އެމެރިކާގެ އަވަށެއްގައި އުޅުނު ޒުވާން ފިރިހެނެކެވެ. އިސްލާމީ ހިދާޔަތު ލިބިފައިވާ އާއިލާއެއްގެ ޒުވާނެކެވެ. ދީނަށް ލޯބިކުރާ ރިވެތި އަޚްލާގެއްގެ ވެރިޒުވާނެކެވެ. އޭނާގެ ދިރިއުޅުމަށް އައި ބަދަލަކާއި އެކު އޭނާ އުޅެމުން އައި އަވަށް ދޫކޮށް އެހެން އަވަށަކަށް ބަދަލުވިއެވެ. 

އެ އަވަށުގައި އޭނާ އުޅޭތާ މީ ފުރަތަމަ ހަފްތާއެވެ. ބާޒާރުކޮށްލަން ބޭރަށް ނުކުމެލާފައި ދެކޮތަޅު ސާމާނު ގަނެލައިގެން ގެއަށް އައި ދުވަހެކެވެ. ގޭގެ ތެރެއަށް ވަދެގެން އައިސް ލިފްޓްގޮޅީގައި ހުއްޓިލައިގެން ހުއްޓެވެ. ލިފްޓަށް ފިތާލައިގެން، ލިފްޓް ފައިބަންދެން އިރުކޮޅަކު މަޑުކޮށްލަން ޖެހުނެވެ. އެވަގުތު ހަމަ އެ ލިފްޓާއި ދިމާލަށް ހިނގާފައި ޒުވާން އަންހެންކުޖަކު އައެވެ. އޭނާވެސް ލިފްޓް ފައިބަންދެން އިންތިޒާރުގައި މަޑުކޮށްލައިގެން ހުއްޓެވެ.

ލިފްޓް އައުމާއެކު މި ދެމީހުންވެސް ލިފްޓްގެ ތެރެއަށް ވަނެވެ. ފިރިހެން މީހާ ލިފްޓްގެ ފިތަށް ފިތާލުމަށްފަހު ލިފްޓުގެ ކަނަކަށް ޖެހިލިއެވެ. މި ޒުވާން އަންހެން ކުއްޖާވެސް އެބީދައިން ކަންތައްކޮށްފިއެވެ. މި ޒުވާން ފިރިހެނާ ލިފްޓްގައި ހުރީ އިސްޖަހައިގެންނެވެ. އެހެނީ އެ އަންހެން ކުއްޖާ ލައިގެން ހުރީ ނިވައިކަން ކުޑަ ހެދުމެކެވެ. ގަޔަށްބާރު، ތުނި، ކުރު ހެދުމެއްގައި ހުރި އެ ޒުވާން އަންހެންކުއްޖާ ދިޔައީ ފޯނާ ކުޅެމުންނެވެ.

ލިފްޓްގައި އިރުކޮޅެއް ވީފަހުން އެ އަންހެންކުއްޖާ ފިރިހެނާއާއި ދިމާލަށް ބަލާލިއެވެ. އޭނާ ހުރީ އިސްޖަހައިގެންނެވެ. މި އަންހެންކުއްޖާ އާއި ދިމާލަށް ބަލާވެސް ނުލާ އެ ޒުވާން ފިރިހެނާ އިސްޖަހައިގެން ހުންނާތީ މި ކުއްޖާއަށް ކަމު ނުގޮއްސިއެވެ. "އަހަރެން މާ ހަޑީތަ؟ ހުތުރީތަ....؟ ކީއްވެގެން މަށާ ދިމާލަށް ބަލައިލާންވެސް ނޭނގިފަ ތި ހުންނަނީ.. އޭނ...!!" ޒީލަގަދަ ރާގަކަށް މި ކުއްޖާ ބުނެލިއެވެ. އަދިވެސް އެކަމާއި ހިތްހަމަ ނުޖެހިގެން އެ ފިރިހެނާ އާއި ދިމާލަށް އެއްޗެހި ގޮވަން ފެށިއެވެ.

އިސްޖަހައިގެން އިން މި ޒުވާނާ އިސްއުފުލާލާ އެ އަންހެން ކުއްޖާއާއި ދިމާލަށް ނަޒަރު ހިންގާލީ ލަދުން ހުރެއެވެ. "ތިބާ ހުތުރީކީ ނޫން..! ހަޑީކީއެއްވެސް ނޫން...! އަހަރެންގެ އަންހެނުން އެބަހުރި..! އަހަންނަކީ ތުއްތު ކުއްޖެއްގެ ބައްޕަ...! އަހަންނަކީ މުސްލިމެއް، އިސްލާމެއް..! އަހަރެމެން ހިފަހައްޓަންޖެހޭ އަޚްލާގީ މިންގަނޑެއް ހުރޭ...! ތިބާގެ ހަށިގަނގެ އަގު ތިބާ ހިފަހައްޓާ..! ތިޔަހެން ނީލަން ނުކިޔާ..! އަހަންނަށް ހަމަ ޔަގީން ތިބާގެ ހަށިގަނޑަކީ އަގުބޮޑު، ރައްކާތެރިކަމާއި ހިމާޔަތް ލިބިގެންވާންޖެހޭނޭ ތަނެއް..!" މި ޒުވާން ފިރިހެނާގެ މި ބަސްތަކަށް އެ އަންހެން ކުއްޖާ ހުރީ ދޭނޭ ރައްދެއް ނޭނގިފައެވެ. ނަމަވެސް އޭނާގެ އަތުގައި އޮތް ޖެކެޓެއް ނަގާ އޭނާގެ ހަށިގަނޑު ނިވައިކޮށްލިއެވެ.

ދުވަސްތައް ފާއިތުވަމުންގޮސް ދެތިން ދުވަސް ވެއްޖެއެވެ. މި ފިރިހެން މީހާ އާއި އެ އަންހެން ކުއްޖާއާއި އަނެއްކާ ލިފްޓުން ބައްދަލު ވެއްޖެއެވެ. ނަމަވެސް މިއަދު އެ ކުއްޖާ ހުރީ ނިވައިވެގެންނެވެ. ވަރަށް ބޮޑަށް ނިވައިވެގެންނެވެ. އެ ކުއްޖާ އެދުނީ މި ފިރިހެން ޒުވާނާގެ ފޯނު ނަންބަރު ދިނުމަށެވެ. އޭނާ އިރުކޮޅަކު ވިސްނާލުމަށްފަހު އެ ކުއްޖާއަށް ނަންބަރު ދިނެވެ.

ދުވަސްތައް މަސްތަކަށް ބަދަލުވަމުން ދިޔައެވެ. އެ އަންހެންކުއްޖާއަށް އިސްލާމީ ހިދާޔަތު ލިބި މުސްލިމަކަށް ވެއްޖެއެވެ. އަދި އެ ކުއްޖާއީ މިއަދު އެ ޒުވާން ފިރިހެނާގެ ދެވަނަ އަނބިމީހާއެވެ. 

މިއީ އެޒުވާނާ އޭނާ، ކެތްތެރިވެ، ބެލުން ތިރިކޮށް، ހައްގުބަސް ބުނުމުގެ ނަތީޖާއެވެ. މިފަދަ އިބުރަތްތެރި ވާހަކަތަކަކީ އެއިން އިބުރަތް ހާސިލު ކުރުން މުހިންމު ހާދިސާތަކެވެ. އަދުގެ ޒުވާނުންނަށް މިފަދަ ވާހަކަތައް ތިލަކޮށްދީ ބުނެދިނުމަކީ ވަރަށްވެސް މުހިންމު ކަމެކެވެ.