ކިތަންމެ ހަރުދަނާ މައިންބަފައިން ނަމަވެސް މިއަދު އެންމެ ބޮޑު އެއް ގޮންޖެހުމަކީ އެމީހުންގެ ދަރިން ހެޔޮގޮތުގައި ތަރުބިއްޔަތު ނުކުރެވުމެވެ. ޚާއްޞަކޮށް އިސްލާމް ދީނަށް ލޯބިކުރާ ދަރިންގެ ގޮތުގައި ތަރުބިއްޔަތު ކުރުމުގެ ގޮންޖެހުމެވެ.

ދުނިޔޭގައި ވީއްޔާ ވީހާކަމެއްގެ އެންމެ މޮޅު ޙައްލު ފެންނަން އޮތީ ކީރިތި ޤުރްއާނުންނެވެ. އެހެންކަމުން އިސްވެ ބުނެވިދިޔަ ފަދަ ގޮންޖެހުންތައް ކުރިމަތިވާ ކޮންމެ ބެލެނިވެރިއަކުވެސް ލުޤްމާން ސޫރަތުގެ މާނައާއި ތަފްސީރަށް ފުންކޮށް ވިސްނައިލާށެވެ! އަދި އެއާއި އެއްގޮތަށް ޢަމަލުކުރަން މަސައްކަތްކުރާށެވެ. 

ލުޤްމާންގެފާނު ދަރިކަލުންނަށް ނަޞޭޙަތް ދެއްވެވުމުގައި އަބަދުވެސް އެންމެ އިސްކުރައްވަވާފައިވަނީ ﷲ ވަޙީ ބަސްފުޅުތަކާއި އަމުރުފުޅުތަކެވެ. ކަންކަން މަނާކުރައްވަވާއިރުވެސް މަނާކުރައްވަވަނީ ﷲ ތައާލާ އެކަމެއް މަނާ ކުރައްވަވާފައިވާތީކަން ބަޔާން ކުރައްވަމުންނެވެ. އަދި ﷲ ތައާލާއީ ކުރެވޭ އެންމެ ކުދި ފާފަތަކުގެ ހިސާބުވެސް ބައްލަވާނެ އިލާހުކަން ބަޔާންކޮށް ދެއްވަމުންނެވެ.

މިކަމުގެ ޙިކުމަތަކީ ދަރީންނަށް ކުރެވޭ ކަމަކީ ކިތަންމެ ކުޑަ ކަމެއް ކަމަށް ޤަބޫލު ކުރެވުނު ނަމަވެސް އެކަމަކީ އިސްލާމް ދީން ހުއްދަ ނުކުރާ ކަމަކަށްވާނަމަ އެންމެ ފަހަރަކުވެސް އެކަން ކުރަން ހުއްދަވެގެން ނުވާނެ ކަމެވެ. ދަރިންގެ ހިތްތަކުގައި އެންމެ ޅައުމުރުން ފެށިގެން ﷲ ތައާލާއަށް ލޯތްބާއި ކިޔަމަންތެރިކަން އުފައްދަން ޖެހޭނެއެވެ. ﷲ ތަޢާލާގެ އަމުރުފުޅުތަކަށް ބިރުވެތިވެ ރައްކައުތެރިވާން ނަޞޭޙަތްދީ ހާނުވަން ޖެހޭނެއެވެ. ހަމަ އެއާއިއެކު އެހުރިހާ ކަމެއްގައިވެސް މައިން ބަފައިން އަމަލީ ގޮތުން ދަރިންނަށް ނަމޫނާ ދައްކަން ޖެހޭނެއެވެ. 

މިހާރަކަށް އައިސް ބައެއް މީހުން އެމީހުންގެ ދަރިންނަށް ކަންކަން ވިސްނައިދޭން މަސައްކަތްކުރާއިރު ގިނަ ފަހަރު ބޭނުންކުރާނީ ވަކި ފަރާތަކުން ބުނާ ބަހެއްގެ ގޮތަކު ނޫނެވެ. ތިމާ އަމިއްލައަށް ބުނާ ބަހެއްގެ ގޮތުގައެވެ. އެގޮތަށް އެކަން ކުރުމުން ދަރިންނަށް ކުރާ އަސަރު ވަރަށް ބޮޑުތަނުން ކުޑަވާނެއެވެ. އެއިގެ ބަދަލުގައި ކީރިތި ޤްރްއާނާއި ސުންނަތުން މިސާލު ދައްކާނަމަ ކުރާ ފައިދާ މާބޮޑުވާނެއެވެ. 

މިކަމުގެ ކުޑަކުޑަ މިސާލެއް ހިއްސާކޮށްލާނަމެވެ. ދަރިއަކު ކާމޭޒުމަތިން ކާއެއްޗެހި ނަގާއިރު ދުރުފަރާތުން ނަގާނަމަ މޭޒުމައްޗަށް އެޅިދާނެ ކަމަށް ބުނުމުގެ ބަދަލުގައި ރަސޫލް (ޞޢވ) ޙަދީޘްފުޅު ކުރައްވަވާފައިވަނީ ތަށީގެ ގާތުން ނަގައިގެން ކާންކަމަށް ބުނާށެވެ! ދަރިފުޅު އެކަމަށް ދޭ ސަމާލުކަން މާބޮޑުވާނެއެވެ. 

ދަރިން ތަރުބިއްޔަތުކުރުމުގައި މިކަންކަމަށް އެކުދިންގެ އެންމެ ޅަފަތުން ފެށިގެން އަމަލުކުރެވިއްޖެނަމަ ނުކިޔަމަންތެރިވުމުގެ މައްސަލަތައް ކުރިމަތިވުން ވަރަށް ބޮޑުތަނުން ހައްލުވާނެއެވެ.

ހަމަ އެއާއިއެކު ދަރިންނަށް ނަޞޭޙަތްދޭއިރު ރުޅި އިސް ނުކުރާށެވެ. މާތުރަ އޯގާތެރިކަން އިސްކުރާށެވެ! އޯގާތެރިކަމާއިއެކު މުޢާމަލާތުކުރާށެވެ! ދަރިންގެ ސަމާލުކަން ބޮޑުތަނުން އިތުރުވާނެއެވެ. 

ބޮޑެތި މީހުންނަށް ބެލިނަމަވެސް ނުކިޔަމަންތެރިވުމުގެ މައްސަލަތައް މިފެންނަނީ ﷲ ތަޢާލާއަށް ބިރުވެތި ނުވާ މީހުންގެ ކިބައިންނެވެ. ﷲ ތައާލާގެ އެންގެވުންތަކަށް އިޙްތިރާމް ނުކުރާ މީހުންގެ ފަރާތުންނެވެ. ވީމާ ކޮންމެ އިންސާނަކަށްވެސް އެންމެ މުހިންމު ކަމަކީ ﷲ ތައާލާއަށް ބިރުވެތިވެ ކިޔަމަންތެރިވުމުގެ ޢާދަ އެމީހެއްގެ ކިބައިގައި ހަރުލާފައި ހުރުމެވެ. ވީމާ ދަރިން އިޞްލާޙްކުރަން މަސައްކަތް ކުރުމުގައިވެސް އެންމެ މުހިންމު ކަމަކީ އެކުދިންނަކީ ﷲ ތައާލާއަށް ބިރުވެތިވާ ކުދިންގެ ގޮތުގައި ތަރުބިއްޔަތުކުރަން މަސައްކަތް ކުރުމެވެ. 

ނަސޭހަތާއި އިރުޝާދުތައް ދޭއިރު އެއީ ﷲ ގެ އަމުރުފުޅު ކަމާއި އެއީ ރަސޫލާ (ޞޢވ) ގެ ބަސްފުޅުކަން ހަނދާންކޮށްދޭށެވެ. މާތް ﷲ ގެ އިރާދަފުޅާއި އެކު މިކަމުގައި ފަހިމަގެއް ނޫނީ ނުދައްކަވާނެއެވެ!