަރުމަވެރިން އުޖޫރަ ނުލިބިގެން ޝަކުވާއެއް ނުކުރާނެއެވެ. އަދި ކިއެއްދަ އުޖޫރައަކަށް ނުމެ އެދޭނެއެވެ.